San Marcos 10

Sána̱ꞌa̱ Jesús xa̱ꞌá na̱ tánta̱ꞌá xíꞌin na̱ ntákoo táꞌan

(Mt. 19:1-12; Lc. 16:18)

1Tá nti̱ꞌi, ra ka̱na‑Ña̱ ñuu ikán, ra nta̱kiꞌin‑Ña̱ kua̱ꞌa̱n‑Ña̱ chí Judea xíꞌin chí iinka xiyo itia Jordán. Ra tuku nta̱taka na̱ yuví nu̱ú‑Ña̱, ra ki̱xáá‑Ña̱ sána̱ꞌa̱‑Ña̱ nu̱ú‑na̱ tá ku̱va kíxa va‑Ña̱. 2Ta ku̱yachin tu ntiáꞌvi na̱ fariséo va, ña̱ ná kotontosó‑na̱ Jesús. Ra ni̱nta̱ka̱túꞌun‑na̱‑Ña̱, á va̱ꞌa káa‑ña̱ ña̱ ná ntakoo iin tia̱a ñá síꞌi‑ra̱. 3Suu nta̱kuiin Jesús, káchi‑Ña̱ saá:

―¿Na‑ña̱ kúú‑ña̱ xa̱ꞌntia Moisés nu̱ú‑ntó?

4Ta nta̱kuiin‑na̱, káchi‑na̱ saá:

―Moisés, ra, ta̱xi va‑ra̱ ña̱ ná ntakoo iin tia̱a ñá síꞌi‑ra̱, suu ntútaꞌan tiaa‑ra̱ iin tutu ña̱ ntákoo táꞌan‑na̱.

5Ta ka̱chi Jesús saá:

―Ta̱xi Moisés ná kasa‑ntó ña̱ yóꞌo xa̱ꞌá ña̱ ntakú ini‑ntó. 6Suu nta̱a̱ míí xa̱ꞌá tá sa̱va̱ꞌa Ntióxi̱ ña̱ yúví, “sa̱va̱ꞌa‑Ña̱ ra̱ tia̱a xíꞌin ñá síꞌi”.#Gn. 1:27. 7“Ña̱ ikán, ra̱ tia̱a ntakoo‑ra̱ táta‑ra̱ xíꞌin nána‑ra̱, ra ntakiꞌin táꞌan‑ra̱ xíꞌin ñá síꞌi‑ra̱, 8ra mií‑ra̱ xíꞌin ñá síꞌi‑ra̱ ntáa iin va kuu‑na̱”.#Gn. 2:24. Ña̱ ikán süvi ka u̱vi̱ kúú‑na̱; chi ntáa iin va kúú‑na̱. 9Xa̱ꞌá ña̱ ikán, ña̱ sa̱ntakiꞌin táꞌan Ntióxi̱, ná ntäta̱ꞌví na̱ yuví‑ña̱.

10Tá nti̱ꞌi ni̱xa̱a̱ Jesús xíꞌin na̱ sákuaꞌa nu̱ú‑Ña̱ veꞌe, ra ni̱nta̱ka̱túꞌun‑na̱‑Ña̱ xa̱ꞌá ña̱ ntákoo ra̱ tia̱a ñá síꞌi‑ra̱, 11ra nta̱kuiin Jesús, káchi‑Ña̱ saá:

―Ra̱ ná ntakoo ñá síꞌi‑ra̱, ra ná tanta̱ꞌá‑ra̱ xíꞌin iinka‑ñá, kua̱chi kíxa‑ra̱ nu̱ú Ntióxi̱ xíꞌin nu̱ú ñá síꞌi‑ra̱. 12Ra saá tu, átu ná ntakoo ñá síꞌi ií‑ñá, ra ná tanta̱ꞌá‑ñá xíꞌin iinka‑ra̱, ra kua̱chi kíxa tu ñá ikán va.

Ntúkún Jesús ña̱ va̱ꞌa nu̱ú Ntióxi̱ xa̱ꞌá na̱ válí

(Mt. 19:13-15; Lc. 18:15-17)

13Ki̱xáá‑na̱ xáa̱‑na̱ xíꞌin na̱ válí nu̱ú Jesús ná chinúú‑Ña̱ ntaꞌá‑Ña̱ sa̱tá‑na̱, suu na̱ sákuaꞌa nu̱ú‑Ña̱ ntu̱kue̱ꞌe̱‑na̱ xíꞌin na̱ ikán. 14Ra tá xi̱ni Jesús ña̱ ki̱xa‑na̱ saá, ntu̱kue̱ꞌe̱‑Ña̱ xíꞌin‑na̱, ra ka̱chi‑Ña̱ saá:

