YOANES 6
6
Yésus a ve bizuʼu bi bôte bidi
(Mt 14:13-21; Mk 6:30-44; Lk 9:10-17)
1E mvuse valé, ane Yésus a nga téé a dañe mañe me Galilé ya Tibériad, e kindiʼi ya yat. 2Nkunda bôt anen wo zu wo tôñe nye, amu be nga yen bitua bi mam a nga bo e be minkôkon. 3E nde ñhe Yésus a nga ke e nkôle yôp, a ntoo wé, baa beyéʼé bé. 4Valé Pak é ntoo bebé, abôʼô Beyude. 5Eyoñe Yésus a lômeya mis a lôbô, a yen ane beta nkunda bôt a zu be nye, e nde a nga jô Filip na: E ne bia ye ke kuse belet vé na bôte ba be di? 6A nga jô nalé a veʼele nye; amu émien a mbe a yemek jam a ye bo. 7Ane Filip a nga yalane nye na: Belet tañe bedenié mintete mibaé, é voʼo yiane môt ase na a nyoñe ve mon ôfus. 8E nde ñyeʼé wé wua, André, monyañe Pierre a zu jô na: 9Mongô éziñ a ne va, a bili belet étaan a kos ébaé: ve jôme té é ne jé asu abime abui bôte di? 10Ane Yésus a nga jô na: Joʼane bôt e si. Biloʼo bi mbe abui vôm ate. E nde ñhe beyôme befam, tañe bebé toyini étaan, be nga mane tabe si. 11Ane Yésus a nga nyoñe belet nyô, a mane ve akéva, a ye kab je bôte be nga tôtoone si, kose fe avale da, abim ese be nga kômbô. 12Eyoñe be maneya jaé, e nde a nga jô beyéʼé bé na: Kelane mia toʼé afufus ese da te buk, jôm éziñ é bo te ja ntuk. 13Ane be nga tôkane afufuse nga buk, e belet étaan ya bôte ba be nga di, be jalé minkoé awôm a mibaé. 14Ayene be nga yen étua jam a nga bo, bôte be nga ke ba jô na: E bebela, e môte nyô e nye a ne nkulu mejô a zu e si ndôn. 15Eyoñe Yésus a yemeya na ba kômbô zu bi nye a ngule na be tele nye njô bôt, ane a nga kôlô valé a sôlan, a beta bulan e nkôle yôb émien étam étam.
Yésus a wulu e mendim me mañ yôp
(Mt 14:22-27; Mk 6:45-52)
16Eyoñe ngôʼé é boya, ane baa beyéʼé bé be nga siliki e mfaʼa ya mañ 17be kele dañe éfunga été a ke e kindiʼi mañe ya Kapernawum. Dibi e maneya vin, Yésus a ngenane teke zu koone be, 18ngul évuñulu kik é nga vuñ e mañ été va. 19Eyoñe be fuleya éfunga e nté bestad mewôm mebaé a betaan, nge mewôm melale kik, ane be nga yene Yésus a zaʼa a wulu e mañe mañ yôb a ntoo bebé a éfunga, e nde be nga ko woñ. 20Ane a nga jô be na: Mamiene le, te koone woñ. 21Be nga kômbô ñhe na be nyoñe nye éfunga été, a été été, ane éfunga é nga kui kindik, vôm be nga ke.
