O LUKAS 17
17
O hali-o hali idadi o hababu o nyawa o baradoha yodiai
(Mat. 18:6-7, 21-22; Mark. 9:42)
1O Yesus wätemo iwinöninïkika, ”O hali-o hali idadi o hababu o nyawa o baradoha yodiai maraioka aha de ma ënanga. Mä yobodito o nyawa yodadi hababu. 2Iholoi yaoa nako manga tomarino ihiliko o tapu de ma guminoka de yädoda o ngöto maluku-lukuku, nako önanga yodadi o hababu imatëngo o nyawa yohohumujuru nënanga o baradoha yodiai. 3#Mat. 18:15 Hababu gënanga nimahidodiai!
Nako aniriadodoto wobaradoha, ünanga nitaaere. Nako ünanga womatoduba, nihiapongo. 4Nako ünanga wobaradoha ngonaika wohigali matumidi o wange moi deʼ waino wohigeto-getongo ngonaino deʼ wotemo, ’Ngohi togahoko maaf,’ ünanga nihi apongo.”
Mangale o ngongaku
5O rasul-rasul yotemo ma Jou Yesusika, ”Jou nohikuata miangongaku.” 6Ma Jou wäbaluhu, ”Nako ngini de maënanga niangongaku hosawi mamuiani, ngini yakunu niatemo o gota o waringi nënanga, ’Ngona norahuku deʼ o ngötuku nomadatomo,’ maraioka o gota gënanga aha ihimoteke anipareta.”
Wolöleleani womatëngo wodiai wadodiai
7”Hohi ade nianyawa womatëngo, de ailöleleani aidumule wopopajeko ekola aiduba magogöana. O öraha okia wolöleleani gënanga wolio, mode ünanga wïtemo unangika, ’Naino itaiti nol̄omo’? 8Maraioka kowali! Madone ünanga aha wïtemo unangika, ’Nohihidiai ahi inomo. Nomahinoa o pakeanga madebi-debini, de nohï göana ngohi tol̄omo deʼ tokere magogiriaka; iböto de gënanga yakunu ngona nol̄omo!ʼ 9Koigoungua wolöleleani gënanga iparaluua iwihigiriri, karana wamotekoka aituanga aipareta? 10Hokogenangoli ngini. Nako ngini niadiaioka mata-mata okia inihipopareta nginika, nitemo, ’Ngomi duga-duga milöleleani biaha, ngomi duga-duga miadiai okianaga imï hulo-huloko ngomino.’ ”
O Yesus wahitogumu yangimoi
11Ododagi magoronaka o Yerusalemika, o Yesus wakaino o Samaria deʼ o Galilea mabatingi madaeraino. 12Maöraha wöngohama moi o kapongo, yangimoi yäpado-pado yaino Unangino. Onanga imaokoino mangagurutika, 13deʼ yopöaka, ”Yesus! Tuanga! Nomï dora ngomi!”
14 #
Im. 14:1-32
Maöraha o Yesus wämäke önanga, Unanga wätemo, ”Nioiki o imam-imamika, nigahoko önanga yatailako niaröehe.”
Magogiriaka önanga yotagi, mangapanyake ihihangoka. 15Maöraha womatëngo mangadodiawo wamäo ünanga wotogumoka, unanga womakilioro wouli-ulili de womörene wihigiriri ma Jou Madutu. 16Gila-gila o Yesus aihimangoka, womarukuku deʼ wotemo tarima kasi Unangika. O nyawa gënanga o Samaria manyawa womatëngo. 17Ipaha o Yesus wotemo, ”Mode koigoungua naga iningimoi nitogumu? Kiaka yahiwohi? 18Yadodoa ho duga-duga o nyawa maporetino nënanga woma kilioro wotemo tarima kasi ma Jou Madutuika?” 19Daha o Yesus wïtemo o nyawaika gënanga, ”Nomomiki, deʼ noiki. Karana ngona nongaku Ngohino, ngona notogumu.”
