Lukas 11
11
O Jesus ta o molipe
Mt 6.9-15; 7.7-11
1Iek llive o Jesus molilape pe iek rig, ta kana achilo te molilpe, iek katar leke disipulura puchla le:
Gazda, sikau amen te moli amen, isto gia sar sikada o Juan pe disipulonen.
2O Jesus phenda lenge:
Kana ka molintumen phenen gia:
Dade, blagosime te avel cho anav,
Te avel chi charoina.
3De amen o marrno kai trubul amen suako llive.#Pr 30.8-9.
4Prostisar amenge amaro bilachipe,
soke i amen prostisara sa golen kai cherde amenge o bilachipe.
Na thov amen ando zumadipe.
5Ta i phenda lenge:
Misli amen kai iek tumendar si le iek amal, ta pe dopas e rachaki llal kai cho cher ta phenel chuke:
Amala, de man unllile trin marrne, 6soke iek amal murno ladela ta si mande gosto, ta inai man niso te dav le. 7Chachimaia o gua ni ka phenel leke andral:
Na de man joli. O udar si phanglo, ta me chaurre ta i me pelam amenge, nasti ustav te dav tut niso. 8Phenav tumenge kai makar ni ustela te del le vareso kai si leko amal, ka ustel samo te na del le joli, ta ka del le sa so trubul le. 9Goleke me phenav tumenge:
Mangen ta ka avel tumenge dino, roden ta ka malaven, maren po udar ta ka putaol tumenge. 10Soke gua kai mangel, lel, ta gua kai rodel malavel, ta gua kai marel po udar, putaol leke.
11¿A vareko tumendar kai si dad, tromal te del pe chaurre iek sap kana mangel letar iek macho, 12o te del le iek alakran kana mangel letar iek arrno? 13A tumen, kai sen bilache ta llanen te den lache ezgode tumare chaurren, ¡pe gachin mai but o Dad kai si ando miloso ka del o Santo Duo golen kai mangen le letar!#Jn 14.13-14; 15.7,16; 16.23-24; 1 Jn 3.21-22; 5.14-15.
Thoven e dos po Jesus
Mt 12.22-30; Mk 3.20-27
14O Jesus tradela iekhe llavolo kai muklaia nemao iekhe llene. Ta kana o llavolo likisto, o nemao dia orba. E llene chudisaile pala gua, 15a nesave llene phende:#Mt 9.34; 10.25.
O Beelzebu, o gazda e llavolonengo diale e zor te chudel avri e llavolonen.
16Aver llene, te zumaven le, mangle letar te cherel iek ezgoda Devlikani te chacharel kai saia bichaldo e Devletar.#Mt 12.38; 16.1; Mk 8.11. 17A vou, sar llanela lenge mislura phenda lenge:
Suako phuv kai si fuladi voi pea zatrilpe, ta nisavo foro o cher kai si fulado vou pea ni ka achel ta sa lenge chera peren iek upral pe aver. 18A isto gia, o Satanas te fuladol isto vou pea, ¿sar ka achel leki zor? Gua phenav tumenge soke tumen phenen kai me tradau e llavolonen pala e zor katar o Beelzebu. 19A te si gia, ¿ko del e zor e llenen kai llan pala tumende te chuden avri e llavolonen? Goleke isto von ka krisin tumen. 20Me te tradau e llavolonen ando anav e Devleko, gua si soke e charoina e Devleki avili tumende.
21Kana iek lleno zuralo si le iek jarni ta arakhel po cher, so si le andre nasti choren le. 22Ta avel iek lleno mai zuralo letar, marel le, lel letar o jarni, ande so uzdilape, ta cherel sogo kamel leke ezgodenchar.
23Kogo inai manchar, marelpe manchar, a kogo ni chidel manchar, rispil.#Mk 9.40.
O duo bilacho kai irilpe
Mt 12.43-45
24Kana iek duo bilacho likel katar iek lleno, llal pe thana suke ta rodel kai te besel te lelpe letar o chiñipe. Ta kana ni malavel kai, mislilpe:
Ka iriv man kai mo cher katar likistem. 25Ta kana irilpe, malavel gole llene sargo iek cher metime ta lachardo. 26Ondaka llal ta anel efta duonen mai bilache neko vou, ta sa den te zivin ande gua lleno, ta achel mai bilacho neko omanglal.
So mol chachimaia
27Kana o Jesus phenela gala alava, maskar e llene iek diskinia urkisarda:
¡Blagosime e diskinia kai bianda tut ta bariarda tut!
28Vou phenda:
¡Mai blagosime si e llene kai asunen so phenel o Del, ta cheren so vou phenel!
Mangen katar o Jesus iek ezgoda Devlikani
Mt 12.38-42; Mk 8.12
29Sa mai chidiniaona e llene truial o Jesus, ta vou phenda lenge:#Mt 16.4; Mk 8.12.