Yésus a ne bidi ya ényiñ
22Bia-tyé, e nkunda bôt ô mbe ô tele e kindiʼi mañe ya yat, be nga yene na éfunga éfe é nji bo vôm ate, foʼo ve jia jia, a na Yésus baa beyéʼé bé be nji dañ éfunga jia, beyéʼé be nga ke foʼo vʼétam étam. 23Ane bifunga bife bi nga ke so e Tibériad a zu bebé a vôme bôte be nga di bidi éyoñe Nti a nga mane ve akéva. 24Eyoñe nkunda bôte wuna ô nga yene na Yésus a nji bo valé, jaʼane beyéʼé bé, ane be nga dañ e bifunga bite a ke ba jeñe Yésus e Kapernawum. 25Ayene be nga yene nye e kindiʼi mañe ya yat, ane be nga jô nye na: A Rabbi, wo te zu vana éyoñ évé? 26E nde Yésus a nga nyoñe nkobô a jô be na: E bebela, bebela émien, ma jô mia na, mia jeñe ma sake amu na mia te yene bitua bi mam, vʼamu na mia te di belet a jaé. 27Boʼan ésaé bidi, sake bidi bia ndaman, ve bidi bia tabe akekui ényiñe ya nnôm éto, bidi Mone Môt a ye ve mia, amu e nye Zambe Esaa a nga kpwele ndem. 28E nde ñhe be nga jô nye na: Bia yiane bo jé ane bia ye bo bisaé bi Zambe? 29Ane Yésus a nga yalane be na: Esaé Zambe é ne na mi buniʼi e môt Zambe a nga lôm. 30E nde be ke be nga jô nye na: Ndeme éziñ fé wo bo na bi yen a buni wo? Jé foʼo wo bo? 31Amu na bʼésaa bangan be nga di manna e fé été, avale Ntilan ô ne na: Me nga ve be belet ja so yôb na be di. 32Ane Yésus a nga jô be na: E bebela, bebela émien, ma kate mia na, sake Môze nye a nga ve mia belet ja so yôp, Esaa wom e nye a ve mia benyaa bidii ba so yôp. 33Amu na belet Zambe e nje é ne môt a so yôb a zu ve si ndôn ényiñ. 34E nde be nga jô nye na: A Nti, ke wo ve ñhe foʼo bia belet éte kom ése. 35Ane Yésus kʼa nga jô be na: Ke ma me ne belet ya ényiñ, e môt a zu be ma, aa ye wôʼô zaé, a môt a buni ma, aa ye wôʼô évé ne tya. 36Ke me nga mane kate mia, mi yene fe ma, ve mi teke buni. 37E bôte bese Tate a ve ma ba ye zu e be ma, a môt ase a zu be ma maa ye wua nye atan, 38amu me nga so yôp, sake na me bo nkômbane wom mamien, ve nkômbane môt a nga lôme ma. 39E nkômbane môt a nga lôme ma kik ô ne na, e bôte bese a nga ve ma, me bo te veʼele jañele wua ya été, ve na me wômôlô be bese e môse wo ye suʼulan. 40Amu na nkômban Esaa wom ô ne na, e môt ase a yene Mon a buni fe nye, a bi ényiñe ya melu mese, a mamien ma ye wômôlô nye e môse wo ye suʼulan. 41Beyude be nga ke ñhe ba soʼo nye amu a nga jô na: Ma me ne belet ja so yôp, 42be nga ke ba kobô na: Ye sake Yésus mone Yôsep nyô, e nye bia bebien bia kôme yem ésaa baa nyia? Ve amu jé a nga zu jô éyoñe jina na, me nga so yôp? 43E nde Yésus a nga nyoñe nkobô a jô be na: Te mia kôsa ke mia nyiñ. 44Tekeʼe ne môt éziñ a ne zu be ma nge Tate a nga lôme ma a nji zu a dutu nye, a mamien ma ye wômôlô nye e môse wo ye suʼulan. 45Amu Ntilan ô ne e bekalate bekulu mejô na: Bôte bese ba ye nyoñe ñyeʼelane Zambe. E môt ase a maneya wôʼô mame ma so be Tate a nyoñe ñyeʼelan été, môt ate nye a zu be ma. 46Môt éziñ a nji yene Tate, nga foʼo ve nyô a nga so be Zambe, e nye a nga yene Tate. 47Bebela, bebela émien, ma kate mia na, e môt a buni e nye a bili ényiñ ya nnôm éto. 48Ma me ne bidi ya ényiñ. 