HMOTAOPAZY 20
20
Pawla Mâsidônia nata Krikâh liata
1Atymâna a pai tawhta, Pawla cha pachupazy paawsa ta, ama thlah palôh ta, a phapa ta a pathlie khai tawh ei ta, Mâsidônia râh lâ sie awpa ta pua ha ta. 2Cha râhzy cha chahryh ta, pasyuna bie hluhpi a rei khai tawhta Krikâh râh tlô ta. 3Cha liata thla thôh a y tawhta Suria râh lâ balyh ta sie a chhuah ta, châhrasala Zuzy ta thie amâ chhuahpa vâta Mâsidônia râh lâ kua awpa ta tlao a chhuah ha ta. 4Beria khihpa Pyhu sawchapawpa Sôpate, Thysalawnika khihpa Kristaku nata Sekudu, Derbe khihpa Kaiâ, Timawthy, Asia chyhsa Tykiku nata Tarôphimâ zy ta zi ei ta. 5Âmo cha hmia lâta sie ei ta, Tarôsa khih liata miah vaw hâ ei ta. 6Keimo deikua cha viahchhâ thinô pahlao leipa kyhchhi a chhâ tawhta Philipi tawhta balyh ta pua pi ta, ama yna Tarôsa khih cha noh pangawh ta tlô pi ta, cha liata noh sari châh pi ta.
Utyku pathyuna
7Hâta noh hmiatua chaipa liata, viahchhâ eichheih awpa ta eima y pakhy nota, Pawla cha a mylâ sie â chhuahpa vâta, zâcho taihta ama hnohta bie reih ta. 8Eimâ hmaohna ochô chhôhpadâhpa liata meiôh hluhpi y ta. 9Satlia pakha Utyku ama tahpa cha opy liata a tyuh ta. Pawla biereipa a pasi kawpa vâta, a mokupa ta tlauah pathlah ha ta, o chhâh thôhna tawhta tla ta, a thipa ta a huah ei ta. 10Pawla cha chô ta, a chô liata a byu thlu ta, a bâh ta a pyh ta, “Nama thlah a pazo khah u, a hroh thlâh ha aw,” tah ta. 11Pawla cha ochô lâ kiah heih ta, viahchhâ cha eichheih ta, ama nie khai nahta, ama hnohta a pasipi bie reih via heih ta, khih vaw deih pâ ha ta, chatanachata sie ha ta. 12Satliapa cha a hrohpa ta a chhi ei ta, thlalôh ngaitapa ta y ha ei ta.
Tarôsa tawhta Miletâ lâ
13Pawla cha phei ta alei lâta sie â chhuahpa vâta, keimo cha balyh lâ zu chhielie pi ta. Asôsa khih pangaipa ta sie pi ta, cha tawhna chata Pawla cha balyh ta a sie hra awpa châ ta. 14Asôsa khih liata miah a vaw pahlyh ta, balyh pakiasa pi ta, Mitali khih lâ sie pi ta. 15Mitali tawhta balyh ta sie heih pi ta, a mylâ ta Kiôsa liahpahlô dady tlô pi ta. A mylâ ta Samôsa liahpahlô tly pi ta. A mylâ heihpa ta Miletâ khih lâ sie pi ta. 16Â thei khiahta cha Zerusale liata Pentikaws noh hmâ awpa ta a sie para khohpa vâta, Pawla cha Asia râh liata bohpi y awpa khoh leipa ta, Ephesi khih cha balyh ta siepakhô a chhuah ta.