―Taxi‑ntó ná kixi na̱ válí nu̱ú‑i̱. Käsi‑ntó nu̱ú‑na̱, chi na̱ xáꞌntia Ntióxi̱ chiñu nu̱ú kúú‑na̱ tá ku̱va na̱ válí yóꞌo. 15Míí ña̱ nta̱a̱ ná ka̱ꞌa̱n‑i̱ xíꞌin‑ntó: ntáa‑na̱ ná ntäkiꞌin Ntióxi̱ ña̱ ná kaꞌntia‑Ña̱ chiñu nu̱ú‑na̱ tá ku̱va na̱ válí yóꞌo küvi ki̱ꞌvi‑na̱ koo‑na̱ nu̱ú xáꞌntia‑Ña̱ chiñu.

16Ra nta̱numi‑Ña̱ míí na̱ válí, ra chi̱núú‑Ña̱ ntaꞌá‑Ña̱ sa̱tá‑na̱, ra ntu̱kún‑Ña̱ ña̱ va̱ꞌa nu̱ú Ntióxi̱ xa̱ꞌá‑na̱.

Iin ra̱ tia̱a kuíka

(Mt. 19:16-30; Lc. 18:18-30)

17Ra tá ka̱na Jesús ña̱ ku̱ꞌu̱n tuku‑Ña̱, ra xínu iin ra̱ tia̱a ku̱yachin‑ra̱ nu̱ú‑Ña̱. Ra nta̱kuntúꞌú sítí‑ra̱ nu̱ú‑Ña̱, ra ni̱nta̱ka̱túꞌun‑ra̱‑Ña̱:

―Mástro va̱ꞌa, ¿na kúú‑ña̱ kasa‑i̱ ná ni̱ꞌí‑i̱ ña̱ kutiaku‑i̱ ntiꞌi saá tiémpo xíꞌin Ntióxi̱?

18Ta nta̱kuiin Jesús, káchi‑Ña̱ saá:

―¿Na chiñu káꞌa̱n‑ún “ra̱ va̱ꞌa” xíꞌin‑i̱, á xíni̱‑ún na kúú‑ña̱ káꞌa̱n‑ún? Köo na̱ va̱ꞌa, saá chi iin nta̱a̱ Ntióxi̱ va kúú Ña̱ va̱ꞌa. 19Xa̱ xíni̱ va̱ꞌa‑ún ña̱ xáꞌntia Ntióxi̱: “Käꞌní‑ún, käka‑ún xíꞌin iinka ná síꞌi átu süu ñá síꞌi‑ún kúú‑ñá, ntükuíꞌná‑ún, ntätúꞌun vatiá‑ún nii säntáꞌvi‑ún na̱ yuví, ra kasa tǒꞌo táta‑ún xíꞌin nána‑ún.”#Ex. 20:12-16; Dt. 5:16-20.

20Ra nta̱kuiin ra̱ tia̱a ikán, káchi‑ra̱ saá:

―Mástro, ntikuíi ña̱ káchi‑ún ña̱á, nta̱a̱ loꞌo ví‑i̱ sáku̱su̱vi‑i̱‑ña̱.

21Ta nta̱kutoꞌni Jesús nu̱ú‑ra̱, ra ku̱ntáꞌvi ini‑Ña̱‑ra̱, ra ka̱chi‑Ña̱ saá:

―Iin ña̱ kúma̱ní nu̱ú‑ún: kuáꞌan, ra xǐko ntiꞌi ña̱ꞌa‑ún, ra taxi‑ún xǔꞌun ikán ntaꞌá na̱ ntáꞌvi. Saá ra, kuu‑ún ra̱ kuíka chí ntiví, ra tá nti̱ꞌi kixi‑ún, [ntakiꞌin‑ún krûsi̱‑ún] ra kunti̱ku̱n‑ún yu̱ꞌu̱.

22Suu míí ra̱ tia̱a ikán ni̱ta̱ꞌvi ini‑ra̱ xíꞌin tu̱ꞌun ni̱ka̱ꞌa̱n‑Ña̱ xíꞌin‑ra̱, ra ku̱suchí ini‑ra̱ kua̱ꞌa̱n‑ra̱, chi ra̱ kuíka kúú‑ra̱.

23Jesús nta̱kutoꞌni‑Ña̱ nu̱ú na̱ ntée ikán, ta ka̱chi‑Ña̱ saá xíꞌin na̱ sákuaꞌa nu̱ú‑Ña̱:

―¡Na̱xa ví u̱ꞌvi̱ káa ña̱ ná ntakiꞌin na̱ kuíka Ntióxi̱ ña̱ ná kaꞌntia‑Ña̱ chiñu nu̱ú‑na̱!

