HMOTAOPAZY 12
12
Zâmie thina nata Pity patâhna
1Cha daihti rachhôh liata, Bei Herawda ta Awnanopa sahlao thokha chô liata a ku hypa ta taola ta. 2Zawhâna unawhpa Zâmie cha zaozi ta thie ta. 3Cha chata Zuzy a palysa tahpa a pahno nahta, Pity chhao patu a chhuah heih ta. Cha cha viahchhâ thinô pahlao leipa kyhchhi nohzy liata a châ. 4#Pua 12.1-27Herawdâ ta Pity cha patu ta, patâhna o liata khô ta, pheisaih papalih lymâ ta pavaisa ta. Zawpakhô khai tawhta zawpi hmiakô liata a thâtih pachia awpa a chhuah ta. 5Chavâta Pity cha patâhna o liata paysa chypa châ ta, Awnanopa ta ano châta phahnai khoh ngaitapa ta Khazohpa lâ thlahchhâ ei ta.
Patâhna o tawhta Pity a pua
6Herawda ta a papua chy ta, cha zâ liana tlai chata, Pity cha pheisaih pano likawh ta, bâlia miano pakypa ta a mô ta. Vaituhpazy cha ochhi thaby liata ypa ta, patâhna o cha vaih ei ta. 7Abeipa vâlyuhchâpa a kiapâh liata a vaw duah ta, patâhna o chhôh cha vaw khaih ta. Pity kâ liata kei chabaih ta, pahra ta, a hnohta, “Thyu para teh,” tah ta. Bâliazy cha a ku tawhta tla ha ta. 8Vâlyuhchâpa ta a hnohta, “Na poh a bu la, na pheiky a ky teh,” tah ta. Pity ta cha hawhta tao ta. Vâlyuhchâpa ta a hnohta, “Na poh kha pakhâta ta a bu la, na zi teh,” tah ta. 9Pity cha pua ta, zi ha ta. Vâlyuhchâpa hmotaopa cha a hmeiseihpa a châ tahpa pahno leipa ta, aluahna a hmôpa hawhta pachâ ta. 10Vaituhpa tytuapa nata a pazipa ama khô tawhta, khihpi lâ puana thua ochhi kei tlô ei ta. Ochhi cha ama châta ano khota a vaw pahy ta, pua ei ta, khiliah liata ama sie hai nota, vâlyuhchâpa chata siesai ha ta. 11Pity cha â vaw thei nahta, “Abeipa ta a vâlyuhchâpa za tuah ta, Herawda ku tawhta nata Zu chyhsazy achhuahna tawhta eina pachha haw, tahpa tahmâ a siapa ta ei pahno haw,” tah ta.
12Hmo yzie a pahno pasia tawhta, Mâri o lâ vawh ta. Mâri cha Zawhâna Mâka ama tahpa nô châ ta, cha liata thlahchhâpa ta chyhsa hluhpi vaw ypakhy ei ta. 13Aikah chhikao kei chakhyh ta, laihsa pakha, Rôdâ ama tahpa cha ochhi pahy awpa ta vawh ta. 14Pity ao a châpa a pahnopa nahta, â ly tupa ta chhikao chhao pahy khao leipa ta, o chhôh lâ a râ ta, chhikao thaby liata Pity â duah thlâh ha tahpa kei reih ta. 15Âmo ta a hnohta, “Na hru ha he,” vaw tah ei ta. Laihsa ta a hmeiseihpa a châzie khâchâ a pachyu ta, âmo ta, “A vâlyuhchâpa a châ chuh,” tah heih ei ta. 16Châhrasala Pity ta chhikao cha chakhyh ngâ thlâh ha ta, ama pahy nahta, Pity cha hmô ei ta, ama noâh ngaita ta. 17A chalih awpa ta a ku ta thliethlâ ta, Khazohpa ta patâhna o tawhta a papuanazie âmo cha chho ta. “Cha biezy cha Zâmie nata unawhzy kei chho teh u,” tah ta. Pity cha pua ta, su hro lâ sie ha ta.
18Khih a vaw deipa nahta, pheisaihzy cha Pity khataih liata a y haw, tahpa ta thata a tyhreih ei ta. 19Herawda ta Pity cha tlua ta, a hmô thei khao lei nahta, vaituhpazy kyh cha a chu pasiapa ta, âmo cha thie awpa ta biepie ta. Herawda cha Zudia tawhta Kaisaria lâ zu ta, cha liata y thlâh ha ta.
Herawda thina
20Herawda cha Tyre nata Sidaw mo chô liata a hiehâh kaw ta. Tyre mo nata Sidaw mo ta bei chakaotuhpa Blâstâ cha âmo chhâh a châ awpa ta ama viasa ta tao ei ta, reihkha tlapa ta, abei lâ a vy ei ta, aryhna tao awpa ta a haw ei ta. Ama râh cha niedo kyh liata abei râh chô liata a pahniehpa ama châpa vâta, aryhna cha amâ hawpa a châ. 21Noh taipa noh ta, Herawda cha abei poh a bu ta, a beidyuchhai liata a tyuh ta, ama hnohta bie reih ta. 22Zawpizy ta, “Khazoh ao a châ, chyhsapa ao châ vei!” tahpa ta awh ei ta. 23Herawda cha Khazohpa hnohta palyupalihna a pie leipa vâta, eikhapi ta Abeipa vâlyuhchâpa ta vaw tu ta, alôpa ta nie ta, thi ha ta.
24Khazohpa bie cha laiseih via rilipa ta, pôh lymâ ta. 25Bânabâ nata Sawla cha chakaona rai ama hria khai tawhta, Zawhâna Mâka ama tahpa a chhi ei ta, Zerusale tawhta a lie ha ei ta.
Επιλέχθηκαν προς το παρόν:
HMOTAOPAZY 12: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.