Yohane 21
21
1Numa Yesu kakumanyisa lingi kwa vaseṛo vamwi kulya nruveń ya Tiberia. Na ikumanyisa kakumanyisa kuri: 2Veekee andu emwi Simon Petiro na Toma avaangwaa wa yaasa, na Natanaeli wa kulya Kana ya Galilaya na vana va Sebedayo na vengi vavili va vaseṛo vamwi. 3Simon Petiro kavaia: Nkee yenda nndewara makunga. Vakamwia: Neese teendaa andu emwi nawe da. Vakakwimboo vakaaṛukia ngalaveń. Na kio kilya nta iwara kindo. 4Ili kundetaṛakana, Yesu kasalala mbaai ya nruva. Kake vanalosho vamwi nta vandemanya yye ndi. 5Yesu kavauṛa: Vana vakwa, moore shoonga? Vakamwia: Wode. 6Kavaia: Oloteń nreyo wanu taari ya uko usha lwa ngalava, Ilyo mukooyaa. Vakaolota-fo mireyo nta ikimakii yomua kiimba kya wiingi lwa makunga. 7Llyo nseṛo ulya Yesu amwitie mbele kaia Petiro: A te ni Nndumi! Ili Petiro andeita sheeli ni Nndumi, kaṛaa nseto wamwi, fulya eekee kya ruu kakutuula nruveń asaṛikie Yesu. 8Na vaseṛo valya vengi vakasha na ngalava veesuṛuaa nreyo wishule makunga. Fulya mbaai ikee kwaasha ndi, ikee andu a marambo mayana avili tubu. 9Ili vandeoloka mbaai vakakooya-fo muro wa makaa mwate na makunga mmeekeṛie kwa ule ya makaa andu emwi na nkate. 10Yesu kavaia: Nndeń kiindi kya makunga alya mwawwara. 11Simon Petiro kaaṛukia ngalaveń kasuṛua nreyo na alya mbaai uwore makunga manini iyana na makumi araanu na araru. Na nreyo nta iranduka lla kasa makunga eekee meengi. 12Nae Yesu kavaia: Oṛeshoń mutuke! Na kari ka vaseṛo eeifoo nta umwi andekaṛia imwura: Ni iwe i, ndi. Fulya veemmanyaa yye Nndumi. 13Yesu kasha kawara nkate kavaavia andu emwi na makunga. 14Nalyo likee lya kararu Yesu andekumanyisa kwa vaseṛo vamwi ili andemaa iṛuka kwa vafu.
15Ili vamaa ituka, Yesu kauṛa Petiro: Simon wa Yohane, kushikundie kita iva vengi? Petiro kamwia: Ee Nndumi, kwishi sheeli nkukundie. Na Yesu kamwia: Isa maanri akwa! 16Kamwuṛa lingi lya kavili: Simon wa Yohane, kushikundie? Petiro kamwia: Ee Nndumi, kwishi sheeli nkukundie. Na Yesu kamwia: Isa mburu takwa! 17Kamwuṛa lya kararu: Simon wa Yohane, kushikundie? Petiro kanaria, fulya andemwuṛa lya kararu: Kushikundie? Kamwia: Nndumi, iwe kwishi findo foose, kwishi kwamanya nkukundie. Na Yesu kamwia: Isa mburu takwa! 18Nkue nakuia kya dede: Lia kukee nkoo kwikufingiaa nseto wafo ku muni kwakwendia kundo kwakunda. Kake ili kukuaa kusaaṛaa maako afo na nndu ungi akufingaa na ikurwaa kundo kutafurie. 19Na kiteveto kamwia kuro, naamu amanyise mikae ya ufu Petiro afwaa na iṅinisa nalo Iṛuva. Ili andemaa irera kuro kamwia: Shisoṛaań! 20Petiro kalla numa kalolia mwanalosho ulya Yesu amwitie mbele avarie numa. Nae yye ulya eefwitanii na Yesu lia valye shoonga ilya ya waaṛo. Nae ni ulya auṛa Yesu: Nndumi, ni i akuringaa? 21Ili Petiro alolia nseṛo ulya, kauṛa Yesu: A uu naare kikaa kiwie ye? 22Yesu kamwia: Kwakooya mfuraa ito akaa na muu kumande nuuyaa kyakutiṅa-fo ki? Iwe shisoṛa da! 23Na kirero kyo kikakwana kwa vandu va Yesu veenumbuaa: Mwanalosho to akifwaa ndi. Kake Yesu aia Petiro mwanalosho to atakifwaa ndi, kake niikai amwia: Kwakooya mfuraa ito akaa na muu kumande nuuyaa kyakutiṅa-fo ki?
24Na uu mmwanalosho ulya anderambua mboni ti na ititisiṛa. Neese tiishi sheeli irambua lyamwi llya dede. 25Fiifo na findo fingi fiingi Yesu andefitana. Nafo kifo fiitisiṛwaa kimwi kimwi, nkusaṛie nta isanga lyoose liimakii iiṅania fitabu fo fiitisiṛwaa ndi.
Επιλέχθηκαν προς το παρόν:
Yohane 21: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.