HMOTAOPAZY 27
27
Pawla Rawma lâ a sie
1Itali râh lâ balyh ta eima sie awpa ama pathlu nahta, Pawla nata atâhpa chyhsa thokhazy cha Awkastu py liata pheisaih za kha hyutuhpa Zulia ama tahpa ku liata hlâ ei ta. 2Asia râh tilaipi ngiahkâ liata a ypa khihzy chapiapa ta a sie awpa Adarâmatia balyh kiapa ta tilaipi liata sie pi ta. Mâsidônia chyhsa, Thysalawnika khihpa Aristaku chhao eima hnohta vaw sie hra ta. 3A mylâ ta Sidaw khih tlô pi ta. Zulia ta Pawla cha ngiachhie kaw ta, a viasazy lâ charei ta, a byuhna hawhta ama vaw mohôh awpa pasaih ta. 4Cha su tawhta sie heih pi ta, thlih ta eima hmia lâ tawhta miah a supa vâta, thlih a chalihna Kuparâ liahpahlô lâta chahrih pi ta. 5Silisia râh nata Pamphulia râh daih lâ tilaipi eima khô tawhta, Lysia râh liata Myrâ khih tlô pi ta. 6Cha liata pheisaih za kha hyutuhpa ta Alezandria khih balyh Itali râh lâ a sie awpa hmô ta, cha liata miah pakiasa ta. 7Noh hluhpi dusawta ta sie pi ta, vâsâ ta Knidu khih dady tlô pi ta, thlih ta eima hmia lâ tawhta miah a supa vâta, Salmône dady ta thlih a chalihna Krite lâta chahrih pi ta. 8Rairu ngaitapa ta ngiahkâ chhei pi ta, Balyh Apahâna Ngiapa ama tahpa su tlô pi ta, cha su cha Lâsia khih kiapâh liata a ypa a châ.
9Noh hluhpi khô ha ta, Kâhvileipa#27.9 He Kâhvileipa daihti he, kâhvileipa ta chay tyhpa Chatlaina Noh châ ta, thlih chahra kawna sao daihti, Phiata thlâpâ a châ. noh chhao a khô hapa vâta, balyh ta siepa cha chichhih ngaita ta. Pawla ta âmo cha pachâna pie ta, 10ama hnohta, “Pâpuh saih u, he tawhta eima pua khiahta cha, hmahphaona nata pahleina eimâ tyh aw, tahpa ei pahno. Hmobaoh nata balyh dei châ leipa ta, keimo hrona châ chhao ta chichhihpa a châ,” tah ta. 11Châhrasala pheisaih za kha hyutuhpa ta Pawla bie reipa hlâta balyh puhpa nata balyh hneituhpa bie pachâ peimawh via ha ta. 12Balyh apahâna su cha chasipaw daihti hmâ nawpa châta â ryh leipa vâta, a hluh via ta sie awpa pha tah ei ta. Phôni khih chhâ ama tlô thei khiahta cha, cha liata chasipaw daihti hmâ awpa a phapa ta pahno ei ta. Phôni khih cha Krite liahpahlô liata balyh apahâna miakha châ ta, chho notla lâ nata maw notla lâ a heihpa a châ.
Tilaipi thlihpi
13Chho thlih nai zualuapa a vaw pathli nahta, ama khozie hawhta a châpa ta pachâ ei ta, thua cha-ia chalo ei ta, Krite liahpahlô ngiahkâ chheipa ta sie ei ta. 14Châhrasala raphyu lâ tawhta thlih ru ngaitapa, maw nochhi thlih ama tahpa thlai vaw pathli ta. 15Balyh cha vaw su ta, eima toh thei khao lei nahta, thlih a paphaosapa ta sie pi ta. 16Kawdâ ama tahpa, thlih a chalihna liahpahlô chyhpa lâta chhei pi ta, rairu ngaitapa ta balyh chyhpa cha pabohsa thei lylia pi ta. 17Amâ daophi khai tawhta, balyh chyhpa nata balyh laipa cha khawhhri ta chahry pâ ei ta. Syti su liata sadi liata amâ tâh pathlei awpa chipa ta, balyh pohraipa cha pahnai ei ta, thlih siena lâta a paphaosa ei ta. 18Tichatlaopa ta thata miah a supa vâta, a mylâ ta balyh hmophaopazy cha thy pathao ei ta. 19A noh thôhna noh ta, âmo ku tlai ta balyh hmobaohzy thy heih ei ta. 20Noh hluhpi chhôh noh nata awhsizy a lâ leipa ta, thlihpi ru ngaitapa ta miah a chanaoh ngâ thlâh hapa vâta, hro awpa rai a hnabeiseih khao ma pi. 21Pati nie leipa ta bohpi ama y tawhta, Pawla cha ama hry liata a duah ta, ama hnohta, “Pupa saih u, ei bie kha zyhpa ta, Krite liahpahlô tawhna khata vaw sie leipa ei sih la cha, he hmahphaona nata pahleina he eimâ tyh lei awpa tlai. 22Chatahrasala tahmâ thlalôhpa ta y awpa ta ei cha pasyu ei. Nama hry liata ahy hmah hrona pahlei aw veih ei chi, balyh deikua cha a rao aw. 23Tazâ liana tlai khata, ano eih châ na ta, ei chakaopa Khazohpa vâlyuhchâpa ei hmiakô liata a vaw duah ta, 24ei hnohta, ‘Pawla, chi khah y, Kaisarâ hmiakô liata nâ duah awpa a châ. Moh teh, na hnohta balyh liata a siepa zydua chhao kha, Khazohpa ta a cha pie,’ eina tah. 25Chavâta pupa saih u, thlalôhpa ta y teh u, Khazohpa a ngiapâ na ta, eina chhopa hawh tlai ta a y aw. 26Anodeikua kheihawhpa liahpahlô lia ma cha, sadi liata a tâh awpa ta eima tao awpa a châ,” tah ta.
