LOPNA 7
7
Ɓakŋa vi Stefanus
1Wulini mul ŋol ma-ɗifinna ka di ala: Slen kayni ka hay liyam nala su? 2Stefanus hot dit ala: Ɓosiyonna hiɗi sumiyanu, humgiya! Lawna ma gajijita vul tuwam kir Abraham buya, hay li ma nam ay hay Mesopotamiya, jew a nam mus hay Haran; 3nam dum ala: Kalaŋay goy hay nagata hiɗi jafna vaŋu, tuɗaŋ hay nagata ta nan ma ɗekaŋ ka'ta.#7:3 Ɗuw hay Ct 12:1. 4Nam kalay goy hay nagata vi sa Kaldeen pa tuɗ mus hay Haran. Goy ɗawni hay li ma bulum mitawa, Lawna kalam hay nagat ta nigi ka haya' vaydit lakŋi. 5Nam vulum vocota hay nagat na'taɗi, va ma ne' ma nam tun selem kalam mayɗi, may nam di goy ala nam ma vula' malamu, vula' mi jafna valam vokom ɗaw kaw, hay li namna goor valam may tuwaɗi. May Lawna di ala: 6Jafna vaŋu ma lak hay nagat tara'a, nisi ma yawsi gorvo'o, ma lisi lasi kaw hay busat kis-fiɗi. 7May jaf-sum sa lisi gorvon ɗawni, ka kitat kisin mi nanu, din mi Lawna, bugol kayni nisi ma kalay goyo, ma girifan hay liyn tani.#7:7 Ɗuw hay Ct 15:13-14; Kg 12:40. 8Bugolda Lawna vulum bonota vi ka-gosayta; nala hay li ma Abraham vuɗ Isaak, kaam gosay hay buurta glafandita; Isaak li tam Yakub nala, Yakub li tam sumiyaya sa doogo yam ma'na nala kaw.
9Sumiyaya li hunay tam Yosef, nisi gusum goyo kay sumun ma kalam hay Egipte. 10May Lawna ay hiɗi namu, suɗum goy hay zumalda valam kaf; nam vulum slugota hiɗi yalda vok Farawn, mul ma Egipte, nam musum guverner kay Egipte, kay ziyna valam kaf kaw. 11Mayta nig kay nagata Egipte kaf, hiɗi Kanaan kaw, zumalda na'ta ay ŋolo, sumiyay muɗ fi va ma tiɗi. 12Hay li ma Yakub hum ala alkamarena ka hay Egipte, nam cuk sumiyay ɗawni sem ma jewna. 13hay sem ma ma'na Yosef ɗek tuwam goy kir ɓosiyomna, jafna vi Yosef Farawn wum kaw. 14Bugolda Yosef gi suni kay vum bulum Yakub hiɗi jafna valam kaf aysa, nisi ay dok-siɗiya yam vasl.#7:14 Hay Ct 46:27 nisi ay dok-siɗiya, hay Kg 1:5 nisi ay dok-siɗiya, jafna vi Yosef may hayɗi. 15Yakub kalay hay Egipte, nam mitiya, sumiyay nala kaw; 16Sumun tuɗsi hay Sikem, laksi hay zulda ta Abraham gusa' hiɗi gurjuta, hay ɓam gurona vi Hamor, hay Sikem.