Ephesi machâzy hnohta Pawla pasyuna bie
17Miletâ tawhta Ephesi lâ chyhsa tuah ta, Awnanopa machâzy ano a vaw hmô awpa ta kei paawsa ta. 18Ama vaw tlô nahta, ama hnohta, “Asia râh ei tly tua noh tawhta nama hnohta ei y chhôh zydua ta ei hrozie kha nama pahno. 19Areisina chôta Abeipa chakao na ta, Zuzy ta eina teipa vâ ei ta mothlih chhaota nata rietheina chôta ei chakao tyh. 20Ei bâh pathliah beih leipa na ta, nama châta a phahnai awpa biezy zawpi ahmaohna liata cha pachu ei na ta, o to kiapa ta ei cha pachu tyh ei. 21Zuzy hnohta chhao, Krikâh mo hnohta chhao, ropa ta Khazohpa lâ a heih ta, eima Beipa Zisu Krista a ngiapâ awpa ta ei cha chho tyh ei.
22“Thlahpa ta eina tuahpa vâta tahmâ he Zerusale lâ ei sie aw. Cha liata ei chô lia khâpa hmo ma a vaw tlô aw tahpa pahno va na. 23Khihpi to liata patâhna nata rietheitaonazy ta eina hâ thlâh hapa kyh Thlahpa Pathaihpa ta eina chhopa deita ei pahno. 24#2 Tim 4.7Châhrasala Khazohpa ngiachhiena thâtihpha a châhkhei awpa ta, Abeipa Zisu tawhta ei daopa chakaona rai he ei patlô thei khiahta la, ei hrona he pasô kaw awpa nata ngiabâh tlâh a châpa ta rao va na.
25“Khinarâh bie chhopa ta ei sielâh tyhpa nâmozy hry liana heta, ahy hmahta ei hmia hmô khao aw veih ei chi tahpa ei pahno. 26Chavâta chyhsa zydua thisaih liata ei pathaih tahpa tanoh ei cha chho ei. 27Khazohpa ryhraona zydua nama hnohta phuah khai awpa kyh liata ei bâh pathliah beih va na. 28Khazohpa Awnanopa sahlao, ano thisaih ta a chaleipazy pasa awpa ta, nâmo nata nama sahlao zydua chô liata a chado teh u. Thlahpa Pathaihpa ta ama chô liata hyutuhpa ta a cha tao ei hih. 29Ei sie tawhta changie a hrâhpazy nama hry liata a vaw ngia aw ei ta, mietakuzy pahlôh aw vei tahpa ei pahno. 30Nama hry tawh cheingei chhao ta, pachupazy âmo lâ pabaisa a chhuahpa ta, haipa bie hmâpa ta chyhsa a pasiesachheipazy ama vaw pua aw. 31Chavâta a hrohruapa ta y u la, kô thôh chhôh tlai bâh leipa ta, chhô nah zâ ta mothlih chhaota chyhsa to zikyu ei râ tyhpa kha a thei thlâh ha teh u.
32“Tahmâ he Khazohpa nata a ngiachhiena bie liata ei cha pavaosa ei. Cha chata cha palaiseihsa aw ei ta, mopathaihpazy hry liata ryuto a cha pahneisa aw ei. 33Ahy tâkâ, ngôh nata chysia hmah uahva beih va na. 34He ei kuzy heta kei nata ei hnohta a ypazy a ngiahpa châta ei hria tyhpa nâmo tlai ta nama pahno. 35Abeipa Zisu ta, ‘Pietuhpa châpa cha daotuhpa châpa hlâta byhnâ a y via,’ tahpa bie a reipa kha a thei thlâh hapa ta, cha hawhta hriapasapa ta chiehleipazy eima bao awpa a châzie, kao to ta ei cha pamosa tyh ei,” tah ta.
36Cha biezy cha a rei khai nahta, a pakhu paneih ta, ama zydua châta thlahchhâ ta. 37Ama zydua ta thata cha ei ta, Pawla cha a pyhpahlypa ta, a pahnâ ei ta. 38A hmia ama hmô khao lei awpa kyh a reipa vâta ama ngia a chhie pachaipa a châ. Chatanachata balyh taih za pathlie ei ta.
Επιλέχθηκαν προς το παρόν:
HMOTAOPAZY 20: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.