MATAYO 13
13
Mfwanano wa mhandi
(Mrk. 4:1-9; Luk. 8:4-8)
1Msi ula Yesu akafuma he nyumba, akaikaa si mbaimbai ya bahari. 2Vantu vajinki vakamvungania, mhaka akaingia he ngilawa, akaikaa si, na ala mavungano a vantu akaimuka mbaimbai ya bahari. 3Akavavwira mburi nyingi kwa mifwanano, ekiti, “Mhandi efumie kurahanda mbeu jakwe. 4Aho ekihanda mbeu kumwe jikagwa mbaimbai ya nzia, ndeghe jikaza jikajila. 5Jingi jikagwa he mrarabwe, hantu hesina msau mungi: jikamea fia, kila hesina msau weseie. 6Izuva lekinavae jikanyaruka, kila jesina miji jikaoma. 7Jingi jikagwa he mivwa; na ila mivwa ikaeha, ikajibandanya. 8Jingi jikagwa he msau wedi, jikagera ntunda, mwe ighana, ingi makumi mtandatu, na ingi makumi matatu. 9Mwenye masikio nasikie.”
Cheshigha echeja kwa mfwanano
(Mrk. 4:10-12; Luk. 8:9-10)
10Varateri vakwe vakamzia, vakamti, “Hanini weteta navo kwa mifwanano?” 11Akagharusha, akavati, “Unywi mweinkiwe kumanya mpiso ja vufumwa vwa uko wanga, mira vo teveinkiwe. 12Ambu ula ena kintu eneinkwa, naye eneongejijwa fa; mira ula esina, hata kila ena nacho eneghumbwa. 13Heicho niteta navo kwa mifwanano; kila vekirereha tevevona, na vekisikija tevesikia, neri kutwarija. 14Na kiteto cha mroti Yesaya kikoloka hevo, cheti,
Kusikia munesikia, mira temukatwarije;
Kurereha munerereha, mira temukavone.
15Ambu ngoro ja ava vantu jagirisima,
Na masikio avo teesikia nezo,
Na meso avo veshinjije;
Nesa vasirevona kwa meso avo,
Vakasikia na masikio avo,
Vakatwarija na ngoro javo,
Vakagharuka, nikavakija.
16Mira vwedi ni vwa meso enyu, kila evona; na masikio enyu kila esikia. 17Ambu, kididi nimutio, Varoti vajinki na venye kitea veendie mno kuvona ivi unywi mwevona, vasivivone; na kusikia ivi unywi mwesikia, vasivisikie.”
Mhererejo wa mfwanano wa mhandi
(Mrk. 4:13-20; Luk. 8:11-15)
18“Ana unywi sikijeni mfwanano wa mhandi; 19Kila mntu esikia kiteto cha vufumwa asikitwarije, ula mvivi eza apekule kila chehandiwe he ngoro yakwe; uo niye ahandiwe hafuhi na nzia. 20Na ula ehandiwe he mrarabwe, uo niye ula esikia kiteto, akakighuhia hala indi na kuizihirwa; 21mira heye tehena miji, ekiikaa du kakenda; hekiza igheri la mavwasi kana kurierishwa vuntu vwa icho kiteto, egwa hala indi. 22Na ula ehandiwe he mivwa, uo ni ula esikia icho kiteto mira mabinuko a si ii, na kuishwa ni mari vebandanya icho kiteto, kisigere. 23Na ula ehandiwe he msau wedi, uo ni ula esikia icho kiteto akakitwarija; uo niye egera ntunda, mmwe ighana, ungi makumi mtandatu, ungi makumi matatu.”
Mfwanano wa mani
24Akavafunyija mfwanano ungi, ekiti, “Vufumwa vwa uko wanga vwefwanane na mntu ehandie mbeu jedi he mghunda wakwe. 25Mira vantu vekinashinjie, hakaza mzo wakwe, akahanda mbeu ya mani ghati he ngano, mani nao ukavoneka. 26Uko nyuma ngano yekieha na kugera, ala mani nao akavoneka. 27Niho vandima va ula mwenye nyumba vakatonga vakamti, ‘Mfumwa, tuhandie mbeu yedi he mghunda wako? Hama mani afumahi hewo?’ 28Akavati, ‘Ni munzo eketie huvo’ Vandima vakamti, ‘Uenda tutonge tureavunganya?’ 29Akavati, ‘Hai, musirevunganya mani, hangi mukajutanya hamwe na ngano. 30Shighani viehijanye mhaka igheri la lufindiki; na igheri la lufundiki ninevati varechwa: Rongavunganyani mani muachunge miagho, muashote; mira ngano ivunganyeni he gu yangu.’”