17May liyna ma dita ta Lawna da' mi Abraham vuna' hob kulon coowa kayni, sumun biya ŋolo, li ŋolo hay Egipte kaw, 18ta-ta hay li ma mul mara ma wi Yosefɗi fok kulo'o, mus mul hay Egipte. 19Mul namna kayni, hiɗi dikga ma joona tam jafna vaya, sumiyaya nam lassi ŋolo, ta-ta nisi hin gurosguray sa vuɗi wulin goyo, kay nisi ma lak iriɗi. 20Hay liy namna Musus vuɗa, nam ay jifiy ŋolo vok ir Lawna, nisi vulum tina hay ziyna vi bulumu ir til ɦidi; 21hay li ma nisi ŋayam goyo, goota vi Farawn slumu, wulum ki goora va' nala. 22Musus hat yalla vi sa Egipten kaf, nam ay dono'o hay dita hiɗi lopna kaw. 23Hay li ma busata valamu li dok-fiɗi, varta kal hay dikamu kay ɗuw ɓosiyomna, gurona vi Israyel. 24Hay li ma nam wi kep ma ka fi lasta, nam gut kalamu, jobom yalamu hay li ma nam ci sa ma Egipten goyo. 25Nam varay ala ɓosiyomna ma hum ala Lawna suɗsi goy ɗawn hiɗi ɓalamu, may varta visi mun kay kaynɗi. 26Hay buurta ka'ta, hay li ma nisi sara ka ci tuwsiya, nam co jarsiya, gar kay mar sle'ta jarsiya, disi ala nigiya, nigin si ɓosiyom-tuwgina, nigi las tuwgi jar-tuwgi kay mige? 27May nam ma ka las ɓasulumna zut Musus, ka dum ala: Ma tunaŋ mulla kay ka kitata kuma'an kayn mi gige? 28Naŋ min can goyo ki naŋ ci sa ma Egipten goy kamata nala su?#7:28 Ɗuw kayni hay Kg 2:14. 29Kuɗ dit kayni Musus pir goyo, nam kal mus hay nagata Madiyan, ɗawni nam vuɗ guron ma'.
30Busat dok-fiɗi bugolda, sunda-wuralawna vul tuwam kiram hay sin-kuta vi gu-zigiyna ma ka ŋala hay fulda vi Sinay. 31Hay li ma Musus wi kayni, nam viy goy diwiŋ' kay va ma vul tuwam kiramna, ki nam ka teray goboy kay saramu, del Bum-sumuna ka law goy ala: 32Nan mi Lawna vi sumiyaŋu, Lawna vi Abraham, Lawna vi Isaak, Lawna vi Yakub. Musus tuwam muɗ jiriyim bat-bat', nam fi liyna kay ɗuw noŋɗi kaw. 33Bum-sumuna di talam ala: Pataŋ tuguruna goy seŋu, kay liyn ma naŋ colay hayn zawni ti nagata ta peldetta. 34Nan wi tuw-tita vi sumuna vanu sa ka hay Egiptenawa goy ŋaa'a, nan hum tiyta visiyawa, nan jikiyawa gaa'a kay butsi goyo. Naŋaya, nan min gaŋ wulini hay Egipte.#7:34 Ɗuw hay Kg 3:5-10.
35Musus namna ma nisi noyom goyo, di kaw ala: Ma tunaŋ kay ka kitata kuma'an gige kayni, mi namu ma Lawna gumu ki mulla nala, ki ma butsi goyna nala kaw, hiɗi gutda vi sunda-wuralawna ma vul tuwam kiramu hay gu-zigiyna. 36Kayni mi nam ma kalsiyay goyo, hay li ma nam li slen ma gul-yalda hiɗi ɗekka hay nagata vi Egipte, hay niy-lumna ma slawna, hay fulda kaw, ir busata dok-fiɗi. 37Kayni mi Musus namna ma di tam gurona vi Israyel ala: Lawna ma fok sa ma jobta-Lawna ki nan nala kulo jargi pa. 38Mi namu ma ay hay tokŋa hay fulda, ay hiɗi sunda-wuralawna ma law hiɗi namu kay hiɗiyta Sinay, hiɗi sumiyaya kaw, nam fi yoboyna ma irina kay vulgita. 39Sumiyay may hot yisi gaa kuɗumɗi, may zutum goyo, muɗ diksi tam Egipte hay'. 40Nisi di tam Aaron ala: Naŋ kotma lawayna ma tuɗ vokma'a; kay Musus nam ma kalma'ay goy hay nagata Egipte pa, numa'a may wi va ma li talamnaɗi.#7:40 Ɗuw hay Kg 32:1. 41Hay buur namna, nisi kot goor-putna; nisi mar ɗifinna vok lawayn ma waana, li firi kuɗ lopna vi ɓisiya kaw. 42Nala Lawna muɗ iram goy tisiya, vulsi goy hay girifta vi mislekŋa ma dukalawna, ki ɗoy hay ɗerwelda vi sa jobta-Lawna nala:
Jafna vi Israyel, nigi ŋatan farayna,
lan ɗifini kaw hay busat dok-fiɗi hay fulda su?
