Yohana 7
7
Ndugu za Yesu wamswagiza bali wamuleka
1Imala baho Yesu kakala yozunguluka Galilea, halondile kuchola Uyuda kwa vija Wayuda vuwakalile wozahila kumkoma. 2Na sikunghulu ya Wayuda ikemagwe ya Visakila ikala behi. 3Aho ndugu zake wamulongela, “Halawe hano ugende Uyuda, giladi wanahina zako walole vinzonza viutenda. 4Kilumbo haduhu munhu yasanghane mbuli, kuno kefisa na heyo yolonda wamtange, gweye uhatenda viloto kamba hivo, vinoga wilave mulumwengu!” 5Chanduso na ndugu zake wenyego wakala hawamtogole. 6Yesu kawalongela, “Kimilo changu hakinavika; kidami chenu chabaha sikuzose. 7Mweye imbago haidaha kumwihilani, komu inihila niye, kilumbo noisindila misanghano yake iha. 8Kweleni mweye mkaje sikunghulu: kamba niye, sikwela tanhu haje sikunghulu ino, kilumbo kimilo changu hakinavika.” 9Viyamalile kuwalongela ago, kakala kuko Galilea.
Langulizo da Yesu dohuguzwa na nhegelezo; Inzuma vilumba kuvikizwa kiloho
10Kumwande ndugu zake luwamalile kuigendela sikunghulu, ilawa baho na heyo kakwela, si kwa kwilagusa komu kwa kwinyegeleza. 11Wayuda wakala wamzahila hasikunghulu akuno wolonga, “Ka kwahi ija?” 12Kulawilila na minyongʼonyo bwando muja mmadale kilumbo chake. Wayagwe walonga, “Munhu ija kanoga;” wayagwe walonga, “Si vivo, bali kolulusa wanhu waja hawaitangile inzuma.” 13Komu kuduhu yamtambule kimwagaiya, kilumbo wakala wadumba Wayuda.
14Hata sikunghulu vivikile kindibwindibwi Yesu kakwela, yomana kwingila mdihekalu kalanguliza wanhu. 15Baho Wayuda wakanganya walonga, “Vilihi, aino kaditangaze Jandiko, na heyo halangulizwe?”
16Yesu kawedika yolonga, “Malangulizo gangu si gangu nene, bali gake Yuja yangalile. 17Munhu yahavumila kugasanghana manogelwa gake, kodimanya langulizo kamba dilawa kwa Mulungu, hebu kamba niye nolonga mbuli zangu mwenyecho. 18Heyo yolonga mbuli zake mwenyecho kozahila nhunizo zake mwenyecho; maza yozahila nhunizo zake Yamgalile, iyo yuyo wa ikweli wala mmwake mduhu uponela. 19Chevule! Mose hamwinghileni inzuma? Kahi kumwenu haduhu yoivikiza nzuma; mbona molonda kunghoma?” 20Wanhu wedika, “Gweye kuna kikwale! Iyo yalihi yolonda kukukoma?” 21Yesu kawedika yolonga, “Niye sanghana kinhu kimonga amweye mose mokanganya. 22Mose kawengha luto lwa kumbi, – si kamba kumbi dija dilawa kwa Mose aka, bali kwa wahenga (Abrahamu) na mweye momwingiza kumbi munhu disiku ja ukuhumula. 23Kamba momwingiza kumbi siku ja Sabato giladi nzuma ya Mose sikuibanangike, vilihi mweye monghalalila niye, kilumbo nimtenda munhu yawe mgima kabisa siku ja iSabato? 24Sikumtaguse kitala cha meso, komu taguseni kitala kilumbile ihoko!”
Kristo kuyalawile hakutangika
25Baho wayagwe wa Yerusalemu womana kulonga, “Che! aino siyo yuyo iwomzahila wamkome? 26Lola kolonga kibunhubunhu wala hawamulongele mbuli! Mmanye wakulu wamtanga kweli kamba ino yuyo Kristo? 27Komu yuno tumtanga kolawa kwahi, bali yaheza Kristo, haduhu yonda yavimanye kuyolawa!”
