Yohane 20
20
1Na nkonu wa mbele usoṛie Sabato ngama kio llyo Maria wa kulya Magidala afika alya mbangeń. Kakooya iwe lia lyamuutwa io mbangeń. 2Llyo auya eerishaa nnu kafikia Petiro na mwanalosho ulya ungi Yesu amwitie mbele kavaia: Vamiimboo Nndumi ifo mbangeń, neese tiishi kundo vanrwaa ndi. 3Kyasia Petiro kakwimboo na mwanalosho ulya ungi vakawara shia ya ifika mbangeń. 4Vakarisha woose vali vavili. Kake mwanalosho ulya ungi karisha mmwasi kairia Petiro mbele. Kava wa mbele ifika mbangeń. 5Kakwinika kaimaya kalolia miseto ilya ya irika ikee io si ataare andeaka nafo. Na Simon Petiro kasha anrie numa. Kaira neefo mbangeń kalolia miseto ilya iirwayee-wo. 7Na kirami kilya kya yangua nrike kilya kiifingiee nrweń wamwi kirwaye andu emwi na filya fa irika ndi, kiikee kyosose kikarawa andu ayo kyo kyeni. 8Llyo na mwanalosho ulya ungi andeva wa mbele ifika mbangeń andeaka nae. Kalolia kakusura. 9Mfulya kitaare veemaaṛukio̱o̱ mmitisiṛie sheeli: ”Kyawara aṛuke kwa vafu“. 10Kyasia vanalosho valya vakakwimboo vakauya kyeń.
11Maria Magidalena kasalala alya wooṛo ya mbanga ilya eeiyaa. Ili eeiyaa kaimaya mbangeń. 12Kalolia-fo vamalaika vavili vakee-fo rembo vaṛee miseto myeelwa. Umwi akee nrweń na ungi marendeń alya nnyiṅa wa Yesu wiaṛio̱o̱. 13Nawo vakamwuṛa: Nkiki kikee ikulirisa, yeyo? Nae kavaia: Vamiimboo Nndumi wakwa, nań niishi kundo vandenrwaa nafo ndi. 14Ili eereraa kuro, kainduka kalolia Yesu aselele kitaare eeshi yye Yesu. 15Yesu kamwia: Yeyo, nkiki kikee ikulirisa? Kukee iṛuya i ṛo? Maria kakusaṛa mmuni wa kivasha kyo. Llyo amwia: Kwakooya ni iwe kwamwimboo Mbee, kushiie alya kundenrwaa, nań nndemwonduaa-wo. 16Llyo Yesu awaanga: Maria uu! Kamwaṛukia kammanya kamwia: Llosha wakwa, ni iwe ṛo? 17Yesu kamwia: Manya kutashibaane, amu nanrwa kwa Nde yakwa ndi. Enda kwa vanavamae vakwa kundevaia: Nkee irwa na ule kwa Nde yakwa akee na Nde yanu. Nkee irwa kwa Iṛuva wakwa akee na Iṛuva wanu. 18Maria Magidalena kaenda kandeongoya vanalosho mboni ii kavaia: Nallolia Nndumi. Kavaongoya na kilya amwia.
19Na nkonu ulya muni wa mbele usoṛie nkonu wa Sabato kumiila vanalosho vakakusandia, na myaango iirayee kiimba kya yeṛea Vayuda. Lia eni Yesu kasha kasalala karikari kawo kavaia: Kaań na unambwe! 20Ili andemaa irera kuro kavaorusa fidawu fa maako amwi na uvari lwamwi. Vanalosho vakafura ili vandelolia Nndumi. 21Yesu kavaia lingi: Kaań na unambwe! Sheeli Nde andeshiruma niń, nkuro nań nkee imuruma. 22Neeli andemaa irera ifi kavaivilia kavaia: Warień Mumuyo Nsongori! 23Vandu mwawatia mareko awo vammaa itio̱. Na vandu mwawafingia mareko awo vammaa ifingio̱.
24Na Toma ni umwi wa vanalosho va Yesu, eevaangwaa lingi wa yaasa. Nae eekee andu emwi nawo lia Yesu ashe kari kawo ndi. 25Na vanalosho valya vengi vakashemwia: Tallolia Nndumi. Nae kavaia: Kwakooya ntaloliaa niń shi muni fiwoṛo fa misomari ifo maakoń amwi na ibaana fiwoṛo filya fa misomari na nni wakwa na ibaana kiwoṛo kilya kya uvari lwamwi na uko lwakwa shi muni, niirikiaa kutu ndi. 26Ili mikonu nyaanyi indesia, vanalosho vamwi veekusandiee lingi numba ilya sheni na Toma eekee andu emwi nawo. Lia eni Yesu kasha alya vakai, na numba iirayee. Kasalala kari kawo kavaia: Kaań na unambwe! 27Numa kaindukia Toma kamwia: Oṛesho lla maako akwa! Baana na fiwoṛo fakwa na nni wafo! Nnde na uko lwafo kubaane nalo kiwoṛo kya uvari lwakwa! Kutakive mushinunua, kuve mushikusura! 28Toma kamwaṛua kamwi a: Ee Nndumi, ni iwe Nndumi wakwa na Iṛuva wakwa! 29Yesu kamwia: Mfulya kwanshilolia na miso nkyo kyakukangia kwashikusura. Nakuia: Ngoma valya vashikusuraa kitaare vashilolie! 30Kyasia iifo na myorusie ingi miingi Yesu andeitana mbele ya vanalosho vamwi kitaare mmitisiṛe kunu kitabuń iki. 31Kake ii yantisiṛwa, amu mukusure sheeli Yesu nKristo Mwana wa Iṛuva, na kiimba kya ikusura li mulolie muu mukuvavie na irina lyamwi.
Επιλέχθηκαν προς το παρόν:
Yohane 20: RWK72
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.