HMOTAOPAZY 13
13
Bânabâ nata Sawla tuapapuana
1Antiôkâ Awnanopa sahlaozy hry liata hrohsopazy nata pachutuhpazy y ei ta. Chazy cha Bânabâ zy, Nikâ#13.1 “Nikâ” tahpa cha, Latin reih ta “Niger” tah ei ta, movyhpa tahna a châ. ama tahpa Simeôna zy, Kurini khihpa Lukia zy, Bei Herawda unawh heihpa Manaina nata Sawla zy ama châ. 2Abeipa a chhypa ta kâhvileipa ta ama y hai nota, Thlahpa Pathaihpa ta, “Bânabâ nata Sawla kha âmo ei awna chhâpa rai hria awpa ta na pananopa teh u,” tah ta. 3Kâhvileipa ta thlah ama chhâ khai nahta, Bânabâ nata Sawla chô liata ama ku pahnieh ei ta, pasiesa ha ei ta.
Bânabâ nata Sawla Kuparâ lâ ama sie
4Bânabâ nata Sawla cha Thlahpa Pathaihpa tuapa ta sie ei ta, Selukia khih lâ zu ei ta, cha tawhna chata Kuparâ liahpahlô lâ balyh ta sie ei ta. 5Salâmi khih ama tlô nahta, Zuzy pakhyna ozy liata Khazohpa bie chho ei ta. Zawhâna chhao âmo bao awpa ta a chhi ei ta. 6Liahpahlô zydua chahryh ei ta, Pafawsâ khih tlôna taihta sie ei ta. Cha liata dyuthaipa pakha a tyh ei ta, ano cha Zu chyhsa hrohso pakheipa, a moh Barzisu ama tahpa châ ta, 7cha chyhsa cha râhvaotuhpa so kawpa Sâzia Pawla hnohta a ypa a châ. Khazohpa bie a thei khohpa vâta, Sâzia Pawla ta Bânabâ nata Sawla cha aw ta. 8Châhrasala dyuthaipa Elaimâ ta râhvaotuhpa cha ngiapâna patleisa a chhuahpa ta, Bânabâ nata Sawla cha pakhâpadie ta. Elaimâ cha dyuthaipa tahna a châ. 9Sawla, Pawla ama tah hrapa cha, Thlahpa Pathaihpa ta biepa ta, dyuthaipa cha moh pahroh ta, 10a hnohta, “Nâ, ahripa sawchapawpa, nâ, siana khakhaipa, dôveina nata nôchhiena ta a biepa, Abeipa lâpi palâpa na pakosapa he bâh aw va chi mâ? 11Chavâta tahmâ moh teh, Abeipa ku na chô liata tla ha ta, na mo chao aw ta, daihti khasâ chhôh ma cha noh khaihpa hmô aw va chi,” tah ta. Ameih nata zohna ta thlai vaw khu ta, chaaotuhpa tluapa ta pathâpazi ta. 12Abeipa pachuna bie thei ta, hmo tlôpa a hmô nahta, râhvaotuhpa cha noâh tah kaw ta, â ngiapâ ha ta.
