Yohana 6
6
Wanhu elfu nhano weguswa
1Imala baho Yesu kagenda na zake mwambu wa Bahali ya Galilea, nayo iyo ya Tiberia. 2Na madale bwando gamuwinza, kilumbo wagona malolomboto goyokala yowatendela watamu. 3Na heyo Yesu kakwela kukigongo, kakala hasi hamonga na wanahina wake. Na Pasaka sikunghulu ya Wayuda ikala behi. 5Avo Yesu viyenule meso gake, kagona madale bwando wokwiza kumwake, kamulongela Filipo, “He! tugule kwahi migate, wanhu wano kileka waje?” 6Kalonga gano giladi yamgeze, na heyo kavimanya mwenyego vonda yatende. 7Filipo kamwidika, “Migate ya silingi elfu mbili honda yenele bule, kila imonga yenghigwe kinofu.” 8Baho imonga wa wanahina, Andrea ndugu yake Simoni Petro kamulongela, 9“Hano hana mwana kana migate mitano ya uhemba na visomba vibili, bali choni hicho, wanhu vuwali bwando kamba vino?” 10Yesu kalonga, “Walongeleni wanhu wakale hasi!” Na hanhu haja hakala henela milolo; wamana kukala hasi, wambigalo kamba elfu nhano. 11Yesu yomana kuisola ija migate na kuimoteza, kawengha waja wakalile hasi, na visomba vivija kamba vuwalondile. 12Aluja luwegute kawalongela wanahina wake, “Dondoleni awo upakapaka usigale, kinhu sikuchage!” 13Vuwaulundize wamemeza vigelo longo dimwe na vibili vya uja upakapaka wa migate ija usigale vuwadile.
14Aho wanhu waja luwawene unzonza uyasanghane walonga, “Baye yuyo Mlaguzi yuja Yokwiza mulumwengu.” 15Yesu viyatangile kamba wokwiza wamgoge wamtende mndewa, kasegela kakwela kudigongo yaiyeka.
Yesu kagenda uchana mbahali
16Haichungulo wanahina wake wamana kuhumulukila mhwani. 17Wengila mngalawa kuloka kugenda Kapernaumu, na ziza disonga kugwa, bali Yesu hanavika. Na bahali isonga kulindimuka kilumbo cha beho dikala dibwinha nghani. 19Wamana kugela nhafi zawo, wagenda umwanza wa maili ndatu nne, mhunde wamona Yesu yochola uchana mbahali yokwenhuka behi na ingalawa, na hewo wadumba. 20Aheyo kawalongela, “Nene hiyo! Sikumdumbe!” 21Na hewo walonda kumbokela mngalawa, wedukila ingalawa ivika iisi ija yowokala wogenda.
Wanhu vuwalondile vijusa, Yesu kalema
22Siku jekabili jake mtinghanilo wiza wema umwambu wa ibahali, vuwawene kamba zingalawa ziyagwe kuduhu bali imonga, na kamba Yesu hengile hamonga na wanahina wake mngalawa ija, komu wanahina waloka wayeka. 23Kumwande ziza ngalawa ziyagwe zilawa Tiberia zivikila habehi na ihanhu haja hawadile migate ija igeligwe luvimbe na Yesu. 24Basi madale ga wanhu vuwawene kamba Yesu haduhu wala wanahina wake, wamana kwingila na hewo mzingalawa, waloka wavika Kapernaumu na kuno womzahila Yesu.
25Vuwamuwene mwambu wamana kumulongela, “Mkulufunzi, gweye kuvika hano zuwaki?”
Msanghano wa Mulungu uwo kumgoga Yesu; Yesu yuyo mgate wa upile ulawaga kuulanga
26Yesu kedika yowalongela, “Togola Togola, nomulongelani, Mweye monzahila si kamba mvyona vijuza, bali vumdile ija migate mwiguta. 27Sikumsanghanile ndigwa ibanangikaga, bali mgadukile ndigwa ikalaga na upile wa digunge; hiyo iyo ndigwa yonda yamwingheni Mwanage Munhu, kilumbo yuyo yageligwe utango na Tata Mulungu.”
28Womana kumuuza, “Tweye tutendeze kileka tusanghane kazi yake Mulungu?” 29Yesu kedika kawalongela, “Msa-nghano wa Mulungu uwo uno, mumtogole Heyo yatumigwe na Heyo.” 30Hewo wamulongela, “Agweye kotenda unzonza ulihi, tuwone kileka tukutogole? 31Gweye kosanghana choni? Tata zetu wakala wadile Mana ija kuluwala, kamba viyandikigwe, Heyo kawengha ndigwa ilawile kuulanga giladi waije.” 32Yesu kawalongela, “Togola Togola nomulongelani, Siyo Mose yamwinghileni ndigwa ili kuulanga, bali Tataangu komgwelelani ndigwa ya kweli ilawa kuulanga. 33Kilumbo ndigwa ya Mulungu iyo ino ihumuluke kulawa kuulanga na kuigolela iisi yose upile.” 34Baho wamulongela, “Mndewa, tugolele ndigwa hiyo sikuzose!” 35Baho Yesu kawalongela, “Niye nene ndigwa ya upile. Yokwiza kumwangu honda yayone nzala ngʼo, na yanhogole niye honda yayone nghilu. 36Amweye nikala nimulongelani, monyona kileka hamnitogole. 37Maza wose Tata woyongwelela wokwiza kumwangu, na niye yoyose yokwiza kumwangu simuwinga kunze mbe. 38Chanduso niye vinilawa kuulanga sizile nisanghane manogelwa gangu aka, komu manogelwa gake Yangalile. 39Na manogelwa gake Yangalile gago gano, sikunyase hata yumwe mmwao woyoningha, bali nimzuse siku ja ikimambukizo. 40Kilumbo gamnogele Tataangu gago gano, giladi munhu yoyose yomulola Mwana na kumtogola, yawe na upile wa milongo yose, na niye nomzusa siku ya ikimambukizo.”