Mfwanano wa mbeu ya haradali na chachu
(Mrk. 4:30-34; Luk. 13:18-21)
31Akavafunyija mfwanano ungi, ekiti, “Vufumwa vwa uko wanga vwefwanane na ntembe ya haradali, mntu eighuhie akaihanda he mghunda wakwe; 32nayo ni ndori kukela mbeu jose, mira yekieha, ioka mbaha kukela mbogha jose, ioka mti, hata madeghe eza kujenga kashasha he matambi awo.”
33Akavavwira wa mfwanano ungi, “Vufumwa vwa uko wanga vwefwanane na chachu, mntu wa kiche eighuhie, akaisankanya na muchu ngero ntatu, muchu wose ukakararata.”
34Ivyo vyose Yesu evwirire mavungano kwa mifwanano, esire kwa mifwanano tevavwirire kintu, 35nesa kikoloke kila chetetiwe ni mroti, ekiti,
Ninevushija momo wangu kwa mifwanano,
Nineteta vila vyevisike too kurumbwa kwa masanga.
Mhererejo wa mfwanano wa mani
36Igheri Yesu akaaghanya mavungano, akaingia na nyumba. Varateri vakwe vakamswia, vakati, “Tufumbulie mfwanano wa ala mani a he mghunda.” 37Akagharusha akati, “Ula mrehanda mbeu jedi ni Mwana wa Mntu; 38ula mghunda ni si ii; jila mbeu jedi ni vana va kifumwa; na ala mani ni vana ula mvivi; 39ula mnzo ehandie, ni Shetani; lufindiki ni mkengelejo wa si ii, na vala vafindiki ni vamalaika. 40Heicho sa vuntu mani evunganywa na kushotwa he moto, nirevwo vuntu na he mkengelejo wa si ii cheneoka. 41Mwana wa Mntu enetuma vamalaika vakwe, navo venevunganya mavihijo ose na vala vehira vivivi kuvafunya he vufumwa vwakwe, 42na kuvafera he iziko la moto, niho heneketa kuwela na kukereresa majegho. 43Niho venye kitea veneangaa sa izuva uko he vufumwa vwa Vava wavo. Mwenye masikio nasikie.”
Mfwanano wa ndungu, lulu na lwavu
44“Kangi vufumwa vwa uko wanga vwefwanane na ndungu yevisike he mghunda, mntu ekinaivone akaishiia; kwa kuizihirwa, akatonga akatagha vyose ena, akazora ula mghunda.
45“Kangi vufumwa vwa uko wanga vwefwanane na msusuriji eenda lulu yedi; 46naye ekinavone lulu mwe ya zora mbaha, akatonga, akatagha vyose ena, akaizora.”
47“Kangi wa, vufumwa vwa uko wanga vweikee sa lwavu lwegerirwe he bahari, lukavunganya ja kila mbare. 48Lwekinaizue vakalutuja na nkandeni, vakaikaa si, vakavunganya jila jedi he ntanu, mira jila mbivi vakajitagha. 49Na he mkengelejo wa si ii, nievwo vuntu cheneoka; vamalaika venefuma, vaze kung’ola vavivi ghati he venye singisirya, 50vavataghe na he iziko la moto; niho heneketa kuwela na kukereresa majegho.”
51Yesu akavavwija, “Ivyo vyose mwavitwarija?” Vakamti, “Yee!” 52Niho akavati, “Kila mwandiki ena icha la vufumwa vwa uko wanga, efwanane na mwenye nyumba, eng’ola he ndungu yakwe vintu vishaa na vya kae.”
Yesu esuwa Nazareti
(Mrk. 6:1-6; Luk. 4:16-30)
53Niho Yesu ekinakenje iyo mifwanano, akafuma, akatonga. 54Ekinafike he isanga lavo, akavacheja he sinagogi yavo; vakamaka, vakati, “Uu afunyahi kiugho na nzinya vyeringane huvu? 55Uu si mwana wa ula mseremala? Mlala wavo si ula eitangwa Maria? Na vajinawe si Yakobo ne Yose ne Simoni ne Yuda? 56Na varumburye vose tevewaha hetu? Hama uu avoniahi ivi vyose?” 57Vakamvihiwa. Yesu akavati, “Mroti tesova shima, esire he isanga lavo na kaa havo.” 58Neri uko teketie virumo vijinki, vuntu vwa kusaitikija kwavo.
Επιλέχθηκαν προς το παρόν:
MATAYO 13: CHSUNT67
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Chasu New Testament © Bible Society of Tanzania, 1967.