LOPNA 3
3
Yerta-goyta vi sa ma hurɓulina, ɓakŋa vi Peter
1Peter hiɗi Yohana kalay kulo hay Tempella, hay leera vi siɗawta, kayni mi leer ma zleeŋena.#3:1 Leer ma zleeŋena kayni hay leer 3 hay ŋarfatta, kay leer ma kepna visi tun caw hiɗi leer 6 graw culumta. 2May sumun sli sa ma vuɗi dirlaya, ziyimu, maram burum hay vun-ziyda vi Tempella ma yum «ma jifiyna», kay nam siɗaw slena kay sumun sa cuk hay Tempella. 3Hay li ma nam wi Peter hiɗi Yohana ka cuk kalafi, nam jobsi va ma vulda. 4Peter hiɗi Yohana cuk irsi kalam ŋiresl dum ala: Naŋ ɗuwma'aya. 5Nam ka ɗuwsiya hay varta ta ala nam ma fi va hay ɓisi pa. 6May Peter dum ala: Gurjuta hiɗi ora may kanɗi, may va ma ka kanu nan vulaŋga: Hay sem Yesu Kristu ma Nasaretna, fokaŋ kulo'o tuɗaŋu! 7Nam vum kulo hiɗi ɓalam ta jufta colom kulo'o, selemu hiɗi hornay selemu fi donot wulini wulini. 8Nam fok kulo ɦod', tun caw tuɗa kaw. Nam kal kalaf hiɗi nisi hay Tempella, ɦal kulo'o, subur Lawna kaw. 9Sumun kaf wum nam ka tuɗa, nisi subur Lawna kaw. 10Irsi munawa talamu, kayni mi nam ma ay musi gal vun-ziyda ta jifiyta vi Tempella kay job va-vulda, sumun muɗ ɦuyum', lak ɦuŋgur' kay va ma li ay talamu.
11Ki nam ay hebay kulo tam Peter hiɗi Yohana goboyo, sumuna pet jaŋay tisiya kuɗ diɓira ma yum diɓira vi Salomon, sumun ka muɗi ɦuyum'. 12Hay li ma Peter wi kayni, nam ka di tam sumun ala: nigi sum sa Israyella, nigi muɗ ɦuyum' kay lawta kayni kay mige? Nigi cuk irgi kuma'a ki san muɗ goy tuɗ kayn kuɗ gaŋeraŋa vuma'a lebo ɗigerta vuma'a nala kay mige? 13Lawna vi Abraham, vi Isaak, vi Yakub, Lawna vi sumiyaya vul gajijita mi sa ma sunda valamu Yesu, nam ma nigi di newt kalamna, vulum goy vok Pilatus ma var kay gumu. 14May nigiya, nigi so'ot varta vigi kay ma peldetna hiɗi ma ɗigera. Nigi job hay baŋalam a vulgitin mi sa ma ci matna.#3:14 Ɗuw Mat 27:20-21. 15Nigi ci mulla vi iritawa goyo, namu Lawna dayam kulo'o jar sa mitina pa; numa'a wi slen kayni hiɗi irma'a. 16Hiɗi vida hay semda valamu, ma nam muɗ san zawnawa goy dono'o, nam ma nigi ka ɗuwumu, wumu kaw; nam fi ŋaatawa vok irgi tani kaf kuɗ vida ta kuɗ Yesuta.
17May wulini ɓosiyonna, nan wi ala nigi li kayni kuɗ bay-wida vigiya, sa ŋulona vigi nala kaw. 18May slen ma Lawna di goy jewe hay vun sa jobta-Lawna kaf, slen ma ala Kristu ma fi lastana vunam hobawa kulo'o,#3:18 Ɗuw hay Es 53. 19Kay na'ta hamgiya, muɗgiya, kay sulukŋa vigiya ma fi ɦasta-goyta, 20kay liyn ma sleɗayna fi may vok Bum-Sumuna pa, kay nam ma gi nam ma vuli goy tigina aya, Kristu Yesu. 21Nam ma wuralawna ma vumu ta-ta hay li ma slen ma Lawna di goy kalam jewe hay vun sa peldetna hiɗi sa jobta-Lawna kotawa hay liyamu. 22Musus di ala: Bum-sumuna Lawna vigiya ma fok sa ma jobta-Lawna ki nan nala kulo jar ɓosiyogina, nigi ma hum kuɗum hay slen ma nam digitna pet.#3:22 Ɗuw Gsm 18:18-19. 23May sa ma hum kuɗ dita vi sa ma jobta-Lawnɗi, nam ma fi cita-goyta jar sumuna. 24Sa jobta-Lawna kaf sa lawa, tun caw tam Samuel pa hiɗi sa bugolomna kaf kaw, nisi di goy kay buura kayni. 25Nigi kayni si gurona vi sa jobta-Lawna ɦidi gurona vi bonota wulita ta Lawna juna' hiɗi sumiyaya, hay li ma nam di tam Abraham ala: Goy hay jafna vaŋ pa, jafna ma kay nagatna kaf ma fi bolda.#3:25 Ɗuw hay Ct 22:18. 26Lawna gi sunda valamay jew kayn tigi nigiya, hay li ma nam fokom kulo fokŋa, gumay kay nam ma gigi bolo, a muɗ gige gige jargiya goy hay jiw-zlata valamu valamu.
Επιλέχθηκαν προς το παρόν:
LOPNA 3: Massana
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
BIBALDA TA PELDETTA © L'Alliance Biblique du Cameroun, 2001