Wanhu wa kilukuli wehilwa na malonga ga Yesu; Chakuja cha Manna kuluwala hakidahile kuhonya
41Waja Wayuda wamana kutwanganika kilumbo kalonga, “Niye nene ndigwa ihumuluke ilawile kuulanga. 42Na hewo walonga, Aino siyo Yesu mwanage Yosefu yuyo itutanga tataake na mamaake? Kolongaze ino kamba Nihumuluka ndawa kuulanga?” 43Baho Yesu kawedika, “Sikumtwanganike mwemwe kwa mwemwe! 44Haduhu munhu yodaha kwiza kumwangu kamba hakwegigwe na Tataangu yangalile, na niye nomzusa siku ja ikimambukizo. 45Mbuli hiyo yandikigwa muna Walaguzi, Wose wogalamka wafundigwe na Mulungu. Basi ayo yonda yategeleze na kwifunda kwa Tata, kokwiza kumwangu. 46Haduhu munhu yamuwene Tata kamba haduhu Heyo yalawile kwa Mulungu, iyo yamuwene Tata. 47Togola Togola nomulongelani, Yonhogola kana upile uwo wokwiza.
48Niye nene ndigwa ya upile. 49Tata zenu waija manna ija kuluwala, wafa. 50Ino iyo ndigwa ihumuluke kulawa kuulanga giladi heyo yoija sikuyafe. 51Niye nene ndigwa ya upile ihulumuke kulawa kuulanga; munhu yahaja ndigwa ino, kokala digunge kwa digunge; na ndigwa yonda ndave niye, lulo lukuli lwangu kilumbo cha ugima wa imbago.”
Tuhabokela lukuli lwa Yesu, togalamka wapile
52Baho Wayuda webamilila wawo kwa wawo wolonga, “Munhu ino kodahaze kutwingha tweye lukuli lwake tuluje?” 53Yesu kawalongela, “Kingongongo nomulongelani, Kamba hamdile lukuli lwa Mwanage Munhu na kungʼwa mulopa wake, mwa bule na ugima mmwenu. 54Yonda yaje lukuli lwangu na kungʼwa mulopa wangu, kana ugima wa milongo yose, na niye nomzusa siku ja ikimambukizo. 55Kilumbo lukuli lwangu iyo ndigwa ya kwelikweli, na mulopa wangu uwo ungʼwaji wa ihoko. 56Yonda yaje lukuli lwangu na kungʼwa mulopa wangu, kokala mmwangu na niye mmwake; 57Kamba vivija Tata Mwene Upile viyangalile, na niye na Mpile mmwake Tata, vivo heyo yandile niye, kowona upile mmwangu. 58Ino iyo ndigwa ihulumuke kulawa kuulanga, si vija vuwadile wahenga wadanganika; yoja ndigwa ino kokuwa na upile wa milongo na milongo.” 59Malonga higo Yesu kagalonga muna ingʼanda yaukupulila, viyakalile yolanguliza Kapernaumu.
Lukuli lwa kimunhu halufaya; Petro kamtogola Yesu yuyo Mndewa wa idigunge
60Baho wanhu bwando muna iwanahina wake vuwagahulike higo, walonga, “Mbuli ino ngaga nghani, kumbe yalihi mina yonda yadahe kwitegeleza?” 61Yesu kavitanga mloho yake kamba wanahina wake woigegedukila mbuli hiyo, kawalongela, “Che! mbuli kamba ino yomkwalani? 62Vokuwaze aho vonda mumone Mwanage Munhu yokwela kuko kuyakalile haikilongozi? 63Ayo Loho iyo izusa mgalamke wapile; amba lukuli halufaya; malonga ganghalile nimulongelani ago iyo Loho, kabili uwo upile. 64Bali wabaha wayagwe mmwanza wenu wolema kutogola.” Kwa mzoko Yesu kavitanga mwaka kulawa ikinhanga, walihi wolema kutogola, na heyo yalihi yonda yamuhonze. 65Avija kalonga, “Kilumbo hicho leka mana nimulongeleni, Haduhu yovidaha kwiza kumwangu, komu yamotelwe na Tataangu.”
66Giladi ya ago wanahina bwando wahinduka kuchugu, kabili hawelongoze nayo. 67Baho Yesu yawalongele waja Mulongo umwe na Wabili, “Che! na mweye molonda kuse-gela?” 68Simoni Petro kamwidika, “Mndewa, tumgendele nani? 69Gweye kunago malonga ga upile wa digunge; na tweye tuvumila, kabili tuvitanga kamba gweye yuyo Yangʼalile wa Mulungu.” 70Yesu kedika, “Che! simsaguleni mweye Longo dimwe na Wabili? Kumbe imonga wenu iyo Mndumu Satani Mgeza-wanhu.” 71Hano kampeta Yuda mwanage Simoni Iskariote, aheyo yonda yamulave, na heyo kakala imonga wa waja Mulongo umwe na Wabili.
Επιλέχθηκαν προς το παρόν:
Yohana 6: ZAM75
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
New Testament in Zaramo © United Bible Societies, 1975.