LOPNA 4
4
1Hay li ma nisi ka kus yoboyn tam sumuna, muliyan-sa-ɗifinna hiɗi mulla vi sa ŋom Tempella hiɗi sa Sadusena ma'a, 2nisi muɗ ɦiy ŋolo kay hatta ma nisi ka hat sumuna kay Yesu, kay di-goyta ma nisi ka li'e kay dayta-kulota vi Yesu jar sa mitin pa kaw. 3Nisi yawsiya, cuksi daŋgaya ta-ta goy jifini, kay hay na'ta kayni liyn ay vulatiya. 4May hiɗi kayn kaf sumun ŋolo jar sa hum yoboyna vi'e, ŋaɓta vi sumuna co kulo goboy birim vasl.
Peter hiɗi Yohana vok sa ɗiger-lawta
5Hay buurta ka'ta, sa ŋulona visiya hiɗi sa maariyana hiɗi sa wi-ɗota tok tuwsi hay Yerusalem, 6hiɗi Anas mul ŋol ma-ɗifinna, Kayfas hiɗi Yohana, Aleksander hiɗi sa hay jafna vi mul ŋol ma-ɗifinna kafe. 7Nisi lak Peter hiɗi Yohana voksiya, ka jobsi ala: Nigi li slen namna kayni hiɗi donota mige lebo hiɗi sem gige? 8Peter hobay hiɗi Ŋusta-Peldetta, nam di tisi ala: 9Nigi sa ŋulona vi sumuna hiɗi sa maariyana vi Israyel, la vaydi numa fi jobta vok irgiya kay va ma ŋaana ma li ay tam sa ma moyna, kay va ma nam fi ŋaata hiɗi namna kaw, 10nigi kaf humgi goy ŋaa'a, nigi sumuna vi Israyel kaf kaw! San zawni muɗi goy ŋaa'a, coli vok irgi tani kaw kayni hay semda vi Yesu Kristu ma Nasaretna, ma nigi ɓalam kat gu-ma-grakŋa, ma Lawna dayam kulo'o jar sa mitin pana. 11Nam mi
Hiɗiyna ma, nigi sa in ziyna gum goyna,
may nam muɗawa goy mi hiɗiyna
ma ŋolla hay gef-ziyna.#4:11 Fi kayni hay Es 28:16; Nul 118:22; Mat 21:42.
12Su'da ka hay sa maraɗi, kay gaa kuɗ dukalawn kayni, semda tara'a ta vuli jar sumuna ta nay fi su'da haya'a tayɗi.
13Hay li ma nisi wi kursulita vi Peter hiɗi Yohana, nisi muɗi ɦuyum', kay humsi ka gisi lo ala sumun lakŋi, nisi ka hay vokŋa vi sum sa bay-hatta. May nisi wi goy haraŋ ala sumuna lakŋi ay hiɗi Yesu. 14Lo hay li ma nisi wi san ma muɗi goy ŋaana colay tisi zaw, nisi fi va kay di loɗi. 15Nisi di tisi kay nisi ma cuk goy jiya tam sa ɗiger-lawta pa; nisi ŋra vunsiya di'e: Sumun yawni nay ma lum tisin mige? 16Kay ɗekka ma nisi lumna ka goy haraŋ vok ir sumuna kaf sa ka hay Yerusalem, nay kaw ma puw vunay kay kaynɗi. 17May kay a lawta kayni jok goy jar sumun suwɗina, nay ma lawsi hiɗi dono'o kay nisi ma kus yoboyn kay sem san kayni mi sa mara loɗi.