27Adaria tilaipi lâta thlih ta miah a phao hai nota, zâ hrawh hleipalih a tloh zâ ta, zâcho rachhôh ta balyh puhpazy ta raphyu miakha amâ hnia hapa pangiasa ei ta. 28Ti athuna thlie ei ta, lâh kih a thu ta. A chyhta ama sie nahta, thlie heih ei ta, lâh hrawh hleipangawh a thu ta. 29Lôchhô chô liata ama sie awpa chipa ta, balyh chao lâta thua cha-ia miapalih pathla ei ta, khih thlai a pavâ awpa hnabeiseihpa ta hâ ei ta.
30Balyh puhpazy cha balyh luh lâta thua cha-iazy pathla awpa hawhta tao pakheipa ta, balyh chyhpa cha tilaipi liata pathla ei ta, balyh laipa cha a râsai a chhuah ei ta. 31Pawla ta pheisaih za kha hyutuhpa nata pheisaihzy hnohta, “He sahlao he balyh liata ama y thlâh ha leipa khiahta cha, a boh aw veih ei chi,” tah ta. 32Chatanachata pheisaihzy ta balyh chyhpa rizy cha chhawh pachhô ei ta, balyh chyhpa cha ti ama paphao haw.
33Khihdei chy ta, Pawla ta chyhsa zydua cha pati nie awpa ta chho ta, ama hnohta, “Tanoh he nôpopa ta nama y tawhta noh hrawh hleipalih châ ha ta, nie leipa ta y ei chi ta, khâpa hmah nie veih ei chi. 34Chavâta pati nie awpa ta ei châ haw ei. Nama thatlô nawpa a châ. Nama hry liata ahy hmah a luh liata sâbu miakha chhao leidia aw vei,” tah ta. 35Cha bie cha a rei khai nahta, viahchhâ la ta, chyhsa zydua hmiakô liata Khazohpa lâta alyna bie reih ta, pachhaih ta, nie ta. 36Chatawhcha ama zydua ta ama thlah vaw lôh ta, pati nie ha hra ei ta. 37Balyh liata chyhsazy cha eima zydua ta 276 eima châ. 38Ama nie khai nahta, ama sâh phaopazy tilaipi liata thypa ta, balyh cha pahuasa via ei ta.
Balyh raona
39Khih a vaw pavâ nahta, khâpa râh ma ama tlô tahpa pahno leipa ei ta. Châhrasala raphyu a hneipa lihchakôpa hmô ei ta. A thei khiahta cha, balyh cha ngiahkâ lâ chasô a chhuah ei ta. 40Thua cha-ia rizy â pachhô ei ta, tilaipi liata siesai ei ta. Balyh hiana chahry pâna rizy chhao pathlâ ei ta, a hmia lâta pohraipa cha thlih ta a hmô thei nawpa ta pasâh ei ta, raphyu lâ pangai ei ta. 41Châhrasala tilaipi miano atyhna su liata a ngia pi ta, balyh cha alei chô liata patâh ha ei ta. Balyh luh lâ a taw ha ta, papie thei leipa ta y ta, a chao lâ deikua cha ti chatlaopa rupa ta parao pathao ta. 42Pheisaihzy ta atâhpazy cha, ti a zawpa ta amâ râ pathlei aw tahpa chipa ta thie a chhuah ei ta. 43Châhrasala pheisaih za kha hyutuhpa ta Pawla a pachha khohpa vâta, ama hmo a chhuahpa cha pakhâ ha ta. Ti zaw athaipa maih balyh tawhta a zawpa ta raphyu lâ pua tua awpa ta biepie ta. 44Ahropazy cha thophia hmâpa ta tlyma, balyh hmobaohzy hmâpa ta tlyma, raphyu lâ pua awpa ta biepie hra ta. Cha hawhna chata ama zydua ta raphyu lâ â bohpa ta pua khai ha ei ta.
Επιλέχθηκαν προς το παρόν:
HMOTAOPAZY 27: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.