NINGPAWT NINGHPANG 15
15
Karai Kasang A Ga Shaka Hte Abram
1Dai hpang Abram gaw shingran langai mu ai hte dai Madu gaw shi hpe, “Abram e, hkum hkrit et, hkrit hpa shara kaw na nang hpe ngai makawp la nna nang hpe kumhpa kaba jaw na we ai,” ngu nna tsun ai ga hpe na wu ai.
2Rai ti mung, Abram mahtang, “Tsaw Htum ai Madu e, na a kumhpa gaw ngai hpe kaning re ai mai kaja lam shabyin ya lu na rai nga a ta? Ngai hta kashu kasha mung n lu nngai. Nye a sali wunli dagraw na wa gaw Damasku mare na Elieza chyu sha rai nga ai. 3Nang ngai hpe kashu kasha n jaw ndai, dai rai nna nye a mayam ni hta na langai ngai gaw nye a sut gan sali wunli dagraw la na rai sahka,” ngu nna htan wu ai.
4Dai hpang shi gaw, “Dai Elieza ngu ai mayam wa gaw na a sut gan sali wunli hpe dagraw la lu na ra ai n rai; na a shadang sha nan na a sali wunli hpe madu lu na ra ai,” ngu nna dai Madu shi hpe bai tsun ai ga hpe na wu ai. 5Dai Madu gaw shi hpe shinggan de woi shapraw nhtawm, “Sumsing lamu de mada yu nna dai shagan ni hpe hti shakut yu u; dai zawn law htam ai amyu matu ni hpe nang lu na rin dai,” ngu nna tsun wu ai. #Rom 4:18; Heb 11:12.
6Abram mung dai Madu hpe kam hpa nga wu ai, dai lam a majaw, dai Madu gaw shi hpe awng sharawng ai hte hkap la wu ai. #Rom 4:3; Gal 3:6; Yak 2:23.
7Bai dai Madu gaw shi hpe, “Ndai lamu ga gaw na a matu rai nga u ga, nang hpe jaw na matu ngu nna she, Babelon mung Ura mare kaw nna nang hpe woi shapraw wa ai dai Madu ngai nan rai nga nngai,” ngu nna tsun wu ai.
8Rai ti mung, Abram mahtang, “Tsaw htum ai Madu e, dai lamu ga gaw nye a matu tai na ra ai gaw, ngai kaning di chye lu na rai nga a ta?” ngu nna san wu ai.
9Shi gaw, “Masum ning du ai dumsu upra langai, bainam kanu langai hte sagu la langai, hkrudu langai hte ura langai ngai hpang de la sa ya rit,” ngu nna htan wu ai. 10Abram gaw dai yam nga ni hpe Karai Kasang hpang de la sa nhtawm hkum shagu hpe ka-ang brang brang di ga let, maga mi de chyen chyen di da wu ai; rai ti mung u ni hpe chyawm gaw n ga wu ai. 11Langda ni dai mang ntsa de pyen hkrat wa ma ti mung, Abram dai ni hpe gawn kau wu ai.
12Jan shang wa jang, Abram gaw n dum mat hkra yup nga ai rai nna ja ja hkrit gari mat wu ai. #Yob 4:13. 13Dai Madu gaw shi hpe, “Na a amyu matu ni gaw maigan mung hta tsasam masha ni sa tai nga na mara ai; shanhte gaw dai mung hta e mayam tai nna shaning mali tsa ning tup gumshem ai hte zingri zingrat ai hkrum na mara ai. 14Rai ti mung shanhte hpe yam ai amyu hpe ngai ari jaw na we ai; bai shanhte gaw dai maigan mungdan kaw nna pru wa ai shaloi, shanhte hte rau sut gan law law la mat wa na mara ai. #Pru 12:40-41; Kas 7:7. 15Nang hkum nan mung gawng kung asak kaba ai du hkra nga lu nna ngwi pyaw ai hte si wa nhtawm makoi mayang ai hkrum na ndai. 16Prat mali lai ai hpang, na a amyu matu ni ndai shara de bai nhtang wa na mara ai; hpa majaw nga yang, Amori masha ni ari ahpri hkrum mu ga, shanhte grai n hkru n shawp ai ni tai mat wa ai aten du hkra, ngai shaden kau na nngai n rai.
17Jan shang mat nna nsin htat nga ai shaloi, wan hkut hku ai wan mang hte wan tu ai shanan gaw akajawng sha dan pru nna shan hkyep ni a lapran hku lai mat wa ai. 18Dai hpang dai Madu gaw Abram hte ga shaka tawn da nu ai. Shi gaw, “Egutu mung a ga jarit kaw nna Uhprat hka nu du hkra #Kas 7:5. 19dam ai lamu ga yawng hte Keni, Kenizi, 20Kadmoni, Heti, Hperizi, Rehpim, 21Amori, Hkanani, Girgashi hte Yebusi masha ni nga ai mung ni lawm hkra, na a amyu matu ni hpe jaw na matu, ngai ga sadi tawn da se ai,” ngu nna tsun wu ai.
Επιλέχθηκαν προς το παρόν:
NINGPAWT NINGHPANG 15: JCLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Jinghpaw Common Language Bible © Bible Society of Myanmar, 2009.