Mitteko 2
2
Owa wa Munepa Waweella
1 #
Lev 23.15-21; Deu 16.9-11 Nllapo na Ehakallallo ya Pentekosite naphiyalliiwa, athu ayo yamukhulupilila Yesu yaatthukumana vanipuroni nimodda. 2Moorurumusa wahiiweya ovenyera oddullu wonanko woopa wa ephevo yawoopiha nave yahiiweya mpa mutthemwene yakhanlliiwammo. 3Nave yaawoona wonanko mallumi amunllo ayo yakawaneya nave ekeraattheya va arive muthu. 4Attheenaayo yaaddalliwa ni Munepa Waweella nave yahaamba ollota ellotello ddoohidduwanyeya* kaambiiwa Munepooyo waaweeriha wi ewore ollota mwawi ddiiddo.
5Vano waakhallattho Ayuda ookhalla o Yerusalemu, ayo yamullapella Mulluku nave oovenyera o ellapo ddittheddene dda vatthimva. 6Athu anchichi yaatthukumana yiiwalliiwa woopa wa ephevonko. Attheenaayo yaattikhina vawi yahiiwa ellotello ddiwa ddillotiwaka ni ookhulupililaayo. 7Vano yaattikhina nave yaakhwa mullakallaka ellota wi, “Athu attheene enallotaalla khe a o Galileya? 8Vano ddeereyille mwawiidde wi attheenehi niwiiweke mu ellotello ddahu? 9Nivenyenre o ellapo dda Partia, Mediya, Elamu, Mesopotamiya, Yudeya, Kapadokiya, Ponto, Asiya,* 10Frijiya, Pamfuliya ni Iguputo ni ezigawo dda Libiya waatamella o etawoni ya Kurene. Amoddahi nivenyenre o Roma, 11Ayuda owaakattho ayo yahiri Ayuda koma yaanathwara echikhulupililo ya Ayuda navettho amoddahi nivenyenre o ellapo dda Krete ni Arabu. Attheenehi ninnawiiwa alliwaayo mu ellotello ddahu dda mitteko dduullupalli nnddo enre Mulluku.” 12Yattikhinalliiwa, ekhwille mullakallaka yaakohana wi, “Yeella sika tini?”
13Koma amoddaayo yaamoona waattheya ookhulupililaayo ellotaka wi, “Athu yaalla evonille ottheka.”
Ollalleya wa Petro
14Vano Petro ahiimella vamodda ni amurummwa amodda khumi ni mmoddaalle nave olliyooyo ahaamba ollota mookhuwa wi, “Nyu Ayuda, nyu attheene munakhalla mu Yerusalemu, kiiwellelleni miyaano wi mwiiwesese nndda. 15Athwaalla khevonille ottheka moollikana ni mmo munaganizereenyu vawi enthawi eri 9 koloko ohinase. 16Ddineereyanndda sika ddallotelliwe ni namallotella Yowele wi,
17 #
Yow 2.28-32
Mulluku aallota wi, ‘Vatulli viwa kineerohella munepaaka va athu attheene,
aniinyu aallopwana ni aatthiyana eneerollotella,
athu awuulluvalla eneerolloha,
asombwe eneerewoona masomphenya.
18Enthawi yeeyo kineerokitthiha Munepaaka,
naari va akaporo aallopwana ni aatthiyana.
Sika eneerollotella.
19Kineerewooniha ddoottikhiniha,
oddullu ni ellapo yavatthi,
nikhame, munllo ni mwiisi woottikana.
20Nndduwa nineerothiima,
mweeri oneerofiira wonanko nikhame
nihinaphiye nllapo nuullupalli ni nawoopiha na Apwiya.
21Vano attheene ayo enaawiithane mu nnddina na Apwiya eneerovullusiwa.’ ”
22“Iwellellani mawaalla, Aisraele nyu! Yesu a o Nazareti aari muthu arumiwe ni Mulluku wa nyuwaano. Mulluku ahuusimikizellani vaweerani ddoottikhiniha ni ezizindikiro oweella mwa olliyooyo variyari vanyu wonanko nyuwaano aneenaanyu moonilleenyu. 23#Mat 27.35; Mrk 15.24; Luk 23.33; Yoh 19.18Yesu yoolla aavelleelliwa moollikana ni opaalla wa Mulluku vawi aadduwella khalle wi mwaamutthomeya vamutandani nave mumwiipha voomuvelleellani wa athu oonanara. 24#Mat 28.5,6; Mrk 16.6; Luk 24.5Koma Mulluku aamuvenyiha wa ookhwa, amuttaphulla o ddoovoreya dda okhwa kaambiiwa khawaari wooworeya wi okhwa omuwanddeellelle. 25#Mas 16.8-11Vawi Davide aallota dda olliye wi,
‘Erive enthawi kinnaahiya vamurimani Apwiya,
vawi eri onnattanatta waka, sika khaavo oyo anaakitikhe.