28Baho Yesu yomana kubwata mdihekalu yolanguliza kuno yolonga, “He! niye mnitanga, na hiko kundawile mkutanga? Komu niye silawile hanhu hangu mwenyecho, bali Heyo Yangalile yuyo wa ihoko, amweye hamumtanga. 29Aniye nimtanga, kilumbo ndawa kumwake, na Heyo yuyo yangalile.” 30Baho wagesa kumgoga, komu haduhu munhu yagolose mkono hambwe yamkwase, kilumbo kimilo chake hakinavika. 31Kileka wanhu bwando muna ididale wamtogola wolonga, “Kwiza Kristo vonda yeze, che, kovidabula vilolomboto bwando kumbanza ino?”
Kristo konda yachole kulihi
32Luwahulike Mafariseo minyongʼonyo ya wanhu kilumbo chake, aho Wakulu wa Nhambiko na Mafariseo watuma wasongolo giladi wamgoge. 33Yesu kalonga, “Kihali kipigiti kidodo nihali baha hamonga na mweye; imala baho nochola kwa Yuyo Yangalile. 34Kwiza mweye monzahila komu hondamnyone, na kunili niye mweye hamdaha kuvika.” 35Wayuda welongela, “He! ino kochola kwahi konda tuleke kumona? Mmanye kowagendela awo wapwililike muisi za Wagriki; hebu kochola kuwafunda Wagriki? 36Mbuli yaki iyopeta, Monzahila honda mnyone, na Kunili niye mweye hamdaha kuvika?”
Yesu heyo yolava mazi ga upile
37Aluja ludivikile disiku ja ikimambukizo ja Sikunghulu dili nghulu nghani, Yesu kema wima kakomhoka yolonga, “Munhu yohona nghilu, na yeze kumwangu yangʼwe! 38Yonhogola niye kamba vija Jandiko vidipeta vizanda vya mazi ga ugima vyokuluma vyobwinda kulawa muinda yake.” 39Na mbuli hiyo kaipeta yotambula iLoho, kwiza waja wonda wamtogole wogolelwa iloho hamwande, kwa mzoko Loho kakala hanakwiza, kilumbo Yesu tanhu hanagolelwa yenzi.
Mesiya vilumba kulawa Betlehemu; Nikodemu kamwimila Yesu kumtaza
40Vuwagahulike malonga gano, wayagwe walonga, “Aino kagamba ayo Mlaguzi Yokwiza.” 41Wayagwe walonga, “Yuno yuyo Kristo.” Wayagwe walonga, “Che, Kristo yalawe Galilea? 42Che, Jandiko hadilonga kamba Kristo kokwiza mulukolo lwa Daudi mkiwambo cha Betlehemu kiyakalile Daudi?” 43Kulawilila mmwagemmwage muna gamadale kwa sosombi yake. 44Wayagwe walonda kumgoga, bali haduhu munhu yagolose mkono wake yamkwase.
45Watumigwa waja wawagendela Wakulu wa Nhambiko na Mafariseo, na hewo wawauza, “Mbona hamumgalile?” 46Waja iwatumigwa walonga, “Hanalonga munhu yoyose kamba yuno viyolonga.” 47Mafariseo wawedika, “Che! na mweye mbitilwa? 48Che, kuna munhu yamvumile kulawa kwa iwakulu na Mafariseo? 49Komu dija didale haditangile Nzuma jodumilizwa!” 50Baho Nikodemo ija yanduse kumgendela Yesu ikilo, na heyo kakala imonga wawo, kawalongela, 51“Che, Nzuma yetu imtagusaga munhu kamba tanhu hanategelezwa na kuvitanga viyatendile?” 52Wedika womulongela, “Kumbe na gweye Mgalilea; 53zahila ubone, kuduhu Mlaguzi yolawa Galilea!”
Wachola kila munhu ukaye kumwake.
Επιλέχθηκαν προς το παρόν:
Yohana 7: ZAM75
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Zaramo © United Bible Societies, 1975.