49Bésaa benan be nga di manna e fé été, e nde fe be nga mane wu. 50Ve belet nyuna kik é ne bidi bia so yôb na, e môt a di je a bo teke wu. 51Ma me ne vevea belet a nga so yôp; nge môt éziñ a dii belet éte, a ye bi ényiñ ya nnôm éto, e nde fe e belete ma ye ve é ne minsône miam asu ényiñe ya si nyu. 52Beyude be nga ke ñhe ba wôman e zañe jab a jô na: Aval avé môte nyô a ne ngule ya ve bia minsône mié na bi di? 53Ane Yésus a nga jô be na: Bebela, bebela émien, ma kate mia na, nge mi teke di minsône mi Mone Môt, a nyu fe metyi mé, ényiñ é se ngul ya bo be mia. 54E môt a di minsône miam a nyu fe metyi mam a bili ényiñe ya nnôm éto, a mamien ma ye wômôlô nye e môse wo ye suʼulan. 55Amu minsône miam mi ne benya bidii, a metyi mam me ne benya menyuu. 56E môt a di minsône miam a nyaʼa fe metyi mam e nye a too be ma, a ma fe me too be nye. 57Aval ane Tate a bili ényiñ a nga lôme ma, ajô te ma nyiñ amu Tate, avale te fe e môt a di ma, nye fe a ye nyiñ amu ma. 58E belete nyô é ne nyô é nga so yôp, sake aval ane nyô betate benan be nga di, be mane fe wu, e môt a di belete nyô a ye nyiñ ényiñe ya melu mese. 59E mame ma a nga kobô a yeʼeleʼe bôt aba Zambe ya Kapernawum.
Mejô ya ényiñ ya nnôm éto a Nti, bia ke be za mfe
(Hé 3:12; 4:12-13; 10:38-39; 1 Pi 2:6-9)
60Beyéʼé bé abui, éyoñe be maneya vôʼôlô nye, be nga jô na: Nkobô wu ô ne ayet; za a ne wôʼô wô? 61Eyoñe Yésus a yemeya e nleme wé été na beyéʼé ba soʼosane nye ajô te, ane a nga jô be na: Ye jame di da kolé mia ôbak? 62E nga ye ke kui aya nge mi nga ye yene Mone Môt a betek a ke yôb mfaʼa a nga taté tabe? 63Nsisime ñwô wo ve ényiñ, ve minsôn mi nji volô jôm éziñ; e mame me nga kobô mia me ne nsisim , me too fe ényiñ. 64Ve bôte bʼéziñ be ne be mia, be ne teke buni; amu Yésus a mbe a yemek aso atataʼa beza be mbe te buni a za a ye koñe nye. 65E nde a zu jô na: Ajô te ñhe me nga kate mia na, teke môt éziñ a ne zu e be ma, nge a nji nyoñe jame te ane ngab e be Tate. 66A taté éyoñ éte, beyéʼé bé bevoʼo abui be nga lume nye mvus, teke fe veʼele beta wuluu nye nsamba. 67E nde ñhe Yésus a nga jô beyéʼé awôm a bebaé na: Ye mia fe mia kômbô kôlô a ke? 68Ane Simon Pierre a nga yalane nye na: A Nti, bia ye ke e be za mfe? Ke wo ô bili mejô mʼényiñe ya nnôm éto, 69e nde fe na, mfaʼa wongan, bi maneya buni a bi yemeya na wo ô ne Mfufubu Zambe. 70Ane Yésus a nga yalane be na: Ye mamien me nji tob mia bôt awôm a bebaé? Ve, môte wua ya be mia a ne satan . 71A nga kobô ajô Yudas, mone Simon Iskariôt; amu e nye a ye koñe nye, a too fe môte wua ya beyéʼé awôm a bebaé.
Επιλέχθηκαν προς το παρόν:
YOANES 6: BULU09
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© LʼAlliance Biblique du Cameroun, 2009