26Ekaamba ya yeella murimaaka woohakallalla,
mawaaka aaddalla ni ohakallalla!
Kineerokhallana ni otiyerella,
27kaambiiwa kinnakhulupilila wi khamukihiya o ellapo ya ookhwa,
nave khamukihiya mi oororomelleyaanyu aweella wi kuntelle mu mahame.
28Munnakitthoonyihella ettilla ya okumi,
ophwanyeya wanyu onnakihakallalliha wunchichi miyaano.’ ”
29“Aisraele akhwaaka, kinaphwanella wi kuulleelleni moosimikizella dda nikhollo nahu Davide. Aakhwa avitthiwa mu mahame nave mahamaaye aakhallavo ophiyera ollello. 30#Mas 132.11; 2 Sam 7.12,13Vallethi aarittho namallotella nave aadduwella wi, Mulluku aallupella wi mmodda a edduullu ddaye aneeroowa avollowe omwenaaye. 31Davide ahoona khalle ddinaaweere Mulluku muhoollo nave aallota dda ovenya wa ookhwa wa Mesiya* allotilleeye wi,
‘Khaahiyiwe o ellapo ya ookhwa
mwiillaaye khawuuntelle mu mahame.’
32Olla tti Yesu oyo Mulluku amuvenyihalleeye wa ookhwa nave attheenehi niri amboni a yeella. 33Aawellihiwa oddullu akhalla onnattanatta na Mulluku, Attiitthinnya nave ohaakhella Munepa Waweella ovenyera wa olliye moollikana ni mmo alonjezilleeye khalle. Munooneenyu ni wiiwanndda tti Munepa Waweella anivahilleeye. 34#Mas 110.1Davide khaawenlle oya oddullu sika khaaddaaka yeekha alloteeye wi,
‘Apwiya yahaalleella apwiyaaka,
“Khalla o nnattanatta naka
35ophiyera kaatthattusalle adanaawo
voonyingallavo manyallwaawo.” ’
36“Vano Aisraele attheene edduwellesese wi Yesu olla mwamutthomeyilleenyu vamutandani, tti oyo Mulluku amweenreeye wi akhalle Apwiya navettho Mesiya!”
37Athwaalle yiiwalliiwa ddenndda, yaahoowa m'murimani mwiwa nave yaamukoha Petro ni amurummwa amoddaayo wi, “Vano neere tini, akhwiihinyu?”
38Nave Petro aallota wi, “Arive muthu a nyuwaano arukunuwe murima nave abatiziwe mu nnddina na Yesu Khrisitu wi machimwaaye ekhululukiwe nave aneerewaakhella emphaso ya Mulluku, Munepa Waweella. 39Vawi olonjeza wenko tti wa nyuwaano ni wa aniinyu ni athu attheene ayo eri woorekama, attheene ayo Mulluku Apwiihu anaawiithaneeye.”
40Petro ahaallalleyella athwaayo ni mawu oohiyanahiyana manchichi aalleella moollipa wi, “Mwiivulluse nyookha o ollaka onawanko wa athu oonanara amuttano!” 41Sika athu ayo yaakhenlle mawaaye yaabatiziwa. Vaakhalla athu 3,000 ayo yaanjereriwe omullokoni wa athu ookhulupilila nllapo nenna. 42Athwaayo yaatthukumana vamodda wi ehuddereke wa amurummwaayo, enaattana, enamumeyameya buledi#2.42 enamumeyameya buledi: Omumeyameya buledi yaari echizindikiro ya mugonelo wa Apwiya. nave enamucha nimodda owaakattho enavekella nimodda.
Waattana wa ookhulupilila
43Ddoottikhiniha ni ezizindikiro ddinchichi ddaheeriwa ni amurummwaayo nave athu attheene yahoova. 44#Mit 4.32-35Ookhulupilila attheenaayo yaavirellella otthukumananko mu waattana wiwa ni okawana ddeko ddiwa. 45Yaanakulliha emata ddiwa ni ddeko ddiwa ddoohiyanahiyana, enakawana attheene makobiraayo, ollikana ni ohoowa wa muthooyo. 46Nllapo ni nllapo yaanatthukumana mu enyumba ya Mulluku ni murimiiwa muttheene moowiiwanana. Navettho yaanamumeyameya buledi#2.46 yaanamumeyameya buledi: Onani 2.42. enamucha m'mawaniwa ni okawana yoocha moohakallalla ni murima woottaphuwa. 47Nave yaanamutitimiha Mulluku nave yaanakondiwa ni athu attheene. Vano nllapo ni nllapo Apwiya yanawaanjerera omullokonooyo ayo yavullusiwe.
Επιλέχθηκαν προς το παρόν:
Mitteko 2: MW2019
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
The Bible in Elhomwe © The Bible Society of Malawi, 2019.