E llene katar gava vreme si bilache, mangen te dikhen iek bari ezgoda Devlikani, a so ka delpe lenge te dikhen si so avilape e Jonasea. 30Soke isto gia sar o Jonas saia iek ezgoda kai dikhol e llenenge katar o foro Ninive, i o Chavo e Manuseko ka avel iek ezgoda kai dikhol e llenenge katar gava vreme.#Jon 3.4. 31Ando llive e krisako e charoina katar o Sur ka ustel gale vichaia ta ka dosarel la soke voi avili katar o goia rig e phuviaki te sai asunel o bizaipe katar o Salomon, a so si kate si mai baro neko o Salomon.#1 R 10.1-10; 2 Kr 9.1-12. 32Ta i e llene katar o Ninive ka usten ando llive e krisako, kana ka chindol kris e llenenge katar gava vreme, ta ka proketin la. Soke e llene katar o Ninive irisaile kana asunde so phenela o Jonas, ta so si kate si mai baro neko o Jonas.#Jon 3.5.
O villelo e esnagako
Mt 5.15; 6.22-23
33Niko ni phabarel iek memeli ta thovel la pe iek than gurudino, o telal tala iek kavi, morabi te thodol upre, te sai avel villelo golen kai den andre.#Mt 5.15; Mk 4.21; Lk 8.16. 34Che akha si o villelo e esnagako, te si che akha lache, sa chi esnaga ka avel la villelo. A te si bilachi, chi esnaga ka avel ando truniariko. 35Arak o villelo kai si ande tu te na avel truniariko. 36Te avela sa che esnaga villelo ta inai ande le nisavo truniariko, ka dikhe sa bristomaia, sargo iek memeli kai kletosarel pe villeloia.
O Jesus phukavel e fariseonen ta e gazden e zakonoke
37Kana o Jesus achilo kai dela orba, iek fariseo ikharda e Jesuse te jal kai po cher, ta o Jesus dia ande leko cher ta beslo pe sinia. 38O Fariseo chudisailo kai o Jesus ni cherda prema sar cheren e judiura, kai jalaven pe va mai anglal te jan o marrno. 39A o Gazda phenda leke:
Tumen e fariseura jalaven avrial o taso ta o charo, a andral tumen sen chorane ta bilache. 40¡Dilalen! ¿Ni llanen kai ko cherda so si avrial, cherda i so si andral? 41Den tumari esmola katar so si tumen andral, ta gia ka achel sa chisto.
42¡Tesko tumenge, fariseura!, kai ikanen e Devleke o diesmo katar e menta, katar e ruda ta katar suako zelenipe, a ni thoven sama katar o chachipe ta katar o volipe e Devleko. Gava si te cheren, ta te na muken te cheren i ogola ezgode.#Lv 27.30.
43¡Tesko tumenge, fariseura!, kai mangen te den tumen e estoliche mai anglune ande khanllira e judionenge, ta kana phiren pe droma mangen te den tumenchar orba e llene liubaimaia.
44¡Tesko tumenge, kai sen sargo limoria kai ni dikhon, ta e llene ni llanen ta ustaven len!
45Ondaka iek katar e gazda e zakonoke phenda leke:
Kovachi, kana tu phene gua e fariseonenge dukhave i amen.
46A o Jesus phenda lenge:
¡Tesko i tumenge, kovache e zakonoke!, kai thoven pe averenge zea o pharipe kai niko nasti inllarel, a tumen ni kamen te dodin gua pharipe ni iekhe naiea.
47¡Tesko tumenge kai cheren e limoria e profetonenge isto golenge kai tumare purane mundarde len! 48Golea achardol kai si tumenge drago so cherde tumare purane, soke von mundarde len a tumen cheren lenge limoria.
49Goleke, o Del ande po bizaipe phenda:
Ka bichalav tumenge poraukura ta apostolura, ta ka mundaren nesaven ta ka mangen te maren averen. 50O Del ka mangel e llenendar kai zivin ande gava vreme te pochinen o rat sa e profetonengo sar kana cherdili e phuv, 51#2 Kr 24.20-21.katar o rat e Abeleko llik kai e Zakariaseko, gole kai mundarde maskar o than e kurbanengo ta o santuario. Goleke phenav tumenge kai o Del ka mangel katar e llene gale vremeke te pochinen lengo meripe.#Jen 4.8.
52¡Tesko tumenge, kovacha e zakonoke, kai lien tumenge o klucho e bizaimako a isto tumen ni den andre ta ni muken te den andre golen kai len te den!
53Kana o Jesus likisto kotar, e kovacha e zakonoke ta e fariseura jolaile but, ta thode te joliaven le ta te puchen le but ezgode, 54ta golea mangena te kojadol isto ande pire alava.
Επιλέχθηκαν προς το παρόν:
Lukas 11: BACHRO
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Biblia ande chib Romani © Sociedad Bíblica Chilena, 2018.