LOPNA 5
5
Ananiyas hiɗi Safira
1May san kepe semda valamu Ananiyas, hiɗi Safira cata valamu gus sinena valam goyo, 2nam ŋra vunam hiɗi cata valamu, ŋay gal gurjut goyo, gal gurjut hena nam mara'a, tuna' gaa vok sem sa apostolayna. 3Peter dumu: Ananiyas, Satan hobaŋ dikaŋ nala a naŋ ka sin kat Ŋusta-Peldetta, kay yaw kuɗ gurjuta vi sinena ma naŋ gusum goyna kayn kay mige? 4Hay li ma nam ay hay ɓaŋu, nam may mi ma faŋŋa ɗisu? Hay li ma naŋ gusum goy gusna, gurjuta ay kayn hay ɓaŋ naŋɗi su? Naŋ var hay dikaŋ kay li lopn ki kayni nala kay mige? Naŋ ka sin kayni may tam sumunɗi, may tam Lawna. 5hay li ma Ananiyas hum kayni, nam nig gaa'a, sukam kalay goyo, sumuna sa dakayna kaf narta visi ŋolo. 6Sa joriyona yaw kulo'o, ɗutumu, tuɗum goyo, pum gaa'a kaw.
7Leer goboy ɦidi bugol kayni, cata valam kalay kalafi, may na' bay wi va ma lina tuwa. 8Peter di ta' ala: Nak danay hawtige, kayni ti gurjuta ta nigi gus sinen goy ka'ta tuta su? Na' hot dita: Awa, kayn gurju na'ta ta'. 9Nala Peter hot da' ala: Nigi ŋra vungi nala kay nem Ŋusta-Peldetta vi Bum-Sumuna kay mige? Ɗuwag sem nisi sa pi jufagŋa ka goboy vun ziyda, nisi ma ziyag nak goy kaw. 10Wulini wulini na' nig gaa selemu, mitiya kaw. Sum sa joriyona hay cukka visi ay kalafi, fa' kayni mitiya; nisi sla'a, tuɗ pa' goboy tam jufa'a. 11Narta ta ŋolda nig gaa kay sa tapna hiɗi nisi kaf sa hum slen kayni.
Sa sunda vi Yesu li ɗekka ŋolo
12Ɗekka hiɗi slen ma li sumun ɦuyum' ŋolo li jar sumuna hiɗi ɓam sa Apostolayna. Nisi kaf lakay kuɗ diɓira vi Salomon hiɗi varta ta kepta. 13Sa kep kaw ma jar sa hena ma va' talamu kay tap kuɗsiya mayɗi; may sumun ka vulsi suburta ŋolo. 14Vokŋa vi jufayna hiɗi boyna sa vi hay Lawna muɗ vokom ŋol suwa suwa. 15Nisi ziy sa moyna hay sle-ma-buura hiɗi raŋgawna, laksi hay hagata, kay hay li ma Peter ka jika, ŋusam as jik kay sa mara jarsi kaw ɗisu? 16Sumun ŋol ɦini-ɦini jaŋay hay hoyok-ziyna ma ŋuyi gal Yerusalemna pa, nisi mar sum sa moyna hiɗi sum sa ka las kay fuliyan ma liwisna, nisi kaf muɗi goy ŋaa'a.
Sa Apostolayna ka vok sa ɗiger-lawta lo. Gamaliyel
17Wulini mul ŋol ma-ɗifinna ɦidi nisi sa ay kuɗum kafe, kayn min di'e vokŋa vi sa Sadusena fokay kulo'o, hobay hiɗi hunayta, 18Nisi yaw sa Apostolayna, cuksi daŋgaya. 19May hay henjeta, sunda vi Bum-Sumuna kep mal vun daŋgayn goyo, nam cuksi goyo jiya disi ala: 20Tuɗgi hay Tempella, kusgi yoboyna vi irita kayni tam sumuna kafe. 21Hay li ma nisi hum kayni humna, hay grawt culum, nisi cuk kalaf hay Tempella, tun caw hata kaw. Mul ŋol ma-ɗifinna hiɗi nisi sa ay kuɗum kafna yi dakŋa vi sa ɗiger-lawta, hiɗi tokŋa vi sa maariyana vi gurona vi Israyel kafe, cuk sunu kay yaw sa Apostolayna ay hay daŋgayna pa.
