Luk 22
22
Mizli migam gidiɓi ar Yesu
(Yo pura Mat 26.1-5; Mark 14.1-2; Zaŋ 11.45-53)
1Muguzlum mazumam di ɗaf manja is ara mazilaka muguzlum Pak na, naŋ gweˀe. 2Masay madiɗahay ati buy ngi ɓimujuwahay a puram jiviɗ ɓa a zizaka Yesu, amma ara zluwunam ti mizli.
Yudas muwuɗ vula Yesu da masay madiɗahay ɓa a jakaŋ
(Yo pura Mat 26.14-16; Mark 14.10-11)
3Dar Satan a ci a hur Yudas mazilaka Iskariyoto, naŋ i mbur ngi wuzla mizli ngi si Yesu mukuruˀ nga cuwoy na. 4Joˀ ara luuma masay madiɗahay ati buy ngi mijigina hay ngi Bumbulvuŋhoyo, ɓa a ngilam wuy ar wer ngi vula taŋ Yesu, ɓa a jakaŋ. 5Taŋ a mumulom haɗi teˀe, a ɓakaŋ ɓa a sa vulakaŋ dala. 6Yudas a ngum le, a pur jiviɗ mutuwaˀ ta, ɓa ngi vula taŋ Yesu manja mizli a sinakaŋ.
Yesu miɓi ɓa a ɗiyam gwatay ngi zuma ɗaf ngi muguzlum Pak
(Yo pura Mat 26.17-25; Mark 14.12-21; Zaŋ 13.21-30)
7Hin mazumam di ɗaf manja is a ndilo le, ɓa a kiɗaka tumuŋ ngi muguzlum Paka. 8Joˀ Yesu a slina Piyer ati Zaŋ, a ɓa taŋ: «A ra ɗiyam ndra gwat ngi muguzlum Paka, ɓa i sa zumakaŋ.» 9A cufuɗakaŋ: «Ki wuɗ ɓa i ra ɗiyaka a maka?» 10A mbiɗa taŋ di: «Ti kum masa cam ng'ar walahay na, kisa zliram ti mbur maru ti yam ti kukulum. Sipaka sesẽŋ angi hay naŋ masa ci anga na. 11Ki sa ɓaka buy ngi haya na: ‹Kumani a ɓi na: Viŋ, ya masa zuma ɗaf ngi muguzlum Pak anga ati mizli ngi si yahay na, naŋ a maka?› 12Naŋ a sa bugukum hay mijirngasl a hirnga cala mikiɓiŋ kiɓiŋ, miɗiya le kuy kuy. Ki sa ɗiyaka gwatay a diga so.»
13Taŋ a ram, a lumaka gwataya gar kaɓa Yesu miɓa taŋ di, a ɗiyaka gwat ngi zuma ɗaf ngi muguzlum Paka.
Ɗaf ngi Buy Yesu muvula
(Yo pura Mat 26.26-30; Mark 14.22-26; 1 Kor 11.23-25)
14Yo ti pas ngi zuma gwat migi na, Yesu ati mislin naŋhay a cifam le jojoˀ ɓa a zumam gwat. 15Dar a ɓa taŋ: «Yi wuɗ zuma ɗaf ngi muguzlum Pak hana le haɗi teˀ ati kumo dumbuŋ angi ya masa si bonoyo. 16Yi ɓukum di gisiŋ: y'anta sa zum mata wãˀ, hã tapas Buymisemuŋ masa vula angi Zumabuy naŋ.» 17Dar a zuɓa sikiɗ misi ti mbaazla, a ga sise da Buymisemuŋ, a dirba nah, a ɓi: «Ani, tiɓaka, saka gar kumo. 18Asi yi ɓukum na: Zle dana, y'anta sa si yam ngi yi ngi gudubuno mata, hã Zumabuy ngi Buymisemuŋ misa so le.»
