Lukas 12
12
O Jesus sikavel katar e kojaipe
Mt 10.26-27
1Chidinailo but baro sueto, pe gachin kai ustavena iek avere. O Jesus dia orba mai anglal pe disipulonenchar ta phenda lenge:#Mt 16.6; Mk 8.15.
Arakhen tumen katar o kojaipe e fariseonengo. 2Soke sogo si gurudino ka sikadol, ta sa so cherdol po chorial ka llangliolpe.#Mk 4.22; Lk 8.17. 3Goleke, sogo phendem tumenge ando truniariko, ka asundol ando villelo. Ta sogo phenden po chorial phangle udarea, ka urkinle upral pe chera.
Katar si te dara
Mt 10.28-31
4Amalen, tumenge phenav, morabi te na daran katar e llene kai mundaren e esnaga, soke mapalal nasti cheren tumenge niso ios. 5Me ka phenav tumenge katar morabi te daran:
Tumen morabi te daran katar gua kai lel o zivoto ta mapalal si gazda te chudel le ando tufano. Ea, katar gua si te daran.
6¿Ni bichindon panch chirikliorra pe dui tolaricha? A o Del ni bristarelpe katar ni iek lendar. 7A llik e bal tumare soreke si llinde e Devletar iek po iek. Goleke na daran:
Mai mol tumen neko but chirikliorra.
Phen e llenenge kai pacha ando Jesus
Mt 10.19-20; 12.32; 10.32-33
8Phenav tumenge kai vareko te phenela kai pinllarel man angla e llene, i o Chavo e Manuseko ka phenel kai pinllarel le angla e suechura e Devleke. 9A o lleno kai phenela kai ni pinllarel man angla e llene, i o Chavo e Manuseko ka phenel kai ni pinllarel le angla e suechura e Devleke.
10O Del ka prostil llik gole llene kai ka kusela e Chave e Manuseke. A ni ka prostil gole llene kai kusela e Santone Duo.#Mt 12.32; Mk 3.29.
11Kana ka inllaren tumen ande khanllira e judionenge, o angla e llene kai chinen e krisa ta angla e sudura, na daran sar ka chacharen tumen o so ka phenen, 12soke kana ka avel gua vreme te den orba, o Santo Duo ka sikavel tumen so te phenen.#Mt 10.19-20; Mk 13.11; Lk 21.14-15.
E dar kai si ande love
13Iek lleno maskar e llene phenda e Jesuseke:
Kovachi, phen me phlaleke te del man e love kai peren man katar so mukla amenge amaro dad.
14A o Jesus phenda leke:
¿Ko phenda tumenge kai me ka chinav tumenge e kris o kai me ka lacharav gala ezgode maskar tumende?
15Ta i phenda:
Arakhen tumen katar llia e lovengi. Soke o zivoto ni istardol pe ezgode kai si e manuse.
16Ondaka o Jesus phenda lenge gaia paramichi:
Saia iek lleno barvalo, kai leki phuv dia but lliu. 17O barvalo thoda te mislilpe:
¿So ka cherav? Inai man kai te guruvav mo lliu. 18Ta phenda vou peke:
Ia llanav so ka cherav. Ka peravav gala chera kai si man te guruvav o lliu, ta ka cherav aver mai bare, te guruvav sa mo lliu ta sa so si man. 19Ta mapalal ka phenav me mange:
Amala, si tut but ezgode gurudine bute bursenge, muk te lelpe tutar o chiñipe, ja, pi, ta veselisar cho zivoto. 20A o Del phenda leke:
Dilea, isto allive ka mere, a so si tut gurudino ¿kake ka achel? 21Isto gia cherel o lleno kai chidel o barvalipe vou peke, a angla o Del vou si chorro.
O Del arakhel pe chaven
Mt 6.25-34
22Mapalal o Jesus phenda pe disipulonenge: Gava phenav tumenge:
Na brigin tumen pala so ka jan te zivin, ni pala e patave soia ka premenin tumen. 23O zivoto mol le mai but neko o jape, ta e esnaga mai mol neko e patave. 24Dikhen pe chiriklia:
¿Ni thoven e simiche ande phuv ta ni ikanen o lliu kana bariol, ta inai len chera te guruven o lliu, a o Del sa iek del len te jan? ¡Ni mol tumen mai but neko e chiriklia! 25A o manus mai te brigilpe, ¿sai ka cherel te zivil iek llive mai but? 26A te nasti cheren ni e ezgoda mai minoni, ¿soke brigin tumen pala ogola ezgode?
27Thoven sama sar barion e lulunlla kai ni radin ta ni cheren peke patave. A phenav tumenge kai ni o charo o Salomon sa pe barimaia ni furiadilo sargo iek lulunllin.#1 R 10.4-7; 2 Kr 9.3-6. 28A o Del te furiavel gia o zelenipe, kai allive si ando vos ta kai thiara ka phabardol ande furnava, ¿Pe gachin mai but ka furiavel tumen, manusalen kai inai tumen pachape? 29Goleke, na llan brigime, te roden so ka jan ta so ka pien. 30Soke gala si e ezgode kai brigin e llenen e suetoke, a tumen si tumen iek Dad kai llanel sa so trubul tumen. 31Goleke, roden e charoina e Devleki, ta ka len sa gala ezgode.