18Bugolda hay li ma nisi yisi yina, nisi gatsiya kay nisi ma kus yoboyna hay sem Yesu loɗi, hat kay semda valamɗi kaw. 19May Peter hiɗi Yohana hotsi dit ala: Vargi kigi hawtige! Kay hum kuɗgi suw humda kuɗ Lawna kayni kir Lawna hay liyam su? 20Vargi tige! Va ma numa wi'e, humi kaw, a kus kalamɗi kayni, as a liɗi. 21nisi lawsi ŋolo ŋolo, hinsi tuɗa kaw, kay nisi fi joot kisiya kay ka kitat kisiɗi, kay sumun pet ka subur Lawna kay va ma lina, 22kay sana ma ɗekka li talamu, ma muɗi goy ŋaana kaw kayni busata valam as suw dok-fiɗi.
23Hay li ma nisi cukay goy cana, nisi tuɗ tam sa fisina disi kay slen ma muliyan ŋulo sa-ɗifinna hiɗi sa maariyana dum tisina. 24Hay li ma nisi hum kayni, nisi tap varta visi kep, siwel tam Lawna di'e: Bum-Sumuna, naŋ ma li wuralawna, li nagata, li niy-lum ma ŋulona hiɗi slen ma hayamna kaf kaw, 25naŋ law hiɗi Ŋusta-Peldetta hay vun buma David sa ma sunda vaŋu ala:
Jaf-sumuna ɦiwir kulo kayn kay mige?
Sumun kaw varta visi kayn waa'a ɦawa nala su?
26Muliyana sa kay nagatna yawawa kulo'o,
sa ŋulona tap yam-tuwsiyawa kat Bum-sumuna,
hiɗi ma mul ɦokay kalamna valamu.#4:26 Fi kayni hay Nul 2:1-2.
27Kay hay gasita, nisi tok tuwsiya kay sunda vaŋ ma peldetna Yesu, ma naŋ ɦokom mul kalamna, Herod hiɗi Pontus Pilatus ŋra vunsi kalam hay hoyok-ziyn tani, hiɗi jaf-sumuna, hiɗi sum sa Israyel kaw, 28kay li mige kaf ma ɓaŋu hiɗi varta vaŋu colay ala slen kayni ma li ki kayn nala. 29Wulin kayni Bum-sumuna, tun ŋalda vaŋ kay joot ta nisi min la' tuma'a, vulaŋ kursulita mi sa sunda vaŋu kay nisi ma kus yoboyn hiɗi donota: 30Meɗaŋ ɓaŋ goyo kay yerta-goyta ma li'e, ɗekka hiɗi slen ma li kuɗ gul-yalda ma li hay semda vi sa ma sunda vaŋu Yesu. 31Hay li ma nisi vat hiɗi siɗawta vatna, liyn ma nisi lakay hayamna wira; nisi kaf hob hiɗi Ŋusta-Peldetta, nala nisi tun caw kus yoboyna vi Lawna hiɗi kursuliya.
Vokŋa vi sa viyna
32Vokŋa vi sa viyna diksi tapay kepe, ciwta visi kepe kaw. Sa mara ma di kay slena valam ala kayn fan nanna mayɗi. May slen lakay kisi jarsi dar kep. 33Sa apostolayna ka li di-goyta hiɗi donot ŋolo kay dayta-kulota vi Bum-Sumuna Yesu, slugota ŋolo mus kisi kaf. 34Kay jarsiya, sa mara ma di ala va valam ma nam ŋom ŋil tuwam hiɗi nam mayɗi may jarsiɗi; kay nisi kaf ka hiɗi sinena hiɗi ziyna gusum goyo, mar gurjuta vi va ma gusi goyniya, 35tunum gaa vok sem sa apostolayna, nisi ɓurawam goy tam sumuna kuɗ asta vi va ma san gigekaw mina mina. 36Yosef ma sa Apostolayn kaam gileta valam ala Barnabas, ma ɗek goy ala goora vi teŋ-irta, sa ma Levitna, ma vuɗi kaw hay Kiprus, 37ma sinena valam ka'a, nam gusumay goyo, nam mar gurjuta tuna' gaa vok gay sa Apostolayna kaw.
Επιλέχθηκαν προς το παρόν:
LOPNA 4: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001