19Joˀ a zuɓa ɗaf, a ga sise da Bumbulvuŋ, a dirba nah, a ngilaŋ, a vula taŋ di, a ɓi: «Hana i dumvu ɗu muvula vur kum. Gaka kahana ti wuluk ar ya.»
20A dirba ɗafa, a zuɓa sikiɗ misi ti mbaazla araŋ, a vula taŋ di kanah ma, a ɓi: «Mbaazla hana, i jumoˀay nawaya ar pumbus ɗu mipi vur kum. 21Amma puraka, mbur masa vuliy da mizli ɓa a jikiy na, ara zum ɗaf ati ya aka! 22Mangal ngi mburo, a sa cuh kaɓa muɗuvaka ɓi naŋ zleˀe ɓula, amma mbur mavulaŋ ɓa a jakaŋ na, kay, naŋ ar bonoy!» 23Dar misliney a cufuɗam vu ar wala taŋ: «Mbur masa ga gwat kahana asi ndra, i waka?»
Madiɗa mifineˀ mizli mekelemey i waka?
24Yo mizli ngi si Yesuhoy ara tiram ar wala taŋ, zliv madiɗa mifineˀ taŋ, i waka? 25Dar Yesu a ɓa taŋ: «Sukwi ngi mizli gar, buy madiɗa taŋhay ara waka taŋ, yo mizli madiɗa taŋhay a wuɗam anja a zilaka taŋ mizli mezlehey. 26Amma a wuzla kumo, kanah ta. Mbur madiɗa a wuzla kumo, sey a tiri kaɓa meciɗek kum. Yo mbur mawi mizli kwana, anja a tiri ka gawla ngi mbur. 27Naŋ kine, mbur mujoˀ mazum gwat waɗ mbur masaŋ di na, madiɗa asi taŋ, i waka? I mbur mujoˀ mazum ti zum na takwa? Amma ya a wuzla kumo kaɓa gawla ngi mbur. 28Kumo, ki cicam le zlak ati ya ar bonoy ɗuwoyo. 29Yo ya i ra ɗiya li Zumabuy vur kumo kaɓa Baha miɗiyiy di da ya na ya. 30Naŋ kine, kisa zumam gwat, kisa sam gwat ar Zumabuy ɗu, yo kisa cifam ar janga ngi buyoy ɓa ngi ga kiita da sukwi ngi Israyeley mitaˀ taˀ kuruˀ nga cuw na.»
Yesu miɓa ɓi ngi Piyer masa ɓi, a sinaŋ ta
(Yo pura Mat 26.31-35; Mark 14.27-31; Zaŋ 13.36-38)
31Buy Yesu a ɓi: «Simoŋ, Simoŋ! Satan a cufuɗ le ɓa a kufukum kaɓa makufam daw. 32Amma ya, yi dir dibiɗ le vur ka ɓa tiɓi ɗik, a susuyum ta. Amma ka, ti ka misa mo le ng'avi ya na, vula gidaŋ da sukum ɗikeye.» 33Piyer a ɓaŋ: «Buy, ko ar dangay, ko ar muc kwana, yi juw vu le ɓa i ram cuwa.» 34Yesu a ɓaŋ: «Piyer, i ɓuw na, ɓa hã kucukur a sa ji ˀay na, naɓa ki ɓi le, ki siniy ta, ki siniy ta, ˀis makir si.»
Birtete, gabal waɗ maslalam
35Yo Yesu a ɓa taŋ: «Ti ya mislinukum manja birtete, manja gabal, yo manja tarak a sar na, gwat a kicukum le kwa?» A mbiɗakaŋ di: «Ko gwat mikica ndr'anta.» 36Dar a ɓa taŋ: «Amma wurenna so na, mbur misi ti birtete, anja aru di a haŋ, mbur misi ti gabal ngi jiɗeˀ kwana, kanah ya. Yo mbur manja maslalam na, anja a hiɗika godo naŋ avra ɓa a hiɗik pal. 37Asi yi ɓukum na: Ɓimutoho miɓi: ‹A slufakaŋ le a wuzla mizli mufuyovuhoy› na, anja a gi wãˀ ar ya. Naŋ kine, ɓi mutohoko vur ya na, a sa gi muduba.» 38Mizli ngi seˀehey a mbiɗakaŋ di: «Buy, maslalamay ani cuw.» A mbiɗa taŋ di: «Muk so.»