Pawla nata Bânabâ Pisidia râh Antiôkâ liata
13Pawla nata a sielâhpazy cha Pafawsâ tawhta balyh ta sie ei ta, Pamphulia râh liata Perkâ khih tlô ei ta. Zawhâna cha âmo siesaipa ta Zerusale lâ kua ha ta. 14Pawla nata Bânabâ deikua cha Perkâ tawhta sie lymâ ei ta, Pisidia râh liata Antiôkâ khih tlô ei ta. Pahânoh ta pakhyna ozy liata a ngia ei ta, a tyuh ei ta. 15Ryhpa châbu nata hrohsopazy châbu tawhta ama rei khai nahta, pakhyna o hyutuhpazy ta âmo lâ chyhsa tuah ei ta, “Unawh saih u, zawpi châta pasyuna bie nama hnei khiahta cha, reih teh u,” tah ei ta. 16Pawla a kaw duah ta, a ku ta zie ta, bie reih ta, “Izarei chyhsazy nata Khazohpa a chipazy saih u, nathlie teh u. 17#Pua 1.7; Pua 12.51He Izarei phopi Khazohpa heta miah pathlatuhpazy a tlyh ta, Izi râh liata ama y nona khata phopi rônahpa ta padua ta, cha tawhna chata bâh pazawhpa ta âmo cha chhi papua ta. 18#Maluh 14.34; Ryhpa 1.31Kô sypalih chhôh tlai râhchawhpa liata âmo mohôh ta. 19#Ryhpa 7.1; Zsua 14.1Kâna râh liata phopi mia sari a panawh khai tawhta, Kâna mo râh cha ama ryuto râh châta a pie ei. 20#Rrt 2.16; 1 Sam 3.20Cha taih chata kô 450 a ryu. Cha khai tawhta Khazohpa ta Izarei sawzy cha ryureituhpazy pie tyh ta, Samuela kha ryureituhpa chhâna a châ. 21#1 Sam 8.5; 1 Sam 10.21Cha khai tawhta abei hiah ei ta, Khazohpa ta Benzami chi, Kisâ sawchapawpa Sawla cha ama bei ta pie ta, Sawla cha kô sypalih chhôh a bei ta. 22#1 Sam 13.14; 1 Sam 16.12; Hla 89.20Sawla a thy tawhta, Khazohpa ta Dâvi cha ama bei châta padua ta, Khazohpa ta, ‘Zese sawchapawpa Dâvi liata, ei palôh a phaohpa, ei khopa zydua a tao awpa ei hmô haw,’ tah ta. 23Khazohpa ta a bietai hawhta, Dâvi chipathla Zisu cha Izarei pachhatuhpa châta padua ta. 24#Mka 1.4; Lka 3.3Ano â vy hlâta, Zawhâna ta rona bâtina kyh Izarei phopi zydua hnohta vaw chho ha tua ta. 25#Zhn 1.20; Mat 3.11; Mka 1.7; Lka 3.16; Zhn 1.27A raihria a patlô chy ta, Zawhâna ta, ‘Ahy châ aw sah la eina pangiasa ei chi? Ano cha châ va na. Moh teh u, ei hnôhlâ ta chyhsa pakha â vy hai, kei la a pheiky ri a pathlâ tlâh chhao châ va na,’” tah ta.
26“Unawh saih u, Abarahâ pathla sawzy saih u, nama hry liata Khazohpa a chipa zydua saih u, he pachhana bie he keimo hnohta paphaopa eima châ. 27Zerusale liata a ypazy nata ama ryureituhpazy ta ano cha pahno leipa ei ta, Pahânoh maihta rei tyhpa hrohsopazy bie chhao ama pahno leipa vâta, ano cha thailei pachâsapa ta, hrohsopazy bie ama patlôsapa a châ. 28#Mat 27.22,23; Mka 15.13,14; Lka 23.21-23; Zhn 19.15Thina tlâh a châpa thaileichâna ano liata ama hmô leipa chhao ta, thie awpa ta Pilâ liata a haw ei ta. 29#Mat 27.57-61; Mka 15.42-47; Lka 23.50-56; Zhn 19.38-42A thâtih ro chhieliepa zydua ama patlôsa khai nahta, tho tawhta la ei ta, thlâ liata pazia ei ta. 30Châhrasala Khazohpa ta athihpa hry tawhta a pathyu haw. 31#Hmt 1.3Kâlili râh tawhta Zerusale lâ a hnohta a khy hrapazy hnohta noh hluhpi chhôh a luah ta, tahmâ âmo cha Izare phopi lâta a bie a pahnokheituhpazy ama châ. 32#Hla 2.7Pathlatuhpazy hnohta Khazohpa ta bie â taihpa thâtihpha kha eima cha vaw chho hih. 33Cha bietai cha Khazohpa ta Zisu a pathyuna liata, keimo ama pathlazy liata a vaw tlôpa a châ. Hlazy nuby mianona lia chhao ta,
“‘Ei Sawchapawpa châ chi ta,
Tanoh he na paw ei châ,’
tahpa ropa a châ. 34#Isai 55.3Athihpa hry tawhta pathyupa ta, thu theipa lâta â lie heih khao lei awpa kyh liata chhao, Khazohpa ta,
“‘Dâvi pathaihna nata byhnâzy
Ei cha pie aw,’
tah ta. 35#Hla 16.10Hla hropa liata chhao,
“‘Na Mo Pathaihpa cha,
A thuzao awpa pasaih aw va chi,’
tahpa ta a reih hra.
