Marko 6
6
Wɔpo Yesu wɔ Nasaret
(Mateo 13.53-58; Luka 4.15-30)
1Na Yesu fii hɔ kɔe, na ɔbaa ne kurom; na n’asuafo no dii n’akyi. 2#Yoh 7.15 Na homeda dui no, ofii ase kyerɛkyerɛe hyiadan mu; na nnipa pii a wɔtee ho dwiriw wɔn na wɔkae sɛ: Ɛhena na oyi nkonyaa nneɛma yi? Nyansa bɛn na wɔde ama no, na saa ahoɔdenne a ɔde ne nsa yɛ yi ase ne dɛn? 3Ɛnyɛ duadwumfo yi ɔyɛ Maria ba no, Yakob ne Yose ne Yuda ne Simon nom nua no ni? Na ɛnyɛ ne nuammeanom na wɔwɔ yɛn nkyɛn ha yi? Na ɔyɛɛ hintidua maa wɔn. 4Na Yesu see wɔn sɛ: Nidi mmɔ odiyifo, gye ne kurom ne n’abusuafo mu ne ne fi. 5Na wantumi anyɛ anwonwade biara bio wɔ hɔ, gye ayarefo kakraa bi na ɔde ne nsa guu wɔn so saa wɔn yare. 6Na wɔn gye a wonnye nni no yɛɛ no nwonwa. Na okyinkyinii nkuraa no ase hyiae, na ɔkyerɛkyerɛe.
Yesu soma dumien no
(Mateo 10.1; 10.9-15; Luka 9.1-6)
7 #
Luka 10.1
Na ɔfrɛɛ dumien no baa ne nkyɛn, na ofii ase somaa wɔn baanu baanu, na ɔmaa wɔn ahonhom fi so tumi. 8Na ɔhyɛɛ wɔn sɛ wɔmmfa biribiara nntu kwan, gye poma nko ara; wɔmmfa aduan anaa kotoku, anaa sika wɔ wɔn abɔso mu; 9na wɔnhyɛ mpaboa. Nso monnhyɛ ntade abien abien! 10Na osee wɔn sɛ: Baabiara a mobɛhyɛn ofi bi mu no, ɛhɔ na montena nkodu sɛ mubefi hɔ akɔ. 11Na wɔn a wɔrennye mo na wɔrentie mo asɛm no, sɛ mufi hɔ rekɔ a, momporoporow mo nan ase tutuw nni wɔn adanse. 12Na wɔkɔe kɔkaa asɛm sɛ wɔnsakra wɔn adwene. 13#Yak 5.14-15 Na wotutuu ahonhommɔne bebree, na wɔde ngo sraa ayarefo pii saa wɔn yare.
Osuboni Yohane kum
(Mateo 14.1-12; Luka 9.7-9; 3.19-20)
14Na ɔhene Herode tee; efisɛ na Yesu din atrɛw, na ɔkae sɛ: Yohane a anka ɔbɔ asu no anyan afi awufo mu, enti na ahoɔdenne yi yɛ adwuma wɔ no mu. 15Na ebinom sɛ: Ɛyɛ Elia; ebinom nso se: Ɛyɛ odiyifo te sɛ adiyifo no mu biako. 16Na Herode tee no, ɔkae sɛ: Yohane a mitwaa ne ti no, ɔno na wanyan. 17Na Herode no ara asoma ama wɔabɛsɔ Yohane mu akyere no ato afiase ne nua Filipo yere Herodia nti, efisɛ waware no. 18#Lew 18.16 Na Yohane aka akyerɛ Herode sɛ: Wunni ho kwan sɛ woware wo nua yere! 19Na Herodia nyaa no menasepɔw, na ɔpɛe sɛ okum no, nanso wantumi. 20Na Herode suro Yohane, efisɛ onim sɛ ɔyɛ onipa trenee ne onipa kronkron; na ɔbɔɔ ne ho ban, na ɔretie no a, ne ho yeraw no pii, nanso ɔde anigye tiee no. 21Na da a ɛsɛ dui a Herode redi n’awoda no, ɔtow pon maa n’atitiriw ne n’asafohene ne Galilea mpanyimfo, 22na Herodia no ara babea bae bɛsawee, na ɔsɔɔ Herode ne wɔn a wɔne no te adidii no ani. Ɛnna ɔhene see ababaa no sɛ: Bisa me biribiara a wopɛ, na mɛma wo. 23#Est 5.3; 5.6 Na ɔkaa no ntam sɛ: Ade biara a wubebisa me no, mɛma wo, de akosi m’ahenni fa so. 24Na ofii adi kobisaa ne na sɛ: Dɛn na minkobisa? Na ɔkae sɛ: Yohane a ɔbɔ asu no ti. 25Na ntɛm ara ɔde ahoɔhare baa ɔhene nkyɛn bekaa sɛ: Mepɛ sɛ wode Yohane suboni ti to prɛte mu ma me mprempren. 26Na ɛyɛɛ ɔhene yaw pii, nanso ne ntam ne wɔn a wɔne no te adidii no nti, wampɛ sɛ ɔkame no. 27Na ntɛm ara ɔhene somaa ɔbrafo hyɛe sɛ wɔmfa Yohane ti mmra. Na ɔkɔe kotwaa ne ti afiase hɔ, 28na ɔde ne ti no too prɛte mu bae, na ɔde maa ababaa no, na ababaa no de kɔmaa ne na. 29Na n’asuafo tee no, wɔbɛfaa n’amu no, na wɔde kɔtoo ɔboda bi mu.
