Luka 22
22
1Lola ilitsuva ilivalatse lya sivanda isitsilansabe ilyuvita vi Pasa ilitavwa, lyahegelye. 2Avene avateketsi avavaha nava mańakalata vakatsovana itsa kumbuda vakata: Tugahage ndeti nave? Ulwakuva vavadwadaga avanu. 3Mańa USetano vi ingye mwa Juta uvi vampye ilya Va-mu-Kalyoti uvi ale va kitsigo navavili. 4Vi akabiha kuvateketsi avavaha nakuvalolela-Tempeli, akatsitsova navo itsa kuvapa UJesu. 5Pwu avene vakahekela vakata: Tukukuhombaga indalama. 6Pwu umwene akidika. Pwu akalonda pavunnonu pakuvapa pavutsilavanu vongosu.
7Pwu ilitsuva lya sivanda isitsilansabe likitsa ilya kuhinzila nakakolo ka Pasa. 8Pwu UJesu akavasuṅa va-Petele nu-Johani akata: Mbihage nkagahage akakolo ka Pasa tukalitsage. 9Avene vakata: Vwita tugahe ndaku? 10Umwene akavavula akata: Lola ngave musike mbutsenge mulya, pwu mulaganila numunu uvi itwikile ninzilo jya magasi. Vi nkankongage nkingilage nave nńumba umwu ikwingila. 11Mwu nkatsove nave umweneńumba nkatetsage: Ummańisi atye: Nkambutsage nkatetsage: Ińumba jya kulilamwo akakolo ka Pasa nuńe navakongi vango jyu jiliku? 12Pwu ndavonaga umwene ikuvavonya ińumba imbaha ijyu vatandike nisitamilo. Mwu nkagahage mumwa akakolo. 13Pwu vakavuka vakatsivona nduvwuavavulile. Pwu vakagaha akakolo ka Pasa.
14Mańa vwu pasike pakavalilo ka kulila, pwu akatama pakulya navapositili. 15Pwu akavavula akata: Ndasukilwe jilweli sitso ukuta tulitsage twivoni UPasa uju nune nuńe vwu tango ndikanale ukukuvilwa. 16Mańa ndikuvavula ndita: Ndihumaga ilelo iji nandilavuje ukulya UPasa uju ndilatsisikaga upwu ndinditsage unduti kuludeva lwa Nguluve. 17Pwu akatola ikinwelo akasana akata: Koti ikinwelo iki mugavanage. 18Mańa ndikuvavula ndita ndihumaga ilelo iji nandilavuje ukuńwa uvwa seke tsa masilu uvu, ndilatsisika upwu lwitsage uludeva lwa Nguluve. 19Pwu akatola ikivanda akasana akameńulanya akavapa akata: Ugu gwu mmańa gwango ugwiva pakuvaswila uńe. Vwu nkagahage vuvule-vule sikutsoni kavetsage ka kuṅumbuhitsa uńe. 20Nakyene ikinwelo vuvule-vule vwu valye isya kwigoneka, pwu nakyene akatola akata: Ikinwelo iki lwu lwidiṅano ulupya ulwa munkisa gwango uguvadudikye uńe. 21Lola ikivoko kya uvi ikuńendama kyu kili nuńe baha pakisanza kya kulilapwo. 22Umwene Uńamunu vi viki, vi ibiha vuvule nduvwu tsisimilitsivwe ṅani, Lweli uli viki vi munu vi vukumendama! 23Pwu avene vakavutsanya vakata: Vi veni uvi ipela tsitsitsi?
24Pwu vakakaniṅana ulukani umwu vavelye ulwakuta: Ino veni uvi iva vi mbaha twivoni umwutuvelye? 25Umwene akavavula akata: Navakuludeva va vapanzi vikuvalesehetsa ulwa vutwa avanu va vene, navavibite amaka avanu va vene vwu vikuvapa ilya Ndekedeke. 26Uńe lweli vwu ndagahaga vuvule-vule. Bako uńe uvi ita ndive mbaha kuvajyango, vi upita ipelage ukuva vi ndebe kuvoni, umwene uvi ita ndive vakuvalongola mbulongolo mbajyango, vi upita ipelage ukuva vakuvavombela ńi vanine. 27Uvi atamile pakulya nuvi ikungegela isinu mbaha vi aliku? Ndita mbaha uvi atamile pakulya. Une Upwu ndikina nuńe ndipelile ukuva va kuvavombela uńe. 28Uńe lweli ńi twavetsaga twivoni nune sikutsoni vwu ndigelivwa. 29Pwu nune ndikavalekela uludeva nuńe nduvwu nune udada andekye uludeva, 30nuńe ukuta tulitsage twivoni nuńe isinu tuńwetsage twivoni vwu nditsile ukwipela ukuva nkuludeva, nuńe ukuta ntamage pasitamilo sya vutwa muhigage isivumbuko syoni kitsigo nasivili sya vańa-Isilaeli.
31Pwu unkuludeva akata: Vi Simoni, Simoni lola USetano avadovile uńe atye ndikavapetage nduvwu umunu ipeta ingano. 32Mańa ndikudovye ulwidiko lwako ukuta lulasilaga. Nuve lungave lusiku ungave uvujile ukilivwike, pwu uvadulusage avanino. 33Umwene UPetele akata: Nkuludeva ndiliṅanihitse ṅani nditye vangave vikukudindila nńumba jya vańololo, vangave vikukubuda, pwu tuve twivoni nune. 34Umwene akanda akata: Ukwa ndikuvule vi Petele, ilelo iji vwu inongove jikanale ukuvika vwu vwibelile kadatu kwane vwu utye nummańili une.
35Pwu akavavutsa akata: Upwu ndivasuṅage inzila, upwu nditetsage kwu bako ukuva nakapako ka ndalama, kwu bako nakasaka ka mbopo, kwu bako nisikato ukuva nasyo, pwu nda mwalemilwe isinge? Avene vakata: Bako nakinu. 36Pwu akavavula akata: Lino uvi ali nakapako ka ndalama pwu akolelage natwene nutusaka twa mbopo vuvule-vule. Lola uvi nali nakinu vi agutsage ugwańingilitsa gwa mwene alondelage ulwuvo. 37Mańa ndikuvavula ndita: Lisigye tango ukwitsa ilimeńu ilikunzova uńe mwa kalata ilita: Vammanzitse navagalo. Mańa goni amameńu agikunzova une, gwu gikwitsa gisila. 38Avene vakata: Nkuludeva, lola tulinatso ińuvo ivili. Pwu umwene akata: Vuvule.
39Pwu akahuma panzi akabiha kukidugala kya mono nduvwu agahaga sikutsoni. Navakongi va mwene vakankonga. 40Lino vwu avye atsisike pwu akavavula akata: Mwisajage ulugelo ukuta lulavagwilaga. 41Umwene akidatula kuvene akabiha akavona umwu kavelye akapindo ka kulahila akaganga. Pwu akasugama pasi akisaja 42akata: Vi dada ungave vwidikaga uve ukuta ikinwelo iki kilutage pane! Mańa nene viki itsu ndinogilwe uńe, ńage jyuve tsitsu ungave unogilwe uve. 43Pwu akambonekela unsuṅwa va kukyańa akandulusa amaka. 44Lino vwu inumbula jili nkyańa vuvule uludwado, pwu akijumilitsa sitso nukwisaja. Pwu inugutila jya mwene jikava nduluholosolelo lwa nkisa vwu jigwa pasi. 45Pwu akasisimuka umwuisajaga akabiha upwu vale avakongi va mwene akatsivona vagonile itulu jya lususuvalo. 46Akatsova navo akata: Pwu mwigona kiki itulu lino? Musisimukage mwisajage ulugelo ukuta lulavitsilaga.
47Pwu vwu alipakutsova amameńu aga pwu akakeńemuka, avanu ikipuga vuvule nu-Juta uva kitsigo navavili alongwe mbulongolo ihegelela kwa Jesu ita nukuntsiba kundomo. 48Umwene UJesu pwu akata: Vi Juta lwu lutsibo lwa vumańane ulwu utye lwu vikummańilaga Uńamunu uvwu uvapye. 49Avene avale nave UJesu vwu vatsivwene umwu tsilotsitse, pwu vakambutsa vakata: Nkuludeva nda tuvahome pange nulwuvo? 50Pwu ujyunge unjyavo akantema unkivaga va nteketsi umbaha akampyatula imbulukutu jya kukivoko ikyandyo. 51Pwu UJesu akanda akata: Leka vuvule. Pwu akamwabasa imbulukuta pwu jikavuja jikamela. 52Pwu UJesu akatsova navo avateketsi avavaha navalolela-Tempeli navańivaha avenekivumbuko voni avamwitsye akata: Upwumwitsile kukuńibata une pwu mutye tutsikumwibataga ummitsi mukolye nińuvo nisonzo. 53Sikutsoni upwu tukinige twivoni mwa Tempeli pwu namuńibiti kiki? Mańa lino kwu kavalilo kińo aka, gwu maka ga muṅisi aga.
54Pwu vakamwibata vakangega vakatsikwingila nave nńumba jya nteketsi umbaha. Umwene UPetele akankonga pavutale. 55Pwu vakakotsa umwoto nduvanza ngati pakutama pakwota umwoto. Namwene UPetele akatama navo pakwota umwoto. 56Pwu ujyunge umunu va vene undala akambona vwu atamile mundulangalilo lwa mwoto, akandungamila pakundola akata: Namwene uju avetsaga numunu ulya. 57Umwene UPetele akibela kumwene akata: Vi ndala mańa nandimmańili lusiku. 58Vwuvakinile padebe pwu akitsa ujyunge umunu akata: Nuve vwu vanino valya. Umwene UPetele akabela akata: Lugosi bako. 59Lino vwu palutile pakavalilo kapamato pwu akima pakuńwilitsa ujyunge akata: Jilweli namwene avetsaga nave ulya. Mańa va mu-Galilai. 60Umwene UPetele akabela akata: Lugosi nanditsimańili itsu vwitsova. Pwu ṅani-ṅani vwu ali pakutsova vuvule-vule pwu ing'ongove jikavika. 61Pwu unkuludeva akakilivuka akandola UPetele. Pwu UPetele akakumbuhitsa ilimeńu ilyu unkuludeva ambulile ilyu atye: Vwu niṅongove jikanale ukuvika vwu vwibelile kadatu kwane vwu utye nandimmańili. 62Pwu akahuma panzi akatsilila ulwihotsi uludindila nakunsingo.
63Avene avanu avamwibite UJesu vwu vakankinila vuvule vakantova. 64Vakangubikila kumiho, vwu vakangubikye vambutsage vatetsage: Ukwu ulagage lino veni uviakutovile? 65Vakanduka nitsinge itsa madusi ńongosu vuvule.
66Vavwene vwuvukye pavusiku pwu vakalundamana avańivaha avenekivumbuku navateketsi avavaha navamańakalata vakangega kululundamano lwa vahiganongwa. 67Pwu vakata: Ungave veve vi Kilisiti pwu utuvulage. Umwene akanda: Apene ndingave ndatetsaga ndivavule pwu namukwidika. 68Ndingave ndatetsaga ndivavutse itsinge pwu namukuńanda. 69Itengulaga lino Uńamunu itamaga kukivoko ikyandyo kya Nguluve Unńamaka. 70Pwu voni vakambutsa vakata: Pange uli nswambe va Nguluve? Pwu umwene akata: Nduvwu mwitsova, vi juńe. 71Pwu avene vakavulana vakata: Pwu twatetsaga tutsilondage tsiki itsinge itsa kumigila vwu twivoni tupulike itsu itsova mundomo.
Επιλέχθηκαν προς το παρόν:
Luka 22: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.