24Na̱ sákuaꞌa nu̱ú‑Ña̱ nta̱kutúꞌun ini‑na̱ xíꞌin tu̱ꞌun ni̱ka̱ꞌa̱n‑Ña̱. Suu Jesús nta̱kuiin tuku‑Ña̱, káchi‑Ña̱ saá xíꞌin‑na̱:

―Se̱ꞌe mií‑i̱, ¡na̱xa ví u̱ꞌvi̱ káa ña̱ ná ntakiꞌin na̱ kúntéé ini xǔꞌun Ntióxi̱ ña̱ ná kaꞌntia‑Ña̱ chiñu nu̱ú‑na̱! 25Üꞌvi̱ ka ví ná ya̱ꞌa iin kaméyo ya̱vi̱ xa̱ꞌá tíku nu̱ú ka ña̱ ná ntakiꞌin iin na̱ kuíka Ntióxi̱ ña̱ ná kaꞌntia‑Ña̱ chiñu nu̱ú‑na̱.

26Tá xi̱ni so̱ꞌo‑na̱ ña̱ yóꞌo nteé ka nta̱kutúꞌun ini‑na̱, ra nta̱túꞌun táꞌan mií‑na̱, káchi‑na̱ saá:

―¿Yoo kúú‑na̱ kuvi ka̱ku átu saá?

27Tá nti̱ꞌi, nta̱kutoꞌni Jesús nu̱ú‑na̱, ra ka̱chi‑Ña̱ saá:

―Nu̱ú na̱ yuví, küvi ví‑ña̱, suu nu̱ú Ntióxi̱, ntikuíi va ña̱ kuvi.

28Tá nti̱ꞌi, ra, Pedro ka̱chi‑ra̱ saá:

―Ntu̱ꞌu̱, ra nta̱koo ntiꞌi‑nti̱ ña̱ꞌa‑nti̱, ra nta̱nti̱ku̱n‑nti̱ yóꞌo̱.

29Ra nta̱kuiin Jesús, káchi‑Ña̱ saá:

―Ña̱ nta̱a̱ ná ka̱ꞌa̱n‑i̱ xíꞌin‑ntó: ntikuíi na̱ nta̱koo veꞌe‑na̱, á ñani‑na̱, á ku̱ꞌva‑na̱, á nána‑na̱, á táta‑na̱, á se̱ꞌe‑na̱, á ñuꞌú‑na̱, xa̱ꞌá yu̱ꞌu̱ xíꞌin xa̱ꞌá tu̱ꞌun va̱ꞌa Ntióxi̱, 30nii ná ntoꞌo va ini‑na̱ ña̱ yúví yóꞌo, siénto ichí ntikó ka ña̱ va̱ꞌa nu̱ú‑na̱. Koo kua̱ꞌá ka veꞌe‑na̱, ñani‑na̱, ku̱ꞌva‑na̱, nána‑na̱, táta‑na̱, se̱ꞌe‑na̱, xíꞌin ñuꞌú‑na̱. Ni̱ꞌí‑na̱ ña̱ kutiaku‑na̱ ntiꞌi saá tiémpo xíꞌin Ntióxi̱ ki̱í va̱xi. 31Suu kua̱ꞌá na̱ kúchêe vichin kuu‑na̱ na̱ kunti̱ku̱n, ra na̱ ntíku̱n vichin kuu‑na̱ na̱ kuchêe.

Káꞌa̱n tuku Jesús xa̱ꞌá ña̱ kuvi̱‑Ña̱

(Mt. 20:17-19; Lc. 18:31-34)

32Ta kua̱ntaa‑na̱ kua̱ꞌa̱n‑na̱ Jerusalén, ta Jesús ínúú‑Ña̱ nu̱ú‑na̱. Ta na̱ u̱xi̱ u̱vi̱ sákuaꞌa nu̱ú‑Ña̱ nta̱kutúꞌun ini‑na̱, ra iinka na̱ ntíku̱n chí sa̱tá ni̱yǔꞌvi‑na̱. Suu ta̱vá síín‑Ña̱ míí na̱ u̱xi̱ u̱vi̱, ra ki̱xáá‑Ña̱ káꞌa̱n‑Ña̱ xíꞌin‑na̱ na‑ña̱ kúú‑ña̱ ntoꞌo‑Ña̱, 33ra ka̱chi‑Ña̱ saá:

―Kutoꞌni‑ntó; xa̱ kua̱ntaa‑yó Jerusalén, ta ikán ntakua̱ꞌa‑na̱ Ña̱ ntu̱u Se̱ꞌe Na̱ Yuví ntaꞌá na̱ su̱tu̱ xi̱kua̱ꞌá xíꞌin na̱ sána̱ꞌa̱ léy Ntióxi̱ ña̱ nta̱koo Moisés, ta ntatúꞌun táꞌan‑na̱ ña̱ kaꞌní‑na̱‑Ña̱, ta ntataxi‑na̱‑Ña̱ ntaꞌá iinka na̱ yuví na̱ kökúú judío, 34ta kua̱ku̱ ntiáa‑na̱‑Ña̱, ta koꞌni‑na̱ tiásǐi‑na̱ nu̱ú‑Ña̱, ra kani‑na̱‑Ña̱, ta kaꞌní‑na̱‑Ña̱; suu nu̱ú u̱ni̱ ki̱í, ntatiaku‑Ña̱.

Ña̱ ntu̱u Se̱ꞌe Na̱ Yuví va̱xi‑Ña̱ kasa‑Ña̱ chiñu nu̱ú na̱ yuví

(Mt. 20:20-28)

35Ra ku̱yachin Jacobo xíꞌin Juan na̱ se̱ꞌe Zebedeo:

―Mástro ―ka̱chi‑na̱ xíꞌin‑Ña̱―, kúni̱‑nti̱ ná kasa‑ún iin ña̱ ntukún‑nti̱ nu̱ú‑ún.

36Ta ka̱chi‑Ña̱ saá xíꞌin‑na̱:

―¿Na kúú‑ña̱ kúni̱‑ntó kasa‑i̱ xíꞌin‑ntó?

37Ta nta̱kuiin‑na̱, káchi‑na̱ saá:

―Tá xa̱ ná kaꞌntia‑ún chiñu xíꞌin nteé‑ún, taxi ná koo iin‑nti̱ xiyo kuáꞌa‑ún, ta iinka‑nti̱ xiyo ítin‑ún.

38Suu Jesús, ka̱chi‑Ña̱ saá xíꞌin‑na̱:

―Xïni̱‑ntó na kúú‑ña̱ ntúkún‑ntó. ¿Á kuvi koꞌo‑ntó kópa u̱va̱ ña̱ koꞌo‑i̱, ra kuntiutiá‑ntó tá ku̱va kuntiutiá‑i̱? # 10:38 Tá káꞌa̱n Jesús xa̱ꞌá ña̱ koꞌo‑Ña̱ kópa u̱va̱ xíꞌin kuntiutiá‑Ña̱, káꞌa̱n‑Ña̱ xa̱ꞌá ña̱ ntoꞌo ini‑Ña̱ tá ná kaꞌní‑na̱‑Ña̱.

39Ta nta̱kuiin‑na̱, káchi‑na̱ saá:

―Kuchiñu va‑nti̱.

Ta Jesús ka̱chi‑Ña̱ saá:

―Kópa ña̱ xíꞌi‑i̱ yóꞌo koꞌo‑ntó, ta kuntiutiá‑ntó tá ku̱va kuntiutiá‑i̱, 40suu ña̱ koo‑ntó xiyo kuáꞌa‑i̱ á xiyo ítin‑i̱ süu nu̱ú yu̱ꞌu̱ kúú‑ña̱ taxi‑i̱‑ña̱ ntaꞌá‑ntó, chi xa̱ íyo va‑na̱ kua̱ꞌa‑ña̱ xa̱ꞌá.

41Tá xi̱ni so̱ꞌo iinka u̱xi̱ na̱ sákuaꞌa nu̱ú‑Ña̱, ni̱sa̱á ini‑na̱ xíꞌin Jacobo xíꞌin Juan. 42Suu Jesús ka̱na‑Ña̱‑na̱, ta ka̱chi‑Ña̱ saá xíꞌin‑na̱:

―Xíni̱‑ntó chi na̱ xáꞌntia chiñu ña̱ yúví yóꞌo xíꞌin na̱ kúchêe kíxa‑na̱ tá ku̱va kúni̱ mií‑na̱ xíꞌin na̱ ñuu. 43Suu süu saá koo ntóꞌo̱, chi ra̱ kúni̱ kuchêe nu̱ú‑ntó, xíniñúꞌu kasa‑ra̱ chiñu nu̱ú‑ntó, 44ra átu ntáa‑ntó kúni̱ kunúú nu̱ú, ra ntúxá kasa‑ntó chiñu nu̱ú ntiꞌi‑na̱; 45saá chi Ña̱ ntu̱u Se̱ꞌe Na̱ Yuví växi‑Ña̱ ña̱ ná kasa‑na̱ chiñu nu̱ú‑Ña̱, chi Ña̱ va̱xi kasa chiñu nu̱ú‑na̱ kúú‑Ña̱, ra ná ntataxi‑Ña̱ mií‑Ña̱ ná kuvi̱‑Ña̱ ña̱ ná sáka̱ku‑Ña̱ kua̱ꞌá na̱ yuví.

