Luka 21
21
1Pwu UJesu akinamuka akavalola avamosu vwu vilaha isyu vagegile nkihava kya kulaha isya kulaha. 2Akambona nundala ujyunge unswile ungatsu vwu namwene ilaha mumwa utusenti tuvili. 3Pwu akavavula avakongi va mwene akata: Jilweli ndikuvavula ndita: Undala unswile ungatsu uju avalutile voni ukulaha. 4Mańa voni ava upwu vilaha isya kulaha kwa Nguluve, pwu vitola vwu vavwene sidigile, umwene uju mbugatsu vwa mwene alahile isyu ali nasyo isya munzala.
5Pwu avange vakadega vakata: Udege ińumba jya Tempeli vanotsitse namaganga amannonu nutunu twa kuvalatsa! Pwu umwene akavavula akata: 6Tsoni itsu mwilola lino,–likwitsa ilitsuva pwu nalilalekwe iliganga ilinge palinine ilyu nalilamamulwe. 7Pwu vakambutsa avene vakata: Vi mańisi tsu tsikwitsa ndali tsitsitsi? Nikimańilo kyu kiliku ikya kumańilapwo ukuta pwu tsiva pakwitsa tsitsitsi? 8Umwene akata: Mbandikage mulole ujyunge alavatekaga. Mańa valitsa va vongosu valagendela mwitavwa lyango valata: Nene. Valata umwaka gwitsile. Vwu ndavakongaga. 9Lungave lusiku ngave mupulika niligoha nuvuhambuke avanu pwu ndakeńemukaga, Mańa tsu upita tsilongolage ukuvoneka tsitsitsi, mańa itsene itsa kuvusililo vwu tsikanale tango. 10Pwu akavavula akata: Nikivumbuko ikinge kya vanu kilakihambukila ikivumbuko ikinine nunkuludeva va kilunga ikinge alamambukila unkuludeva unine uva kilunga ikinge. 11Nikilunga kilalindima pongosu nsilunga nsilunga. Ninzala jilagwa ńongosu tsilava ninduve. Kukyańa silavoneka isipelwa isipelaludwado nisidego isivaha. 12Vwu tsikanale tsoni tsitsitsi pwu valavibata uńe valavaswima valavagega nanńumba tsa vene tsa kwisajilamwo nanńumba tsa vańololo, valavalusila nakuvakuludeva nakuvalolelasilunga ulwakuva ndi nilitavwa lyango. 13Tsu tsikuvitsila tsitsitsi ukuta tsive tsa kumańilamwo uńe. 14Mwidulusage munumbula tsińo mutetsage pwu natulisagile ṅani itsa kwitsovela. 15Mańa pwu ndilavapa namameńu mundomo nuluhala ulwu voni avikuvamena lulavalema nukuvanda nukuvalema uńe. 16Valavalusa navahotsi vińo navamyavińo navalukololwińo navajińo, Avange uńe ndabudwa. 17Voni vakavasula ulwakuva ndi nilitavwa lyango. 18Mańa nulunge ulujwili lwa pantwe gwińo nalulavejangike. 19Uvwumi uńe ndakavila mbusindamasu uvwu ngave mukijumilitsa.
20Lungave lusiku ngave mbwene isipuga sya ligoha sivunyengelye uvutsenge mu-Jelulsalemu, pwu mumańage vwiva pakupalaṅanivwa, 21Pwu vakańilage nsidugala voni avali mu-Jutai navali mbutsenge mu-Jelusalemu vahame vabihe mbunge navali nkilunga kya mumbale valitsaga ukwingila mu-Jelusalemu. 22Mańa gwu matsuva ga luvujitso gago, pwu tsilitsa tsilasila tsoni itsivigilwe mwa kalata. 23Muli viki ńi vadala ńi vańimali ńi mukwosa avańa mmatsuva aga! Mańa valakuvilwa sitso avankilunga kyoni, lulava lu luvipo lwene ulwa kukivipila ikivumbuko kya vanu ava. 24Valagwa uvwuge vwa lwuvo. Valavakunga vavalusilage nsilunga syoni sya vapanzi. Uvutsenge vwa mu-Jelulsalemu valakada namalunde avapanzi sikutsoni vuvule ukutsisika upwu gilasila imyaka gya vapanzi.
25Pwu silavoneka isya kudega namwitsuva namumwetsi namunondwe. Nkilunga umwu avanu isivumbuko sya vapanzi valańilitsivwa uludwado, valavona kujagile kulekile vuvule vwu najińanza jikwujila amajiga. 26Avanu valatsilika nuludwado vwu amiho galotsitse ku itsikukitsilaga ikilunga. Ulwakuva navene navamaka ava kukyańa valajunganikaga vuvule. 27Pwu valambonaga Uńamunu ukwitsila mwivingo vwu ikwitsa namaka nuvudwadwa uvwongosu. 28Lungave lusiku ngave mbwene tsitengula ukwitsa tsitsitsi, pwu mwitse ndungamile amiho mwinamuke imitwe gińo ulwakuva ukuvangwa kwińo kuhegelye.
29Pwu akavavula nikihwanihitso akata: Ndolage unkuju nimibiki gyoni. 30Upwu ngave mwivona gilemba pwu mulolela baho vwu ujyunge navavulili, pwu mumańila baho ukuta iminga jihegelye. 31Vuvule-vule nuńe ngave mutsivwene tsitsitsi ukwitsa, pwu mwitse nkamańilage baho ukuta lwitsile uludeva lwa Nguluve. 32Jilweli-lweli ndikuvavula ndita: Avanu va lino navalajage voni vwu natsipelilwi tango tsoni tsitsitsi. 33Nikya kukyańa nikya pasi ikilunga syu silajagaga, amameńu gango gwu nagalajage lusiku. 34Mbandikage ndolage inumbula tsińo tsilipelaga nzito nukusyota nukwinegelela nukwisagila isinu sya pakyańa apa, pwu mungavone ilitsuva lilyo livambulinye vuvule ukwitsila vwu mukanale ukwinotsa. 35Ulwakuva lilavambulanyaga vuvule ukuta kipindo kińalwonzo ukuvitsila voni avanu avatsengile poni pakyańa pakilunga. 36Mbetsage miho sikutsoni mwisajage nuńe ukuta mwitse nkanogele ukupona tsoni itsiva pakwipela nukwima kumiho ku Ńamunu.
37Sikutsoni pamuńi akavavula inongwa mwa Tempeli avanu, pakilo pwu akahuma mbutsenge akatsigona pakidugala kya mono. 38Voni avanu vakalava ukubiha mwa Tempeli vakata tupulikage itsu itsova umwene.
Επιλέχθηκαν προς το παρόν:
Luka 21: Kinga
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kikinga © British and Foreign Bible Society, 1961.