Ma Jou Madutu aiöraha woböa la wopareta
(Mat. 24:23-28, 37-41)
20O Farisi manyawa yamuruono naga yoleha o Yesusika muruonoka ma Jou Madutu woböa la wopareta. O Yesus wohaluhu, ”Ma Jou Madutu aipopareta imulaengua de o nonako-nonako o nyawa yamömäke-mäke, 21hiädono o nyawa yakunu yotemo, ’Niaino nio lega, nënanga Unanga!ʼ ekola, ’Dokena Unanga!ʼ Hababu ma Jou Madutu womulaengoka wopareta niahidogoronaka.”
22Ipaha de gënanga o Yesus wätemo iwinöninïkika, ”Maöraha aha iböa ngini nioigo niamäke moi o wange o Nyawa manga Ngohaka aiwange, mä ngini yakunua niamäke. 23Ahao o nyawa aha yotemo nginika, ’Niolega, genangoka!ʼ ekola, ’Niolega, nengokadau!ʼ Mä ngini uha nihupu nialingiri ënanga. 24Hoka sarakia o leletongo ihihupu madararono o dihangoka, deʼ yatararono mabarenoka de mabarenika, hokogenangoli ahao madodagi o Nyawa manga Ngohaka aiwangeoka. 25Mä ihira kokiani Unanga watagongo o huha de o hangihara deʼ o nyawa o örahanënanga iwitarimaua. 26#Kej. 6:5-8 Ahao ihinyata o Nyawa manga Ngohaka aiwangeoka, madodagi hokä mahira o Nuh aiorahoka. 27#Kej. 7:6-24 O nyawa yokere yol̄omo, de yokawingi; hokogënanga kahokogenangika hiädono o Nuh wowohama o kapa magoronaika deʼ o nguihi iböa de mata-mata o nyawa gënanga yohonenge. 28#Kej. 18:20–19:25 Hokogenangoli o Lot aiorahoka. O nyawa yokere deʼ yol̄omo, yoija de imahukunu, yodatomo de o tau yodiai. 29Mä maöraha o Sodom mabereraka de o Lot wohupu, o wange gënanga o uku deʼ o walira iuti o dihanguku deʼ yäbinaha önanga mata-mata. 30Hokogenangoli ahaö madodagi mawange ihinyata o Nyawa manga Ngohaka.
31 #
Mat. 24:17-18; Mark. 13:15-16 Ma wangeoka gënanga o nyawa naga o tau makatu ma l̄okuoka uha youti yal̄ë manga kiahönanga o tau magoronaka. Kogenangoli o nyawa naga o dumuleoka uha imakilioro manga tauika. 32#Kej. 19:26 Nima hohininga okia idädadioka de o Lot ngoi hekata! 33#Mat. 10:39, 16:25; Mark. 8:35; Luk. 9:24; Yoh. 12:25 O nyawa yöriwo ihihalamati mangangango, aha ihihanga manga ngango. Mä o nyawa mangangango ihihanga aha yahihalamati. 34Ningaku: O hutu gënanga, yahinoto imaiduoka o dangiri moi, womatëngo aha iwiao deʼ womatengoli iwimal̄aika. 35O ngoheka yahinoto magogiriaka o gandum yotutuku, momatëngo aha imiao, deʼ momatengoli imimal̄aika. [36Yahinoto yokarajanga magogiriaka o dumuleoka, womatëngo aha iwiao deʼ womatengoli iwimal̄aika.]”
37O Yesus iwinöninïki yoleha, ”Kiaka gënanga aha idadi, Jou?”
O Yesus wohaluhu, ”Kiaka naga o aiwani mahonenge, genangoka naga o totaleo i ol̄o-ol̄omo o aiwani mahonenge.”
Επιλέχθηκαν προς το παρόν:
O LUKAS 17: TLB
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε