HMOTAOPAZY 19
19
Pawla Ephesi liata
1Apawlôsâ Kawrini liata a y chhôh ta Pawla cha tlâh râh chahryh ta, Ephesi tlô ta. Cha liata pachupa thokhazy hmô ta. 2Ama hnohta, “Namâ ngiapâ tua nona kha Thlahpa Pathaihpa nama to ma?” tah ta. Âmo ta a hnohta, “To ma pi, Thlahpa Pathaihpa a ypa chhao pahno ma pi,” tah ei ta. 3Pawla ta, “Cha khiah, khâpa bâtina ta bâti a châpa ma nama châ?” tah ta. Âmo ta, “Zawhâna bâtina ta bâti a châpa eima châ,” tah ei ta. 4#Mat 3.11; Mka 1.4,7,8; Lka 3.4,16; Zhn 1.26,27Pawla ta, “Zawhâna khata rona bâti pachâsa ta, a hnôhlâ ta a vy awpa Zisu a ngiapâ awpa ta chyhsazy a chho ei,” tah ta. 5Cha bie cha ama thei nahta, Abeipa Zisu moh ta bâti châ ha ei ta. 6Pawla ta ama chô liata a ku a pahnieh nahta, Thlahpa Pathaihpa ama chô liata vaw tlô ta, reih hropazy ta bie reih ei ta, hrohsona biezy phuah ei ta. 7Ama zydua ta pawtlohpa sai ta pahrawh hleino rachhôh ama châ.
8Pawla cha pakhyna o liata a ngia tyh ta, thla thôh chhôh riahpha ngaitapa ta bie reih ta, Khazohpa khinarâh kyh liata âmo cha Biehrai a laichadaikheipa ta pahnie a chhuah ta. 9Châhrasala thokha cha chhorupa ta y ei ta, a ngiapâ khoh leipa ta, zawpi hmiakô liata Lâpi zyhna cha reipachhie ei ta. Chavâta âmo cha siesaipa ta, pachupazy ânano ta a chhi ta, noh chareih ta Tyrânâ pachuna o liata âmo cha Biehrai a laichadaikhei tyh ta. 10Cha hawhna chata kô no chhôh tao ta, chatanachata Asia râh liata a ypa Zuzy nata Krikâh zydua ta Abeipa bie thei ei ta.
Skevâ sawchapawzy
11Khazohpa ta Pawla ku ta hmonoâh ngaitapazy tao lymâ ta. 12Pawla pôhpa a hria hapa rumâ nata hruna poh hawhpazy taihta tlâhleipazy lâ cheih ei ta, ama hriiahzy ta âmo cha puasai ta, thlahpa chhiepazy chhao ama chhôh tawhta pua lymâ ei ta. 13Dyuthaina zuahpa ta a khiekhâpa Zu chyhsa thokhazy ta, ahripa a hneipazy cha Abeipa Zisu moh ta papua awpa a chhuah hra ei ta, “Pawla a châhkheipa Zisu moh ta, pua awpa ta bie ei cha pie,” tah ei ta. 14Cha hmo cha Zuzy theihthai beipa Skevâ sawchapaw pasarizy ta tao tyh ei ta. 15Noh kha cha thlahpa chhiepa ta âmo cha a chhy ta, “Zisu ei pahno, Pawla ei pahno hra, nâmo he ahyzy nama châ tly?” tah ta. 16Thlahpa chhiepa a hneipa chata âmo cha a vaw zawhnao ta, ama zydua ta taochhie ta, pahnie ha ta, cha o tawhtapa cha thluahruapa nata hmah phaohpa ta a râ ha ei ta. 17Ephesi liata a ypa zydua, Zuzy nata Krikâhzy hnohta, cha bie cha pathâh ta. Ama zydua ta chi ngaita ei ta, Abeipa Zisu moh cha parônahsapa ta y ta. 18Ngiapâtuhpa hluhpi a vy ei ta, ama hmotaopazy a phuahpa ta palâhâh ei ta. 19Dyuthaipa hluhpi ta ama châbuzy vaw cheih ei ta, chyhsa zydua mohmô ta mei ta rao ei ta. A mâ reipati ei ta, tâkâ thy pangawh mâ dua a châ. 20Cha hawhna chata Abeipa bie cha pathâh via rilipa ta, a thatlô via lymâ ta.
Ephesi liata tymâna
21Cha khai tawhta, Pawla cha Thlahpa chhihthapa ta Mâsidônia râh nata Akai râhzy chahryh ta, Zerusale lâ sie a chhuah ta, “Cha râhzy ei tlô tawhta, Rawma chhao ei tly awpa a châ,” tah ta. 22A chakaotuhpa pano, Timawthy nata Erastâ cha Mâsidônia râh lâ pasiesa tua ta, ano cha Asia liata y chy ta.
23Cha daihti liata, Lâpi zyhna kyh vâta atymâna lai ngaitapa pua ta. 24Chyhsa pakha, Demetia ama tahpa cha tâkâ a daih thaipa châ ta. Tâkâ ta Artemi#19.24 Artemi he Krikâh khazohnô, râh sa, râh akhiepa, thokô rihkô nata chanô chapaw châna kyh liata kôna (pathaihna) nata nawh hneina liata abohna khazohnô a châ. Rawma moh cha Diana a châ. khazohnô nothlahpa daih ta, zôthaipazy châta athôhna thata a taotuhpa a châ. 25Cha chyhsa chata zôthaipazy nata âmo raihria hawhpa hriatuhpazy awpakhy ta, ama hnohta, “Pupa saih u, he rai he eima sôh hnawh a châ tahpa nama pahno. 26Ephesi lia dei châ leipa ta, Asia râh zydua rô ta, he Pawla heta ku ta taopa khazohzy cha khazoh châ veih ei, tahpa ta chyhsa hluhpi pahnie ta, a patleisa khaipa kyh cha, nâmo chhao hmô ei chi ta, nama theipa a châ. 27Eima rai a chhâ aw tahpa chi â chhihpa dei châ leipa ta, khazohnô rônah ngaitapa Artemi achhyna o chhao he a vaw nawraih ha aw. Asia nata khizaw zydua ta amâ chhypa khazohnô he, a rônahna thypa a châ pathlei aw tahpa chhao chi â chhih ngaita,” tah ta.
28Cha biezy cha ama thei nahta, ama pathi ia ngaita ta, “Ephesi mo Artemi khazohnô he rônahpa a châ,” tahpa ta awh ei ta. 29Khihpi zydua cha tymâna ta bie ta, Pawla a zituhpa Mâsidônia chyhsa Kaiâ nata Aristaku zy cha patu ei ta, ahmaohna o lâ â raohpa ta a râkhei ei ta. 30Pawla cha zawpi lâ pua awpa a chhuah ta, châhrasala pachupazy ta pasaih leipa ei ta. 31Asia râh hyutuhpazy hry liata thokha cha Pawla viasazy châ ei ta, âmo chata Pawla lâ chyhsa tuah ei ta, ahmaohna o liata a ngia raruah lei awpa ta a haw ei ta. 32Zawpi a hmaohpakhypa sahlaozy cha thata a tyhreih ei ta, thokha ta bie miakha vaw awh ei ta, thokha ta bie hropa vaw awh ei ta, chyhsa hluh via zydua cha amâ hmaohpakhyna chhâpa chhao pahno veih ei. 33Alezandâ cha Zuzy ta hmia ama pasahpa vâta, zawpi hry liata thokha ta ano vâta khiah ma tah ei ta. Alezandâ ta zawpi cha a chalih awpa ta a ku thliethlâ ta, a thaichâna bie zawpi hnohta rei a chhuah ta. 34Châhrasala ano cha Zu chyhsa a châ tahpa ama pahno nahta, dawh no chhôh tlai ao paro ngaitapa ta, â raohpa ta, “Ephesi mo Artemi khazohnô he rônahpa a châ!” tahpa ta awh ei ta.
35Khihpi chârohtuhpa ta zawpi cha a chalihsa khai nahta, “Ephesi mo saih u, Ephesi mo he Artemi rônahpa achhyna o nata avâ tawhta ano nothlahpa zâ tlapa a vaituhpa nama châ tahpa, a pahno leipa ahy ma a y tly? 36He hmozy he ei thei awpa rih a châ lei thlaopa cha, a chalih teh u, pachâ pasia ha tua leipa ta khâpa hmah nama tao awpa châ vei. 37He chyhsa namâ vaw chhipazy he, achhyna o a papuapaleipa châ leipa ei ta, eima khazohnô a reipachhietuhpa châ hra veih ei. 38Demetia nata a viasa zôthaipazy ta ahy liata rai biepeipa ama hnei khiahta cha, ryureina ochhi a pahy thlâh ha ta, râhvaotuhpazy chhao ama y. Ama biepeipazy cha ama vaw tlôkhei thei. 39Nama palôh tlâh leipa sala, biepeipa cha rei via awpa nama khoh khiahta cha, ahmaohna hnei tyhpa liata rei pasia awpa a châ. 40Tanoh ta atymâna kyh liana heta, eimâ hmaohna chhâpa nata thaichâna bie rei awpa hnei ma pi, chavâta tymâna a taotuhpa ta baipa eima châ tlamaw awpa he chichhih ngaitapa a châ,” tah ta. 41Cha biezy cha a rei khai nahta, ahmaohna cha pachhâsa ta.
Επιλέχθηκαν προς το παρόν:
HMOTAOPAZY 19: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.