Yohane 21
21
Yesu wawoneka ku ŵasambizi ŵake pa nyanja ya Tiberia
1Pavuli paku vyo Yesu wangujirongo so ku ŵasambizi pa nyanja ya Tiberia; wangujirongo viyo. 2Simoni Petro, ndi Tomase wakuzumbulika Didumo, ndi Natanaele yo waku Kana waku Gailile, ndi ŵana ŵaku Zebediya ndi ŵanyake ŵaŵi ŵamu ŵasambizi ŵake ŵenga pamoza. 3Simoni Petro waŵanene, “Ndambaya somba.” Wamnene, “Nafwe tiruta nawe.” Wangutuwa ndipo wangukwere mungaraŵa: ndipo usiku uwa kuti ŵangubayapo kanthu cha.
4Kweni po kunguti kwacha, Yesu wanguma pa likumba: ndikweni ŵasambizi wo kuti ŵangumuziŵa cha kuti ndi Yesu 5Yesu wangunena nawo, “Mwaŵana, kumbi mwe ndi somba?” Ŵangumwamuka, “Awa.” 6Iyo wanguŵanene, “Pong'iyani mkwau ku marghe gha ngaraŵa, ndipo musaniyenge.” Viyo ŵangupong'a, ndipo sono ŵengavi nthazi kwachiukwauliya chifukwa cha chivungu cha somba. 7Viyo msambizi yo Yesu wangumwanja wanguti kwaku Petro, “Mba Mbuya!” Penipo Simoni Petro wanguvwa kuti mba Mbuya, wangujichinyiya chiphemeska chake (chifukwa wenga nkhuli), ndipo wangujipong'a mu nyanja. 8Kweni ŵasambizi ŵanyake ŵanguza mu kangaraŵa ko ŵakuguza mkwau wo somba chifukwa kuti ŵenga kutari viŵi ndi mtunda cha, kweni akhumba nge ndi mikono machumi pe chumi ghaŵi.
9Viyo ŵanguti ŵazuukiya ku mtunda, ŵanguwona moto wa maka wakunyeka, ndi somba yakurarikikapo, ndi chiŵande 10Yesu watiti kwaku wo, “Toniko somba zo mwabayapo sono.” 11Viyo Simoni Petro wangukwere mu ngaraŵa, ŵanguguziya mkwau ku mtunda, wakuzaza somba zikuru machumi pe chumi pachanya machumi ghankhonde ndi zitatu: ndipo chingana zenga zinandi viyo mkwau wo kuti unguparuka cha. 12Yesu wanena nawo, “Zani muzirauke.” Kweni pengavi yumoza wa ŵasambizi wo wangwesa kumfumba, “Ndimwe ayani?” Chifukwa ŵanguziŵa kuti mba Mbuya. 13Wanguza Yesu ndipo wanguto chiŵande kuŵapaska ndi somba viyo. 14Iyi ndi nyengo yachitatu sono yo yesu wangujirongo kuŵasambizi wati wayuka ku ŵakufwa.
Yesu ndi Petro
15Viyo ŵati ŵargha, Yesu wangunena ndi Simoni Petro, “Simoni, mwana waku Yohane, kumbi utindanja kwakuruska ŵenaŵa?” Wangumuka, “Inya Ambuya, imwe muziŵa kuti nditanja imwe”; wamnene, “Liska ŵanamberere ŵangu.” 16Wanena nayo kachiŵi, “Simoni, mwana waku Yohane, kumbi utindanja?” Wamnene, “Inya, Ambuya, imwe muziŵa kuti nditanja imwe.” Wamnene, “Ŵeta mberere zangu.” 17Wanena nayo so kachitatu, “Simoni, mwana waku Yohane kumbi utindanja ine?” Petro wanguvwa chisungu, chifukwa wanena nayo kachitatu yaka, “Utindanja ine?” Wangunena nayo, “Ambuya imwe muziŵa vyose; muziŵa nadi kuti nditanja imwe.” Yesu wamnene, “Liska mberere zangu. 18Nadidi ndikuneneske, Penipo wenga wampupuka, wajichinyiriyanga wija, ndipo wendayendanga ko wakhumbanga; kweni utakuti wakota, ukatambasuwanga manja ghako, ndipo munyake wakaghanaghananga, ndipo wamkukutole kweniko iwe ulive kukhumba.” 19(Ndipo ichi wangunena, pakusimikizga ndi nyifwa yo Petro wakafwanga ndi kutore unkhankhu kwaku Chiuta.) Ndipo wati wakamba chenichi, wangumnene, “Rondo ine.”
Yesu ndi ŵasambizi ŵanyake
20Pakung'anamuka Petro wanguwona msambizi mweniyo Yesu wangumwanja wakurondo; mweniyo nayo wanguyegeme pa njonesku pa chipakatu chake, ndi wangunene, “Ambuya, ndi yani yo ngwakukupa chiyani?” 21Viyo Petro wachimuwona wangunena ndi Yesu, “Ambuya, na mwenuyu?” 22Yesu wangunena nayo, “Asani ndingakhumba kuti waje ndi umoyo mpaka po ine nthuza, nchine kwaku iwe? Iwe, rondo ine.” 23Viyo mazu yagha ghanguwanda mu ŵabali wo, ghakuti msambizi mweniyuwa kuti wakafwanga cha. Kweni Yesu wengavi kumnene kuti warekenge kufwa; iyo wanguti, “Asani ndi ngakhumba kuti waje ndi umoyo mpaka po ine nthuza, nchine kwaku iwe?”
24Uyu ndi msambizi yo ngwakusimikizga ndi wakulemba vyenivi; ndipo tiziŵa kuti chisimisimi chake nchakuneneska.
25Kweni kwe vinyake vinandi so vyo Yesu wanguchita, vyenivyo asani vingulembeka chimoza-chimoza, ndighanaghana kuti chingana ndi charu icho kuti chatinge chiziŵe cha kufungiya mabuke gho ghatinge ghalembekenge.
Επιλέχθηκαν προς το παρόν:
Yohane 21: TongaMw
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
Bible Society of Malawi