ADUNHEL 19
19
Pol po Ephisiya Yok Kidam
1Apolos po Korinth along kido adak, Pol po inglong angbong agak arting hletsi Ephisiya yok wangsi, 2lalong angkhan adun pochaksi analiyok arjulo, “Konam nali krolo, la-amun Jiuli-Kangthir kihlong ma?” Anali anangyok pulo, “Jiuli-Kangthir hlongman ma hlonghle, labang halike arju hlonghle yongot.” 3Anang pulo, “Tene, pot badi haksi nali baptist chiplango?” Anali pulo,“Johon po baptist ka-ote yoksi.” 4Pol po pulo, “Johon po arleng helyok kipu, ‘Ingho nephel wangsi do, anangyok, lake Jisu yok krol;’ ladi pusi anang analiyok neng kachipharlep baptist pensi baptist otelo. 5Labang alam arjusi anali Hemphu Jisu amen pen baptist chiplango. 6La parake Pol po anali abang along ari bat tangsi, anali phuthak Jiuli-Kangthir wango, lalong anali ajatjat alam thansi katurki alam paharo. 7Anali kido kangwe bang kere-hini arleng kido. 8Lalong para Pol po Arnam ahemyok lut damsi, Arnam longri alam ensi lamthe chibatno arleng helyok nengrungo, chiklo jon-thom bak chihadutsi paharsi kido. 9Manta anali angkhanke angthin parthatno aro mengme yongot, rat hel angot labang kikrol aduwar yok patharakngo apot, anang naliyok tikangsi, adun helyok papreksi, Tarenas amen ihutpo bi-than ahem long arni ta lamthe chirwalo. 10Labadisi nengkan hi-niyok dolongo, tangsi Asia alongri long kido ahuwit Jihudi aro Grik helta Hemphu alam arju hlongo.
Iskiba po Aso Pensohel
11Arnam ke Pol po aridengsi la-an ajakong asal patikilo, 12anang bangpo para pe, pen pongho ensi kiso arleng adung pon penpan, anali kisohel melo, aro si-ik ajiu hel olesi damo. 13Manta longri jon-jan kartingwor Jihudi arleng angkhan si-ik ka-ujhar abang, si-ik kihap hel ango Hemphu Jisu amen kithan pon amun puman, ‘Ingho alamthe Pol po pahardo, labang Jisu amen pensi ne naliyok than do.’ 14Labadi asal Iskiba amen ihut Jihudi bor-bangthe po bang thorok isi aso pensohel ta katiki. 15Lalong si-ik ajiu hel analiyok than phakngo, “Jisu yok chiniman, Pol po yokta chiniman; manta nali ke inghote?” 16Ladi pusi labang si-ik ajiu kachu-u arlengpo anali thak chon-thel si, ahuwit yok hal detsi, anang apharan pensi halo; la-amun anali pe-rik pangwepho si aro ghunia chiplangsi, labang ahem parake kak detno. 17Lasi Ephisiya long kido Jihudi aro Grik arleng hel labang alam arjusi, ahuwit ta pherelo; aro Hemphu Jisu amenyok jortang pilo. 18Aro kikrol abang ako-ong wangsi, abithang kangho katiki hel hoi cholo. 19Aro bhiliki kapaklang abang abithang kiwi lohel pangrum detsi, rat angot me pasek detno. Labang alohel ador alekha, kep phongo hajar phongo rupa atheng chokngo. 20La-an kihal ajakong pen Hemphu alam chisang detsi halo.
Ephisiya Long Ahul Kiwang
21Lamehel kachiplang aphel, Pol po Mesidoniya aro Akhaya alongri aga artingsi Jerusalem kidame aneng dosi anang pulo, “Ne lalong kidam aphel Rom arongpe yokta chiklang dam pen hlonge.” 22Lasi anangyok kirap dun arleng adak Timothi po aro Erastas po labang hini yok Mesidoniya yok tolsi, abithang Asia alongri angkhan adin dolo. 23La aporsi kikrol aduwar anat ahul wango. 24Piyok pu tene Artemis arnampe ahempo rupa pen kikem Dametriyas amen ihut honari kido; anang kithep asal ako-ong arlengyok sal kipi. 25Laparake Damatriyas po analiyok aro kijor-kihrep along kithep arleng hel pangrum si pulo, “Ei arleng hel, labang bihini kijor-kihrep para ili apuru chokdo, labang nali thekman. 26Manta arleng ari pen kithep arnam helke, arnam kalek, pusi la Pol po labadi thansi, Ephisiya longdet kalek, Asia longri dungsi ako-ong arleng ayok nengrung si arleng helyok kamprek aduwar pakrolsi pondo, labang nali theksi do, arjusi do. 27Aro labang ili kijor-kihrep kapangwe detyok kaphere-meme do, ladet kalek, Asia ajaldung si, layok ke, pirthepe dung kachirdom Artemi arnampe, anang ahem yokta pangwe detsi, aro anangyok anang ser apuru para kapangwe yok kaphere nangedo.” 28Labang alam arjusi, anali anang kangphro si hang chersi pulo, “Ephisiya long Artemi pe pathe nang!” 29Labang rongpe dungsi ahul wang dutno, Pol po pen kidun Mesidoniya arleng Gayas po aro Aristarsas po, anali bang hiniyok nep ponsi, anali arong kapaklang athemyok chingbarsi katsi damo. 30Lalong Pol po rat hel asitem kilutyok anang kido apot, adun hel anangyok padam hlonghle yongot. 31Aro asia long angkhan arleng ason phu-phang hel Pol po alok chiplangsi, anang dung arleng tolsi, arong kapaklang ahem arlo palut dam hlonghle yok chingdukngo. 32Mel along ahul kiwang dut apot, prek ajat arleng hel prek alam pensi chihang solsi kido; aro arleng hel pot anat anali wang kachingrum, lalong ako-ong abangke than un-eh yongot. 33La parake Jihudi hel ke Alekjendar poyok ango ayok dolponsi, rat asitem para olesi tolo. Lalong Alekjendar po aripen atewa pisi, arlenghel ango lam angkithan dunyok kiron. 34Manta anang Jihudi arleng mene pusi anali pachini unsi, anali “Ephisiya Artemi arnampe pathe nang!” pusi ghonta hiniyok hang solo. 35Aphelsi rongpe salchakthe po arleng helyok anang padoklipsi pulo, “Ei Ephisiya abang! Ephisiya rongpepe Artemi arnampe aro suneng para kijang agoyapo ta kachirdom ahem kihon pusi kithekthe arleng asitem ingho do? 36Lamehel alamyok ihut ta hoi chomo un-eh ye apot, nali la-an abisar en-eh detne, ingsam klipsi kidomechot; 37piyok pu tene potsi arleng nali holek yok wano, anali arnam abihini chunghuhe yong, lale ili arnampe yok kapatharak ta kalek. 38Lasi Demestriyas po aro bihini kithep arleng hel inghone bak ka-ojor doman, tene bisar ka-ote arlengdo, bisar aphu-phang ta do, nali lalong chigosor dam une. 39Manta nali prek alamthe anat kachingduk alam dolo, tene arni kachingrum mel along chipangsam une. 40Piyok pu tene mini ahul kapawang dutpo ithe aron kangwe anat, hali phuthak si ado piye pusi kaphere meme do; aro labang rat kachingrum alam hali jat pudun un-eh ye.” 41Ladi kithan aphel anang mel chikakngo.
Επιλέχθηκαν προς το παρόν:
ADUNHEL 19: AMRI-BSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.