Asomafo no sanba
30 #
Luka 9.10
Na asomafo no boaboaa wɔn ho ano baa Yesu nkyɛn, na wɔbɛkaa nea wɔyɛe ne nea wɔkyerɛkyerɛe no nyinaa kyerɛɛ no! 31Na osee wɔn sɛ: Mo nso mommra mmɛsen nkɔ sare so fa baabi, na monkɔhome kakra! Na wɔn a wɔreba ne wɔn a wɔrekɔ dɔɔso, na wɔannya adagyew annidi po.
Yesu ma nnipa mpemnum aduan
(Mateo 14.13-21; Luka 9.11-17; Yohane 6.1-13)
32Na wɔde ɔkorow siim mu kɔɔ sare so fa baabi. 33Na nkurɔfo huu wɔn sɛ wɔrekɔ, nso na pii nim wɔn; na wɔnam fi nkurow no nyinaa mu tutuu mmirika kɔɔ hɔ, na wotwaa wɔn ano. 34#Mat 9.36 Na Yesu sii fam no, ohuu nkurɔfokuw pii, na wɔyɛɛ no mmɔbɔ, efisɛ na wɔte sɛ nguan a wonni hwɛfo; na ofii ase kyerɛkyerɛɛ wɔn nneɛma pii.
35 #
Mar 8.1-9
Na onwini reyɛ adwo no, n’asuafo no baa ne nkyɛn bɛkae sɛ: Ɛha yɛ sare so, na onwini reyɛ adwo; 36gya wɔn kwan na wɔnkɔ mfuw ne nkuraa a atwa ahyia yi ase nkɔtɔ abodoo bi nni. 37Na obua see wɔn sɛ: Mo ara momma wɔn biribi nni! Na wosee no sɛ: Yɛnkɔ nkɔtotɔ abodoo denare ahanu, na yɛmfa mma wonni anaa? 38Na osee wɔn sɛ: Abodoo ahe na mowɔ? Monkɔ nkɔhwɛ! Na wɔkɔhwɛe no, wɔkae sɛ: Anum ne mpataa abien. 39Na ɔhyɛɛ wɔn sɛ wɔmma wɔn nyinaa ntenatena ase akuwakuw sare momono no so. 40Na wɔtenatenaa ase akuwakuw, ɔha ɔha ne aduonum aduonum. 41#Mar 7.34 Na ɔfaa abodoo anum ne mpataa abien no, na ɔhwɛɛ ɔsoro hyiraa so, na obubuu abodoo no, na ɔde maa n’asuafo no sɛ wɔnkyɛ mma wɔn; na ɔkyekyɛɛ mpataa abien no nso mu maa wɔn nyinaa. 42Na wɔn nyinaa didii, na wɔmeemee; 43na wɔtasee mporoporowa nkɛntɛn dumien mama ne mpataa no nso bi. 44Na wɔn a edii abodoo no ano si mmarima mpemnum.
Yesu bɔ mpae
(Mateo 14.22-36; Yohane 6.15-21)
45Na ntɛm ara na opiapiaa n’asuafo no sɛ wɔnkɔ ɔkorow mu, na wonni n’anim nkɔ asuogya noho, Betsaida fam, na onnya nkurɔfokuw no kwan ansa. 46Na ɔma wɔkɔe no, ɔkɔɔ bepɔw so mpaebɔ.
Yesu nantew po so
47Na eduu anwummere no, na ɔkorow no wɔ po no mfinimfini, na ɔno nko ara wɔ fam. 48Na ohuu wɔn sɛ wɔrebrɛ ahare mu; na mframa rehyia wɔn. Na ɛbɛyɛ anɔpahemahema nnɔnabiɛsa ne nnɔnsia ntam no, ɔnam po ani baa wɔn nkyɛn, na ɔrepɛ atwa wɔn ho. 49Na wohuu no sɛ ɔnam po no ani no, wosusuwii sɛ ɛyɛ ɔsaman, na wɔteɛteɛɛm; 50na wɔn nyinaa huu no, na wɔn koma tui. Na ntɛm ara ɔne wɔn kasae, na osee wɔn sɛ: Momma mo bo ntɔ mo yam! Ɛyɛ me; munnsuro! 51#Mar 4.39 Na ɔkɔɔ wɔn nkyɛn ɔkorow no mu no, mframa no gyaee. Na wɔn ho dwiriw wɔn boroo so. 52Na wɔante abodoo ho asɛm no ase; efisɛ wɔn koma apirim.
Genesaret ayaresa
53Na wotwae no, woduu Genesaret asase so, na wosii fam. 54Na wofii ɔkorow no mu no, ntɛm ara na wohuu no, 55na wɔde mmirika kokyinii asase a atwa ahyia no nyinaa so, na wofii ase soaa wɔn a wɔn ho nyɛ wɔn den kɛtɛ so de wɔn baa baabiara a wɔtee sɛ ɔwɔ. 56#Mar 5.27-28 Na baabiara a ɔkɔe, nkuraase, anaa nkurow mu no, wɔde ayarefo beguu gua so, na wɔsrɛɛ no sɛ ɔmma wɔnka n’atade ano nnwow nko ara; na dodow a wɔkaa no no ho yɛɛ wɔn den.
Επιλέχθηκαν προς το παρόν:
Marko 6: ATWDB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Revised Akuapem Twi DC Bible © Bible Society of Ghana, 2017.