Yesu midir dibiɗ a muwã Tutumbur
(Yo pura Mat 26.36-46; Mark 14.32-42)
39Dar Yesu a bi, aru nga muwã Tutumbur kaɓa naŋ maga hõyyõ. Mizli ngi seˀehey kwana, a sipakaŋ. 40Ti taŋ mindilam ar li nah na, a ɓa taŋ: «Diram dibiɗ ɓa ki ndilam ar tikin ta.» 41Dar a kirih baˀ neˀ avu taŋ, zliv a gi ɗugur fuk gu. A huruk huruk a ruwuy, a dir dibiɗ. 42A ɓi: «Baha, da ki ngum na, kiraha sikiɗ ngi bonoy hana kileŋ avu ya. Amma anja a gi ka ya muwuɗ ta ɓula, sey kaɓa ka mawuɗo.» 43Dar modro ngi Buymisemuŋ a so paɗ a muŋ ɓa a vulaŋ gidaŋ. 44Didak a muɗaŋ haɗi, a dir dibiɗ ti gidaŋ fineˀ misi zleˀe. Lihriɓ naŋ a tiri kaɓa pumbus miji le, magic nga ruwuy. 45A dirba naŋ midir dibiɗe, a slikiɗi, a mo ng'avi mizli ngi seˀehey tuwa ma. A luuma taŋ, a hinjam le, asi ara likam haɗa. 46A ɓa taŋ: «Ki hinjam mike? Slikiɗam, diram dibiɗ, ɓa ki ndilam ar tikin ta.»
Mijaka Yesu
(Yo pura Mat 26.47-56; Mark 14.43-50; Zaŋ 18.3-11)
47Ti Yesu mira ɓi aruŋ na, zigiduw a ndilawa. I Yudas, mbur ngi wuzla mizli ngi seˀe mukuruˀ nga cuwoy vuna tehhe muko taŋ mbuŋ. A kiroho ng'avu Yesu, ɓa a jaŋ kuɓuy. 48Amma Yesu a ɓaŋ: «Ki ja Mangal ngi mburo kuɓuy ɓa ki vulaŋ da mizli, ɓa a jakaŋ sukwa Yudas?» 49Mizli misi ati Yesuhoy, mugun hirnga naŋ, mupuraka gwat mawuɗ a gi kanah na, a ɓakaŋ: «Buy, i ngumaka taŋ ti maslalam kwa?» 50Mbur pal asi taŋ a nguma gawla ngi masay madiɗa migi mikuli a mbuŋ Buymisemuŋ, a bukoŋ slimiɗ vay hazumo krac avra. 51Amma Yesu a ɓa taŋ: «Pulaka, muk si.» Joˀ a wusa slimiɗ ngi mbur tuwa, a kufaŋ di ngbaˀ ar li naŋ a muŋ.
52Mizli musoko nga ji naŋ tapasa na, i masay madiɗahay ati madiɗa ngi mijigina hay ngi Bumbulvuŋhoy waɗ mizli micawwahay. Yesu a ɓa taŋ: «Ki soko nga ji ɗu ti maslalamay ati gandayay kaw kaw a haŋ ka yi mufuyovu mbrike? 53Vur hin gar na, y'ada ati kum ar hay ngi Bumbulvuŋ a Zeruzaleme, ko ki jikiy ta. Amma wurenna, pas kum a gi le, i gidaŋ ngir luvuŋ muduba.»
