MATAYO 12
12
Kugimbika Sabato
(Mrk. 2:23-28; Luk. 6:1-5)
1Igheri lila Yesu akavecha he mighunda msi wa sabato; varateri vakwe vakasikia nza, vakavoka kumurura vilengele vya ngano, vakala. 2Vafarisayo vekivona huvo, vakamti, “Rereha! varateri vako veketa kila chesikundijwa msi wa sabato. 3Akavati, “Temusomie kila Davidi eketie hala esikie nza ye hamwe na vaghenji vakwe? 4Vuntu eingie he nyumba ya Mrungu, akala ila mikate ya luvonyesho esechedi kuliwa niye neri vala vaghenji vakwe, esire vatasi du? 5Kana temusomie he myomongwa iti, msi wa sabato, vatasi he nyumba ya mtaso vekonda sabato, neri chesioka nzune? 6Mira nimutio, Aha hena ye m’baha kukela nyumba ya mtaso. 7Mira nanga mwetwarije viteto ivi vyeti, ‘Cho neenda ni mbonea, neri si itasi,’ temwekivalaha vala vesina nzune. 8Ambu Mwana wa Mntu niye Mfumwa wa sabato.”
Kubanja muntu ena mkono weholoje
(Mrk. 3:1-6; Luk. 6:6-11)
9Akavuka aho, akaingia he sinagogi yavo. 10Na aho hena mntu ena mkono weholoje. Vakamvwija vekiti, “Ni chedi kubanja mntu msi wa sabato?” nesa vavone cha kumkolila masa. 11Naye akavati, “Ni ani he unywi ena igonji imwe, lekigwa he ikongo msi wa sabato, esikaligure akalikweja? 12Hamao, mntu ekelile igonji kantu ako? Heicho kikundijwa kuketa chedi msi wa sabato.” 13Niho akamti ula mntu, “Ronga mkono wako!” Akauronga; ukabanda, ukaoka wedi sa ula ungi. 14Mira vala Vafarisayo vakafuma, vakateta njama vuntu venemkoma.
Mndima esaghurwe
15Mira Yesu ekiramanya akahafuma. Vantu vajinki vakamratera, vakabanjwa vose. 16Akavakokontia iti vasiremghamba, 17nesa kila chetetiwe ni mroti Yesaya kikoloke ekiti,
18Rereha, uu ni mndima wangu nemsaghure,
Mkunde wangu eye nemwizihirwe;
Ninegera Mpeho wangu heye,
Naye enebirikira Vakiisanga mburi ya mlaho.
19Tekakete nkani, neri tekalonze,
Neri mntu tekasikie izii lakwe uko nzieni;
20Mjungu wenyanyaruke tekaubae,
Na ikumbi lefuka tekalijimije,
Mhaka ekineete mlaho wekivota;
21Kangi izina lakwe Vakiisanga venelivikia ikuji.”
Yesu ekana iti tekinya mpepo kwa nzinya yakwe Belzebuli
(Mrk. 3:20-30; Luk. 11:14-23; 12:10)
22Igheri lila akaetiwe mntu mwenye mpepo, ituntu kangi esiidimateta; akam’banja; niho ula esiidimateta akateta na kuvona. 23Mavungano akamaka, vekiti, “Uu si mwana Davidi?” 24Mira Vafarisayo vekisikia, vo vakati, “Uu tefunya mpepo, esire kwa Belzebuli m’baha wa mpepo.” 25Yesu ekimanya madunganyo avo, akavati, “Kila vufumwa vwekikuomanya vujenye, vukondika; na kila muzi kana nyumba yekikuomanya njenye, yesikaimuke. 26Kakicha Shetani emfunya Shetani, ekuomanya ye mwenye, na vufumwa vwakwe vuneimuka ze? 27Nami nekifunya mpepo kwa Belzebuli, hama vana venyu vefunya kwa izina lakweni? Heicho, avo nivo venemulaha. 28Mira mi nekifunya mpepo kwa Mpeho wa Mrungu, aho vufumwa vwa Mrungu vwamuzia. 29Kana mntu eidimaze kuingia he nyumba ya mntu mwenye nzinya na kutaha ntanu jakwe, esinaronga mchunga ula mwenye nzinya? niho eneidima kutaha vya nyumba hakwe.