Ntákutoꞌni tia̱ kuáa Bartimeo

(Mt. 20:29-34; Lc. 18:35-43)

46Ra ki̱xa̱a̱‑na̱ Jericó, ra tá ka̱na tuku Jesús kua̱ꞌa̱n‑Ña̱ xíꞌin na̱ sákuaꞌa nu̱ú‑Ña̱, ra xíꞌin kua̱ꞌá ka na̱ yuví, ta nta̱ni̱ꞌí‑na̱ iin ra̱ tia̱a kuáa naní Bartimeo, se̱ꞌe Timeo, íntúꞌú koo̱‑ra̱ yuꞌú ichí, 47ra tá xi̱ni so̱ꞌo‑ra̱ va̱xi Jesús, Ña̱ ñuu Nazaret, ki̱xáá‑ra̱ ntáꞌyu̱‑ra̱, káchi‑ra̱ saá:

―¡Jesús, se̱ꞌe David, kuntáꞌvi ini‑ún kuni‑ún yu̱ꞌu̱!

48Ta kua̱ꞌá‑na̱ ntu̱kue̱ꞌe̱ xíꞌin‑ra̱ ña̱ ná kasi‑ra̱ yuꞌú‑ra̱, suu míí ra̱ tia̱a ikán téꞌé ka ni̱nta̱ꞌyu̱‑ra̱, káchi‑ra̱ saá:

―¡Se̱ꞌe David, kuntáꞌvi ini‑ún kuni‑ún yu̱ꞌu̱!

49Ta ntu̱kui̱i̱n Jesús, ra ka̱chi‑Ña̱ saá:

―Kana‑ntó‑ra̱.

Ta ka̱na‑na̱ míí ra̱ kuáa ikán, ka̱chi‑na̱ saá xíꞌin‑ra̱:

―Chika̱a̱ nteé ini‑ún, ntakuntichi, chi kána‑Ña̱ yóꞌo̱.

50Ta sa̱kána‑ra̱ saꞌmá ísu̱ví‑ra̱, ra kama nta̱kuntichi‑ra̱ kua̱ꞌa̱n‑ra̱ nu̱ú Jesús. 51Ra tá ni̱xa̱a̱‑ra̱ nu̱ú Jesús, ka̱chi‑Ña̱ saá xíꞌin‑ra̱:

―¿Na kúú‑ña̱ kúni̱‑ún ná kasa‑i̱ xíꞌin‑ún?

Ta nta̱kuiin míí ra̱ kuáa ikán, káchi‑ra̱ saá:

―Mástro, kúni̱‑i̱ kutoꞌni‑i̱.

52Jesús, ka̱chi‑Ña̱ saá:

―Kuvi ku̱ꞌu̱n‑ún, saá chi xa̱ꞌá ña̱ kántíxa‑ún, ra, xa̱ ntu̱va̱ꞌa‑ún.

Ra míí saá nta̱kutoꞌni‑ra̱, ra nta̱nti̱ku̱n‑ra̱ kua̱ꞌa̱n‑ra̱ xíꞌin‑Ña̱ ichí.

Επιλέχθηκαν προς το παρόν:

San Marcos 10: jmx

Επισημάνσεις

Κοινοποίηση

Αντιγραφή

Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε

Μάθετε περισσότερα για San Marcos Mixteco de Coicoyán de las Flores

San Marcos 10

Δημοφιλή Βιβλικά εδάφια από
San Marcos 10

Αγία Γραφή:

Mixtec, Western Juxtlahuaca

Μετάφραση: San Marcos Mixteco de Coicoyán de las Flores - jmx

San Marcos 10

San Marcos 10

Δημοφιλή Βιβλικά εδάφια από San Marcos 10

Αγία Γραφή:

Mixtec, Western Juxtlahuaca

Μετάφραση: San Marcos Mixteco de Coicoyán de las Flores - jmx

San Marcos 10

Δημοφιλή Βιβλικά εδάφια από
San Marcos 10