43May nigi ziyim kayni mi guɗukŋa vi Molok
hiɗi mislekŋa vi lawayna vi Romfa
sle ma sli tuw sana nigi lumawa kay girifimu.
Nan min yawgi goy gorvo gine hiɗi Babilon.#7:43 Fi kayni hay Am 5:25-27.
44Sumiyaya guɗukŋa ma di-goyna ay kisi hay fulda, ki nam di tam Musus, vulum hagata kaw kay nam ma kot guɗukŋa ki ma nam wumna nala. 45Hay li ma sumiyay fumawa, sumiyaya hiɗi Yosuwa tuɗum hay nagata ta Lawna digiɗ jaf-sumun goy voksi haya'ta, nam mus ɗawni ta-ta hay buura vi David. 46Nam fi slugota vok ir Lawna, nam joba kay fi liyn ma musta kay jafna vi Yakub. 47May inim ziyd kayni mi Salomon. 48May ma Kulo-Jamna may mus hay va ma koti hiɗi ɓam sanɗi, ki sa ma jobta-Lawna di nala:
49Dukalawna mi zlamda-mulda vanu,
Nagata mi va ma nan tun wur-sen kalamna,
Ziyda ta nigi inantit ti ziy mige?
Din mi Bum-sumuna.
Lebo liyn ma nan ma tun sukan hayn ɗawn arige?
50Slen kaf kayn may lum mi ɓanɗi su?#7:50 Fi kayni hay Es 66:1-2; Heb 3:4.
51Nigi sum sa yigi ɗeŋŋa, sa bay ka gosay hay dikgiya hiɗi humgiya! Nigi sa dok-dok varta vigi may col kuɗ Ŋusta-Peldettaɗi, nigi li ŋray ca ki sumaygi nala. 52Sa ma jobta-Lawna ma sumaygi lum lasɗin gige? Sa li di-goyta goy voksiya kay mata vi ma Ɗigera nigi cisi goyo, nigi kaw muɗi si sa ci-matna wulini hay li ma nigi di newta kalamu, 53Nigi sa fi gatta kuɗ hagata vi sunda-wuralawna, may nigi may li kuɗumɗi!
Nisi gi Stefanus hiɗi goorhoyona
54hay li ma nisi hum kayni, diksi tisi ŋolo, nisi mut siysi katalamu. 55May Stefanus hobay hiɗi Ŋusta-Peldetta, ɗuw iram kulo'o hay wuralawna, nam wi gajijita vi Lawna, wi Yesu kaw colay kulo hay gal ɓam ta jufta vi Lawna. 56Nam di ala: Ɗuwgiya, nan wi dukalawna goy maliya, goora vi sana ka colay hay gal ɓam ta jufta vi Lawna kaw. 57Nisi siwel hiɗi delsi kulo'o, duk ɓisi humsiya, mun jaŋ kalam giti-giti', 58nisi digiɗim goy hay hoyok-ziyna, gum hiɗi goorhoyona kaw. Sa di-goyna tun sligara visi gaa gay sa ma joriyona ma yum ala Saulus. 59Nisi gi Stefanus hiɗi goorhoyona, nam siɗawa di ala: Bum-sumuna Yesu, naŋ ma vi ŋusta vanisa. 60Bugolda nam girif gaa'a siwel hiɗi delem kulo'o di ala: Bum-sumuna, naŋ ma tun sulukŋ kayni kisiɗi. Hay li ma nam di kayni dina, nam kalay sene.
Επιλέχθηκαν προς το παρόν:
LOPNA 7: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001