HMOTAOPAZY 26
26
Akripâ hmiakô liata Pawla thaichâna bie
1Akripâ ta Pawla hnohta, “Na thaichâna bie na reih thei,” tah ta. Pawla cha a ku pazawh ta, a thaichâna bie reih ta.
2“Bei Akaripâ y, Zuzy ta eina leihna zydua liata, ei thaichâna bie tanoh na hmiakô liata ei rei thei awpa he nohlao ei tah ngaita. 3Nâ cha Zuzy phoryhpa nata aeichhiana kyhzy a pahnotuhpa na châpa he, vâpha ei tah via pachai. Chavâta palôh pasi kawpa ta ei bie eina nathlie awpa chi ta ei châ haw.
4“Ei thyutlia tawhta ei chiheihzy hry liata nata Zerusale liata ei hroziezy cha, Zu chyhsa zydua ta âthaona tawhta ama pahno. 5#Hmt 23.6; Phil 3.5Ama rei khoh khiahta cha, eima zyhna liata a i chaipa Phârisaih py ei châpa chhao, hlâno tawhta ama pahno. 6Khazohpa ta miah pathlatuhpazy hnohta bie â taihpa liata hnabeiseihna ei hneipa kyh vâta tahmâ he liata pachiapa ta a duahpa ei châ. 7Cha bietai cha eima chi hrawh hleinozy ta hmô awpa hnabeiseihpa ta, chhô nah zâ ta phahnai khoh ngaitapa ta Khazohpa ama chakao tyh. Hy abei y, cha hnabeiseihna kyh vâna chata Zuzy ta eina leih ei. 8Khazohpa ta athihpa a pathyu tahpa he, khazia zo chhih leipa hmo ta nama rao tly?
9 #
Hmt 8.3; 22.4,5 “Kei chhao he Nâzari Zisu moh chakhiapa ta hmo hluhpi tao awpa pha a tahpa ei vaw châ hra. 10Cha hmozy cha Zerusale liata tao na ta. Theihthai beizy tawhta biehneina ei hmô tawhta, mopathaihpa hluhpi patâhna o liata ei khôpa dei châ leipa ta, ama thie nota chhao, thie awpa a paryhsa tyhpa ei châ. 11Pakhyna o zydua liata âmo cha hrie tyh ei na ta, Khazohpa moh reipachhie awpa ta tao ei na ta, ama chô liata nôchhie ngaitapa ta y na ta, râh hropa khihpi lâzy taihta âmo a taola laihpa ei châ.
12“Cha hawhta tao awpa ta, theihthai beizy biehneina a chabapa ta, âmo tuapa ta Dâmaskâ lâ sie na ta. 13Hy abei y, lâpi liata ei sie hai nota, nohchhô lichih ta avâ tawhta khaihpa, noh hlâta khaih viapa ta kei nata ei sielâhpazy chheipâh liata a vaw khaihpa hmô na ta. 14Eima zydua ta alei liata pao pi ta, Hebrai reih ta, ‘Sawla, Sawla, khazia eina taola chi? Chôchahrei pazaopa chapiepa#26.14 He liata “Chapiepa” tahpa he, phei ta chapiepa hawhpa reina a châ. cha na châta a pasa kaw mâh tâh,’ eina tahpa ao thei na ta. 15Chatawhcha kei ta, ‘Abeipa, ahy ma na châ?’ tah na ta. Abeipa ta, ‘Zisu na taolapa kha ei châ. 16Châhrasala thyu la, na phei ta a duah teh. Nâ chakaotuhpa ta cha tao awpa ta na hnohta ei vaw luah. Kei liata hmo na hmôpazy nata na hnohta ei luahna liata na hmôpazy nâ châhkhei lymâ aw. 17Na chiheihzy nata Zenitaizy lâ cha tuah aw na ta, âmo tawhta ei cha pachha aw. 18Ama mozy pavâsapa ta, zohna tawhta khaihna lâ paheisa awpa nata Sâtâ hmotaotheina tawhta Khazohpa hmotaotheina lâ paheisa awpa ta ei cha tuah aw. Chatanachata molei ngiahthaina hmô aw ei ta, einâ ngiapâpa vâ ei ta, pathaisapazy hry liata tovyuh ama hnei hra aw,’ tahpa ta eina chho.
19“Chavâta Bei Akripâ y, avâ tawhta aluahna cha zyh leipa ta y thei va na. 20#Hmt 9.20,28,29A hmiatua ta Dâmaskâ mo hnohta phuah na ta, cha khai tawhta Zerusale mo nata Zudia râh to liata chyhsazy hnohta nata Zenitaizy hnoh chhao ta ei phuah lymâ. Ro moh phaoh tlâh châpa ta hmo taopa ta ro ei sala, Khazohpa lâ a heih awpa ta ei chho lymâ ei. 21Cha vâna chata Zuzy ta Achhyna o liata na patu ei ta, thie einâ chhuah ei. 22Châhrasala Khazohpa tawhta baona ei hmôpa vâta, tanoh taihta a châhkhei lymâ thei na ta, he liata chhao a duah na ta, chyhsa nawhpazy nata molaipazy hmiakô liata ei châhkhei theipa he a châ. Hrohsopazy nata Mawsi ta a vaw tlô awpa ama reipazy dei leipa ta, bie hropa khâpa hmah reih va na. 23#1 Kaw 15.20; Isai 42.6; 49.6Hrohsopazy nata Mawsi ta Mesia cha riethei tao aw ta, athihpa thyuheihna hmia a sahtuhpa a châpa vâta, keimo phopi hnohta nata Zenitaizy hnohta khaihna a phuahtuhpa a châ awpa kyh ama reipa dei leipa cha, bie hropa khâpa hmah reih va na,” tah ta.
24Cha hawhta a thaichâna bie a rei hai nota, Festâ ta ao paro ngaitapa ta, “Pawla, na palôh â ki khao leipa he! Nâ chu hluhna ta a cha pahrusa ha hih!” tah ta. 25Pawla ta, “Festâ zachhih chaipa y, a hrupa châ va na, biedopa nata bie yzie hneipa tlao ei reih. 26He bie he abei ta a pahno. Chavâta ano hnohta cha riahphapa ta ei reipa a châ. He hmozy he a chaki chakô liata taopa châ veih ei. Chavâta a abei pahno lei awpa ta phihpa y tlâ vei, tahpa a siapa ta ei pahno. 27Bei Akaripâ, hrohsopazy na zo ma? Na zo tahpa ei pahno,” tah ta. 28Akripâ ta Pawla hnohta, “Buakhata reipasao ta, Krizyhpa ta tao awpa ma einâ chhuah chi?” tah ta. 29Pawla ta, “Buakha chhôh ta tlyma, bohpi tlyma rai châ sala, nâ dei châ leipa ta, tanoh ta ei bie a theipa zydua heta, he bâliazy he na tah leipa ta cha, keima hawhta y awpa ta Khazohpa lâta ei hiah,” tah ta.
30Chatawhcha abei cha thyu ta, râhvaotuhpa nata Benisi nata ama hnohta a tyuhpazy chhao thyu ei ta. 31Ama pua nahta, a chhohia ei ta, “He chyhsa heta thina tlâh a châpa tlyma, patâh tlâh a châpa tlyma, khâpa hmah tao vei,” tah ei ta. 32Akripâ ta Festâ hnohta, “He chyhsa he Kaisarâ kô tlô awpa a haw leipa sala cha, papua theipa a châ,” tah ta.
Επιλέχθηκαν προς το παρόν:
HMOTAOPAZY 26: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.