LOPNA 6
6
Vilekka vi sum sa li lop sun-tapna
1Hay buur namna kayni, ki ŋaɓta vi sa hatayna ɦur kulo vokom lo vokom lo nala, sa Yudiyana sa di vun Grekŋa tun caw ŋurnay tam sa Yudiyana sa di vun Hebrena, kay boy sa duhulla visiya sum sa ɓuraw slen hay buurta kafna yisi may tun kisiɗi. 2Sa doogo yam ma'na yi dakka vi sa hatayna kaf disi ala: May ŋaa'a kay nay hin kusta vi yoboyna vi Lawn goyo kuɗ lawta vi tinɗi. 3Kay na'ta bosiyonna, vilekgi goy jargiya sumun siɗiya, sa sumun li di-goyt kisi ŋaa'a, sa hobay hiɗi Ŋusta hiɗi yalla, nay ma tunsi kay lopna kayni. 4May numa'a, numa ma vul tuwma kayni hay siɗawta, hay lopna vi yoboyna may. 5Dita kayni vi dik sa dakayna, nisi vilek Stefanus, sa ma hobay hiɗi vida hiɗi Ŋusta kaw, Filip, Prokorus, Nikanor, Timon, Permanas hiɗi Nikolas sa ma Antiokiya ma vi kuɗ vida vi Yudiyana. 6Nisi marsi vok sa Apostolayna, sa Apostolayn siɗaw kisiya, bugolda bar ɓisi kisiya may. 7Yoboyna vi Lawna ka tuɗ vokomu vokomu, ŋaɓta vi sa hatayna hay Yerusalem ka ɦur kulo ŋol suw asa, muliyan-sa-ɗifinna ŋolo hot yisi gaa kuɗ vida.
Nisi vi Stefanus
8Stefanus hobay hiɗi slugota hiɗi donota kaw, nam li slen ma gul-yalda hiɗi ɗekka ŋolo jar sumuna. 9Sara kep kep jar sa hay sinagogayna ma yum ala sinagogayna vi sa buti-goyna, hiɗi Yudiyana sa hay Sirene hiɗi sa hay Aleksandriya, sa hay Kilikiya hiɗi sa hay Asiyan kaw ci wayt hiɗi Stefanus; 10May yalda valamu hiɗi Ŋusta ma nam law hayna nisi asay a col digamɗi. 11Nisi vul gurjuta mi sumuna kay nisi ma di ala: Numa humumu, nam ka di yoboyn ma ŋulda tam Musus, tam Lawna kaw. 12Nisi zut caw sumuna, sa maariyana hiɗi sa wi-ɗota, bugolda nisi ma'a, vum hiɗi dono'o, kalam vok sa ɗiger-lawta kaw. 13Nisi cuk sa di-goyna sa sinda sa di ala: San zawni hin di ma waana tam liyn ma peldetna hiɗi gattaɗi; 14Kay numa'a humum law kay Yesu ma Nasaretna, ala nam ma ɦo liyn tani gaa'a, ala gatta ta Musus hina'ista nam ma muɗa'a kaw. 15Nisi kaf sa lakay hay ɗiger-lawta cuk irsi kalamu, nisi wi vokom (muɗi) ki vok sunda-wuralawna nala.
Επιλέχθηκαν προς το παρόν:
LOPNA 6: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001