Piyer miɓi a si na Yesu ta
(Yo pura Mat 26.57-58,69-75; Mark 14.53-54,66-72; Zaŋ 18.12-18,25-27)
54Dar a jaka Yesu, a ram di ngi hay masay madiɗa. Piyer ara sipa kileŋ neˀ. 55Mizli a bulam vu le a wazlaraya, ara naˀakaŋ. Piyer a cifi le a wuzla taŋ ya. 56Zuŋ diili migi slra ngi hay a pura Piyer muaciki vu tuwa cum cum, dar a ɓi: «Mbur hana, naŋ zleˀe ati Yesu vuna ya!» 57Amma Piyer a ji mi, a ɓi: «Ngwasa, yi si na mbur nah ta.» 58Neˀ a dirba nah ma na, mbur mekelem a puraŋ, a ɓaŋ: «Ka kwana, ki ngi wuzla taŋ aya!» Amma Piyer a mbiɗaŋ di: «Ĩˀĩ, y'anta a wuzla taŋ ta.» 59Gwat ngi ler pal a dirba nah ma na, mbur mekelem a hurdum di, a ɓi: «Ko mbri na, mbur hana, naŋ zleˀe ati naŋ, asi i mbur Galile.» 60Amma Piyer a mbiɗaŋ di: «Way ɗu, da ki wuɗ ki ɓi mbrike na, yi si na ta.» Hirak ti naŋ mira ɓi aruŋ vuna si na, kucukur a ji ˀay. 61Buy Yesu a mbuɗo hiri, a pura Piyer tuwa cum cum. Piyer a wuluk keŋ ar ɓi ngi Buy Yesu miɓaŋ di zleˀe tuwa: «Ɓa hã kucukur a sa ji ˀay dana tikeˀe na, naɓa ki ɓi le, ki siniy ta, ki siniy ta, is makir si.» 62Dar Piyer a bi ng'avra, a tuwuy ˀirslik ˀirslik.
A zaka Yesu, a kiɗakaŋ
(Yo pura Mat 26.67-68; Mark 14.65)
63Mizli majiginaka Yesu, a zlaka a singiram anga, a kiɗakaŋ, haŋ turɓus turɓus. 64A sirtakaŋ gwat a hiri, a ɓakaŋ: «Mikiɗuw na, i waka? Sina so, ka mijiviɗi!» 65Joˀ a zakaŋ ti ɓi mekelemey wal wal haɗa.
Miram ti Yesu nga mbuŋ kus ngi ngilawuy madiɗa
(Yo pura Mat 26.59-66; Mark 14.55-64; Zaŋ 18.19-24)
66Li a wun le, mizli micawwa ngi Yudehey, masay madiɗahay ati buy ngi ɓimujuwahay a kusom. Dar a soko ti Yesu nga mbuŋ kus taŋ ngi ngilawuy madiɗa, 67a ɓakaŋ: «Da ki Mesi na, inga ɓa ndra di.» Yesu a mbiɗa taŋ di: «Da ko yi ɓukum di le vuna kwana, kum anta kisa tiɓaka ta si. 68Yo da i ra cufuɗ na, kum anta sa mbiɗikiy di ta. 69Amma zle wurenna, Mangal ngi mbur a sa cifi joˀ tir vay hazum ngi Buymisemuŋ, Misi gidaŋ wãˀ.» 70Dar taŋ gar a ɓakaŋ: «Ani, ki Mangal ngi Buymisemuŋ sukwa?» A mbiɗa taŋ di: «Kum vuna, ki ɓam yi nah.» 71Dar a ɓam: «I wuɗam sedewo aruŋ makwa? Asi ndra vuna, i cinaka mingiɓi ngi balam naŋ le si!»
Επιλέχθηκαν προς το παρόν:
Luk 22: BEGDC
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible en Langue Guiziga © L’Alliance Biblique du Cameroun, 2011.