30“Mntu esiho nami ni mnzo wangu; na mntu esivunganya hamwe nami ezarazara. 31Heicho nimutio, Kiia ibanu na kila kiteto cha falaja, vantu veneshighiwa, esire he kumfalaja Mpeho Wedi tevekashighiwe. 32Na kila mntu enemteta Mwana wa Mntu kintu, eneshighiwa, mira ula emteta Mpeho Wedi tekashighiwe ye, neri he si ii neri he ila ingi yeneza. 33Ughosheni mti kuoka wedi, na ntunda jawo jioke jedi; kana ughosheni mti kuoka mvivi, na ntunda jawo jioke mbivi. Ambu mti umanyikia he ntunda jawo. 34Unywi lukolo lwa nyoka mwe vavivi, muidimaze kuketa vyedi? Ambu vila vyeizue he ngoro nivyo momo weteta. 35Mntu wedi he kila chedi ena efunya vintu vyedi; na mntu mvivi, he kila kivivi ena, efunya vivivi. 36Kila kiteto vantu vekiteta chesina nzia, venekivwijwa he msi wa mlaho. 37Ambu he viteto vyako, unetarirwa kitea, kangi he viteto vyako unelahwa.”
Esua kuronga luvengo
(Mrk. 8:11-12; Luk. 11:29-32)
38Niho va kumwe he vaandiki na Vafarisayo vakamgharusha, vakiti, “Mcheji, tuenda utuvonyeshe luvengo.” 39Naye akagharusha, akavati, “Lukolo luvivi, kangi lweshinda, luenda luvengo; telukainkwe luvengo, esire lula luvengo lwa mroti Yona. 40Ambu sa vuntu Yohana eikae he ndeni ya nyangumi misi mitatu na vio vitatu, nirehuvo, Mwana wa Mntu eneikaa ndeni he msau misi mitatu na vio vitatu. 41Msi wa mlaho vantu va Ninive veneimuka hantu hamwe na lukolo ulu, navo venelulaha; ambu vo vekinabirikirwe ni Yona, vachwa mti. Na aha hena m’baha kumvecha Yohana. 42Ula msi wa mlaho mfumwa wa kiche wa isanga la mondo wa ishi, eneimuka hantu hamwe na lukolo ulu, alulahe; ambu ye efumie uko hantu masanga ehakane, akaza kusikija kiugho chakwe Salomoni; na aha hena m’baha kumvecha Salomoni.
Mpwasi he miikarire yesikoloke
(Luk. 11:24-26)
43“Mpepo mbivi yekifuma he mntu, ivecha uko hantu hesina mpombe yekienda hantu ha kuhema, isivone. 44Nyuma iti, ‘Ninehunduka he nyumba yangu hantu nefumie,’ yekiza ikicha ireho vula, yehaghiwe na kuhambwa. 45Hala indi itonga kuonja mpepo jingi mfungate, mbivi kuivecha; jiingia na kuikaa ho, na miikarire ya ula mntu ya uko nyuma, ioka mivivi kuvecha ila ya kuvoka. Nivwo vuntu cheneokia ulu lukolo e luvivi.”
Vundughu vwa idi
(Mrk. 3:31-35; Luk. 8:19-21)
46Aho ekiteta na luvungano, mlala wavo na vajinawe vakaza, vakaimuka nze, vekienda kuteta naye. 47Mntu mmwe akamti, “Rereha, mlala wenyu na vajinao veimuke nze, veenda kuteta nawe.” 48Akamgharusha ula emvwirire, akamti, “Mlala wetu ni ani, na vajinawa ni vahi”? 49Akavarongia varateri vakwe mkono, akati, “Rereha mlala wetu na vajinawa! 50Ambu ula eronga kila Vava wangu wa uko wanga ekunda, uo niye mjinawa na rumburya na mlala wetu.”
Επιλέχθηκαν προς το παρόν:
MATAYO 12: CHSUNT67
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Chasu New Testament © Bible Society of Tanzania, 1967.