Barvalipe ando miloso
Mt 6.19-21
32Tumen sen me bakre, na daran. Tumen ni sen but, a o Dad, kai si lacho, mangla te del tumen e charoina. 33Bichinen so si tumen, ta den golen kai trubul len. Cheren tumenge anbave kai ni ka pharradon ta barvalipe ando miloso kote kai inai o son, kai o chorano nasti del andre ta kai ni e papuruga nasti zatril. 34Soke kote kai si tumaro barvalipe, i kote ka avel tumaro lio.
Morabi te prezon
35Si te aven lacharde ta tumare lampare phabarde#Mt 25.1-13; Mk 13.34-36. 36sargo sluge kai aduricharen te irilpe lengo gazda katar o biau, ta gia kana ka irilpe ka marel po udar, te putaren leke oma. 37Blagosime e sluge kai ka aven llungade kana ka irilpe lengo gazda. Chachimaia phenav tumenge kai isto o gazda ka phenel lenge te besen pe sinia ta ka thovel angla lende o jape. 38Blagosime si von, te malada len llungade makar avela po dopas e riateki o mai anglal te llivosaol. 39Ta llanen gaia ezgoda, o gazda iekhe chereko te llanela ande savo saiato ka avel o chor, ni mukela nika te del ande leko cher te choren le. 40I tumen morabi te aven lacharde, soke o Chavo e Manuseko ka avel ando saiato kai tumen ni llanen.#Mt 24.43-44.
O lacho ta o bilacho sluga
Mt 24.45-51
41O Pedro puchla le:
Gazda, ¿gaia paramichi phendan la amenge o saurrenge?
42O Gazda phenda:
¿Ko si o sluga chacho ta vreno kai leko gazda mukel lete e llenen katar po cher, te sai den len te jan orta po vreme? 43Blagosime o sluga kai kana avel leko gazda malavel le kai cherel po rado. 44Chachimaia phenav tumenge kai o gazda ka thovel le te gazdaril pe sa leko lachipe. 45A gua sluga te mislisailo kai o gazda ni ka avel gia oma, ta marel ogole slugen ta i e diskinien, ta thovelpe te jal ta te piel ta te matol, 46ondaka ka avel leko gazda o llive kana vou ni mislilape ta o saiato kai vou ni llanel, ta ka dukhavel le, ta ka avel sargo e llene kai ni pachan.
47O sluga kai llanel so mangel leko gazda, a ni prezol ta ni kandel le, ka avel but mardino. 48A o sluga kai ni llanel ta cherel ezgode kai mapalal trubul te mardol, ni ka avel but mardino. Soke goleke ka si dino but, i ka mangelpe letar but. Ta gua kai arakhel but, si te radil ios mai but.
O Jesus, cherel te fuladon e llene
Mt 10.34-36
49Me avilem te phabarav iag pe phuv, ¡ta gia volisardema te avilia phabardi! 50Si te nakhav katar iek baro zumadipe. ¡Ta gia bari duk si mange kai aduricharav te nakhav la!#Mk 10.38. 51¿Tumen mislin kai avilem te anav e pas pe phuv? phenav tumenge kai iok, me avilem te fulavav e llenen. 52Soke katar angle, panch llene katar iek familia ka aven fulade, trin ka murzin pe dui. 53O dad ka murzil pe po chaurro, a e chorri ka avel ande joli pe daia, ta e bori ka avel ande joli pe sasuiaia.#Mik 7.6.
¿Sar ni pinllare o vreme?
54O Jesus phenda e llenenge:
Kana tumen dikhen kai liken e oblakura kotar katar perel o kham, phenen kai ka del peke, ta del peke. 55A kana e balav avel katar o sur, tumen phenen kai ka cherel tatipe, ta cherel tatipe. 56¡Kojamnalen! gia sar llanen prema o miloso sar ka avel o llive, ¿sar ni llanen te pinllaren o vreme kai zivin?
Lachar e joli kai si tut e llenea kai marelpe tuia
Mt 5.25-26
57¿Soke ni chine isto tu e kris katar so si orta? 58Te thovela tut vareko ande kris, ta lla lea kote kai chinen e krisa, cher te lachardo lea mai anglal te ave kote soke si tut vreme, te na inllarel tut angla o krisari. Soke te na cherdan gia, o krisari ka thovel tut ande sudonenge va, ta e sudura ka thoven tut ande rubie. 59Phenav chuke kai ni ka like kotar lligo ni ka pochine suako groso.
Επιλέχθηκαν προς το παρόν:
Lukas 12: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.