22Sa ŋomda kaw, hay cota visiya, nisi may fisi hay daŋgaytaɗi. Nisi hotiya, disi labara ala: 23Numa fi vun daŋgayn giy ŋaa kit', sa ŋomda lakay hay liyn ma lopna visiya hay vun-ziyda kaw, may hay li ma numa mal vun-ziyd goyo, numa fi sa kalafɗi. 24Hay li ma nisi hum yoboyn kayni, mul ŋol ma ŋom Tempella hiɗi muliyan ŋulo sa-ɗifinna fi va ma di kisiɗi, job tuwsi jar-tuwsi kay lawta kayni ma muɗ mige kla nisi wiɗi. 25San kep co'o ka disi ala: Ɗuwgiya, sum sa nigi cuksi daŋgayna ka lakay hay Tempella, ka hat sumuna kaw.
26Wulini mul ma ŋomda hiɗi sa sunda tuɗa, yawsi hiɗi donotɗi, kay nisi li nar ala sumuna ma gisi hiɗi goorhoyona. 27Hay li ma nisi marsiyawa, nisi laksi vok sa ɗiger-lawta. Mul ŋol ma-ɗifinna ka jobsi ala: 28Numa telgi kay nigi hat hay semda kaynɗi, may ɗuwgiya, nigi hob Yerusalemawa hiɗi hatta vigiya, nigi min tun busuwna vi san kayni kuma'a su? 29Peter hiɗi sa Apostolayna hot dita: Numa'a hum kuɗ Lawna suw sana. 30Yesu ma nigi cum goyo hay li ma nigi ɓalam kulo kat gu-ma-grakŋa, Lawna vi sumiyaya dayam kulo'o. 31Lawna slum kulo hay galam ta jufta ki mulla hiɗi sa ma su'da, kay vul hamda hiɗi vulda-gida kay sulukŋa mi sa Israyella. 32Numa'a si sa li di-goyta kay slen kayni, Ŋusta-Peldetta nala kaw, na'a ta Lawna vula'ay mi sum sa hum kuɗumna.
33May hay li ma nisi humsi nala kayni, nisi jet tuwsi goyo, min kay cisi goyo kaw. 34Sa ma Farisena kep ma yum ala Gamaliyel, ma ŋol ma hat gatta, ma sumun pet slum yalam kulo'o, nam fok kulo jar sa ɗiger-lawta, vul hagata kay sa Apostolayna cuk goy jiy ir liyn neeɗa. 35Bugolda nam di tisi ala: Nigi sa Israyella, ligi ŋali kay va ma nigi lum tam sumun lakŋi. 36Kay liyn kalay ŋol suw asɗi, Tewdas fok kulo'o, di goy kay tuwam ala nam vane, sumun goboy ir ki kis-fiɗi nala tap kuɗumu. Nam fi cita-goyta, nisi kaf sa tap kuɗumna mer goyo, nisi vatay goy waa'a. 37Bugolom nam lo Yudas ma Galileyan fok kulo'o, kayni hay buur ma ŋaɓ sumuna, nam tap sumun kuɗumu: Nam mita, may sa tap kuɗumna kaf meray goyo. 38Wulin kayni nan digiya, sumun lakŋi nigi ma li va tisiɗi, hinsi tuɗa. La lopna kayni may vi sumuna, 39nam ma vat goyo, may la nam may vi Lawna, nigi as ɓulakam goy noŋɗi. Ligi ŋali kay nigi muɗ ki sa dur hiɗi Lawna naɗi. 40Nisi kaf tap kuɗ varta valamu, nisi yi sa Apostolayn aya, watsiya, telsi kaw kay nisi ma di goy kay sem Yesu loɗi, bugolda nisi cuksi may. 41Nisi cukay goy jiya vok sa ɗiger-lawta pa, diksi firiya, kay nisi nagay kay fi ŋulda kuɗ sem Bum-Sumuna. 42Hay buurta kaf, hay Tempella, hay ziyna kaw, nisi may hin hatta hiɗi kusta kay labara ma firina kay sem Kristu Yesu goy noŋɗi.
Επιλέχθηκαν προς το παρόν:
LOPNA 5: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001