Etatelu 4
4
Kena la Abele
1Adama akeyana la wadendi Eva. Ku wadendi akatshu diemi, akuti Kena. Ndi akati ati: Dimi lambuta ona pami uma lu ekimanyelu ka Latuyalaka. 2Ku ndi akayuta kushendi Abele. Abele akayala ulami wʼekoko, ku Kena akayala ukambi wʼekambo. 3Lamʼaketi nshi motshi, Kena akalambula Latuyalaka elua uma lʼekambo. 4Ndu Abele akalambula Latuyalaka nundu diʼana wa nyama a wata uma lu dungalunga diandi. Latuyalaka akangenangenela Abele la ulambu andi#4:4 Heb. 11:14. 5Keli ndi kongenangenela Kena la ulambu andi. Ku Kena akadanganela la kele. 6Latuyalaka akawumbula ati: Okoko wana wadanganelaye la kele, ndu ukundi ahindjaye elundji na? 7Mete, mete, utunduyala ololo mbutsheye, tshiki elundji kaye kutuyala la ongenongeno. Keli naka we hatshi ololo, keti kolo kakukungela la suku diaye la saki ka nkulela. Keli we ukiuleli. 8Kena akasawula la kushendi Abele. Lʼokongo diku, lamʼakiwo lʼekambo, ndi akamamela Abele, akûdiaki.#4:8 Mat. 23:35; Luk. 11:51; 1 Joa. 3:12.
9Latuyalaka akambula Kena ati: Lendʼeli onanyo Abele? Ku Kena akûkaluya diui ati: Lendʼeyami na? Ulami wʼonalingu mbemi uka? 10Ndi akawumbula ati: Kakayatshi na? Delu dia dikila dia onanyo diambukuma pulu ndu le mi.#4:10 Heb. 12:24. 11Kakiane we ayudjama mananu lu kete yakase unyo dia nungula dikila dia onanyo uma lu anya aye. 12Lamʼayuyukambaka kete la mune diango, yo hayuleka nkongonyia diango. We ayuyala yekeko, ndu aha la ngelu shikaa la kete. 13Kena akatela Latuyalaka ati: Sui diami diambundeka wulu, wuhu wahameyi mbikike. 14Kakiane we ambumbitshanya uma lu kete nye, la dimi layushama etali uma lʼelundji kaye. Layuyala yekeko, ndu aha la ngelu shikaa. Ku untu tshe layomena, ayundjaka. 15Latuyalaka akawutela ati: Naka untu ayukudiaka, we Kena, untu ako ayosomboyama tena esambeli dikambu diaye. Okone Latuyalaka akadji Kena djimbitelu dia untu tshe lawena tûdiakaki. 16Okone Kena akangana uma la ntundu ka Latuyalaka. Ndi akatudjase lu kete ya Nodo (kitshimudi ati: Kete yʼelawelu) lu leke lʼehutwelu ka unya la Edena. 17Kena akeyana la wadendi. Ku wadendi akatshu diemi, akuti ona pami, lukumbu landi Enoke. Lʼokongo diku ndi akati usumba, akole usumba ako ati: Enoke, lukumbu la onʼandi. 18Enoke akuti Irada; lrada akuti Mehudjaele; Mehudjaele akuti Metushaele; la Metushaele akuti Lameka. 19Lameka akatshuki wadi ahendi. Lukumbu la omotshi Ada, la lukumbu la ukina Zila. 20Ada akuti Jabala. Jabala ako kakayala lotshetshe la akanga a dungalunga watudjaseka lu mvudu yʼapema. 21Lukumbu la onangu laki Jubala. Ndi akayala lotshetshe la waku tshe wutuhumaka sese la watudaka pungi. 22Ndu Zila ntu akuti Tubala-Kena, laki umbetsha wʼetshudi wakatshulaka wehu tshe wa ditshulatshula dia ehotela la dia mbulu. Lukumbu la kadiya Tubala-Kena laki Nama. 23Lameka akatela wadiendi ati:
Ada la Zila li, nyulungi uku watami!
Wadi wa Lameka, nyuhukami diui diami!
Lakadiaki untu, ne dia ndi akampumuya;
Ndu olongo omotshi, ne dia ndi akankomola.
24Naka Kena ayosombweyama tena esambeli,
Mete Lameka akumi esambeli la esambeli.
25Adama akeyana la wadendi ntu. Ku wadendi akuti ona pami, akawole lukumbu ati: Seta. Ndi akati ati: Unyashungu ambumbisha ona pami ukina lu dihuli dia Abele, lakadiaki Kena. 26Ku Seta akuti ona pami, akawole lukumbu ati: Enosha. Uma laso kakatatela antu ntemola lukumbu la Latuyalaka.
Επιλέχθηκαν προς το παρόν:
Etatelu 4: TLL
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
La Bible en Otetela © Allianee Biblique de la Republique Democratique du Congo, 1991