NINGPAWT NINGHPANG 16
16
Hagara Hte Ishmaela
1Abram a madu jan Sarai gaw shi a matu kashu kasha n lu ya nga ai. Rai ti mung, shi hta Hagara mying ai Egutu amyu mayam num langai mi lu wu ai; 2shi gaw Abram hpe, “Dai Madu gaw ngai hpe kashu kasha n lu shangun ni ai. Dai rai nna nang hpa majaw nye a mayam num jan hte n yup lu na rai ta? Nye a matu kasha mahkoi mi shangai ya lu nhten,” nga nna tsun wu ai. Dai majaw Abram gaw Sarai tsun ai ga hpe myit hkrum ya wu ai. 3Dai rai nna shi gaw Hagara hpe Abram a lashi num tai ya na matu jaw ya wu ai. (Ndai lam gaw Abram Hkanan mung e shi ning sa nga sayang she byin wa ai lam rai nga ai.) 4Abram gaw Hagara hte kanawn ai rai nna, Hagara hta na-um nasin rai nga ai. Shi na-um nasin rai sai lam hpe chye jang, gumrawng gumtawng wa nna Sarai hpe n kaw n law di wu ai.
5Dai hpang Sarai gaw Abram hpe, “Ya Hagara ngai hpe n kaw n law di ai gaw na a mara rai lit ga. Ngai hkum nan na a lata hta shi hpe ap ya ni ai. Ya shi na-um nasin rai sai hpe shi chye ai hte ngai hpe n kaw n law di kau ni ai. An kadai mahtang teng man nga ai gaw nang hte ngai hpe dai Madu jeyang ya u ga!,” ngu nna tsun wu ai.
6Abram mahtang, “Grai rai la sai, shi gaw na a mayam num rai nna na a up hkang ai npu hta taw nga ai jan rai nga ai; nang shi hpe kaning di mayu yang di u,” ngu nna htan wu ai. Shaloi Sarai gaw Hagara hpe adip arip di wu ai rai nna shi hprawng pru mat wa wu ai.
7Dai Madu a lamu kasa gaw Shura de sa wa ai zaibru jang na hka hpawk langai mi hta Hagara hpe hkap mu wu ai 8hte, “Sarai a mayam num Hagara e, kade nna pru wa nhtawm kanang de sa wa nga n ta?,” ngu nna san wu ai.
Shi gaw, “Nye a madu Sarai kaw nna hprawng wa nga nngai,” ngu nna htan wu ai.
9Shi gaw, “Na a madu hpang de bai nhtang wa su, shi a mayam tai nga u,” ngu nna tsun wu ai. 10Dai hpang shi gaw, “Na a amyu matu ni hpe kadai mung n dang hti ai grai law htam hkra ngai nang hpe jaw na de ai. 11Nang hta shadang sha shangai wa na ra ai; shi hpe Ishmaela ngu nna nang shamying lu na rai ndai; hpa majaw nga yang nang jahtau ai matsan tsin-yam nsen hpe dai Madu na ya nit dai. 12Rai ti mung na a shadang sha gaw zai ai lawze zawn brak hkawm na ra ai; shi gaw masha shagu hte hpyen tai na ra ai, masha shagu mung shi hpe hpyen na ra ai. Shi gaw shi a kahpu kanau makyin jinghku ni yawng hte hka bra nna nga hkawm ra na ra ai,” ngu nna tsun wu ai.
13Hagara gaw shi hkum hpe, “Ngai gaw Karai Kasang hpe mu lu sai hte dai lam hpe htawn tsun na matu teng teng asak hkrung nga nngai kun?,” ngu nna dinglik yu wu ai. Dai rai nna shi hte ga tsun ai dai Madu hpe, “Nang gaw mu lu ai Karai Kasang rai nga ndai,” ngu nna shamying wu ai. 14Dai re ai majaw amyu masha ni gaw Kadesha hte Bered lapran e nga ai hka htung dai hpe, “Ngai Hpe Mu Ai dai Asak Hkrung Ai Wa A Hka Htung,” ngu nna shamying wu ai.
15Hagara gaw Abram hpe shadang sha shangai ya ai rai nna shi hpe Ishmaela ngu nna shamying ya wu ai. #Gal 4:22. 16Abram gaw dai aten hta asak matsat shi kru ning du salu ai.
Επιλέχθηκαν προς το παρόν:
NINGPAWT NINGHPANG 16: JCLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Jinghpaw Common Language Bible © Bible Society of Myanmar, 2009.