36“Dâvi cha Khazohpa hmochhuahpazy ano chhâ liata a chakao khai tawhta, a mô ta, a pathlatuhpazy hnohta paziapa châ ta, a thuzao khai haw. 37Khazohpa pathyupa deikua cha thuzao vei. 38Chavâta unawh saih u, he hmo he pahno teh u, cha chyhsa vâta moleinazy ngiahthaina kyh nama hnohta phuahpa a châ hih. 39Ahy rai a ngiapâpa maih cha ato liata thai pachâsapa ta ama y. Mawsi ryhpa ta la, chazy liata thai pachâsapa ta y thei veih ei chi. 40Chavâta a hrohrua teh u, chataleipatala, hrohsopazy châbu ta,
41 #
Hab 1.5
“‘Nâmo, mohnaotuhpazy saih u, moh teh u,
Nama noâh sala, leidia teh u;
Nama hro chhôh ta hmo miakha tao na ta,
Cha chho hra ei sala,
Zo aw veih ei chi,’
tahpa ta a reipa biezy nama chô liata a vaw tlô pathlei aw na,” tah ta.
42Ama pua nahta, cha biezy cha Pahânoh heihpa liata reih heih awpa ta zawpizy ta a haw ei ta. 43Pakhyna a pai nahta, Zuzy nata Khazohpa a pachâpa Zu phohlypa hluhpi ta Pawla nata Bânabâ cha zi ei ta, âmo cha bie a chho ei ta, Khazohpa ngiachhiena liata y thlâh ha awpa ta pasyu ei ta.
44Pahânoh heihpa liata, a khihpi rô ta Khazohpa bie nathlie awpa ta a vaw pakhy ei ta. 45Zuzy#13.45 He liata Zuzy he zyhna kyh liata chhituhpazy â nua. ta zawpizy cha ama hmô nahta, hiatliana ta bie ei ta, Pawla bie reipa cha chakhiapa ta, reipachhie ei ta. 46Pawla nata Bânabâ ta riahpha ngaitapa ta, “Khazohpa bie he nâmo liata rei tua chai awpa tlai châ ta, châhrasala dytha ei chi ta, chhâzaw hrona to tlâh châ lei awpa ta, nâmosasyh ta namâ tao ha hnohkua cha, pachâ teh u, Zenitaizy lâ eimâ heih ha aw. 47#Isai 42.6; 49.6Cha hawhta tao awpa ta Abeipa ta,
“‘Khizaw kaokih chhâna taihta
Pachhana tlôkhei awpa ta,
Zenitaizy châta khaihna ta ei cha tao aw,’
tahpa ta bie miah a pie,” tah ei ta.
48Cha biezy cha Zenitaizy ta ama thei nahta, a ly ngaita ei ta, Khazohpa bie cha parônahsa ei ta; chhâzaw hrona hnei awpa ta raopa hluhpizy cha a ngiapâ ha ei ta. 49Abeipa bie cha cha râh zydua liata pathâh lymâ ta. 50Zuzy ta chanô zachhihpa Khazohpa pachâpazy nata khih machâzy pasyu ei ta, Pawla nata Bânabâ cha pataolasa ei ta, ama râh tawhta papua ei ta. 51#Mat 10.14; Mka 6.11; Lka 9.5; 10.11Pawla nata Bânabâ ta âmo cha ama phei buchadoh chatho thlu ei ta, Ikônia khih lâ ama sie haw. 52Chatanachata pachupazy cha alyna nata Thlahpa Pathaihpa ta bie ei ta.
Επιλέχθηκαν προς το παρόν:
HMOTAOPAZY 13: MARVBSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible Society of India
© 2023, Used by permission. All rights reserved.