ADUNHEL 18
18
Pol po Korinth Ayok Kidam
1La-aphel Pol po Ethens long tikangsi Korinth ayok damo; 2labang adak Klaudiyas po ahuwit Jihudi helyok Rom arongpe para kapadam alam kithan anat, Pontas alongri kiplang Akila amen ihut Jihudi apiso Priskila pe pen bekso adin ango Itali alongri para kiwang, arlengyok theksi Polpo anang dung damo. 3Aro Pol po anali pen isidet asal arleng apot, anali pen do duno, aro anali pen sal tikilo. Piyok pu tene katiki asalke anali kuntulu kikem arleng kido. 4Aro kisang-arniten Arnam ahem long lam chirwalsi, Jihudi pen Grik helyok angthin kapharlep yok nengrungo. 5La-amun Silas po aro Timothi po Mesidoniya para wang kihleng apot, Pol poke Arnam alam kapahar nengpi si, Jisu si Khristo lo, pusi Jihudi helyok hakhi pilo. 6Manta anali anangyok kithan tengklak ngo, aro patharak ngo apot, Pol po pe hijirsi anali yok pulo, “Nali wi nali phu-athak padonang; neke ado ingjong; minon parake ne Bang-ajat adungyok dame.” 7Laparake anang lalong para damo, aro Arnam kimeng ihut Taitas Jastas amen arlengpo ahem yok lutdamo; anang ahempo kachirdom ahem akung kido; 8aro kachirdom ahem thawang Krispas po anang hembang ahuwit Hemphu yok krolo; aro Korinth arleng hel asitem ako-ong arleng onesi, krolsi baptist chiplango. 9La-aphel Hemphu anuwe Pol poyok pharlo chihomansi pulo, “Nang phereyek; dositse si, paharne dopon. 10Piyok pu tene ne nangkung-kung do dundo aro nang kapangho yok nangyok kaita nang padukdeye; piyok pu tene labang rongpe long ne arleng ako-ongdo.” 11Laparake Polpo anali sitem nengkan isine chiklo jon-thorok dosi, Arnam alam pachirlilo. 12Galiyu poyok Akhaya alongri Roman gobornor kido amun, Jihudi hel asapsi Pol poyok langset setsi, tarang ahem kangning angot anangyok ponsi pulo, 13“Labang arlengpo hali kanong mengmesi kachirdom ahem para kamprek kachirdom ayok arleng hel nengrungsi do.” 14La-amun Pol po lam kithane amunsi, Galiyu po Jihudi helyok pulo, “Ei Jihudihel, labangpo ka-ongnai, lale kangho asal ka-ojor tene, ne nali lam chirchi melo hoi; 15manta nali lam detsi, amen, lale nali kanong alam anatsi ahul kiwang abisar, tene nali bithangne chilangot; ladi alam bisarpo kichoyok, ne aneng ingjong.” 16Latangsi anang tarang ahem analiyok para toldet no. 17La-aphel anali Arnam ahem thawang Sosthenes po yok nepsi, tarang ahem amahangsi anangyok sapmo. Layong ta Galiyu po mehel jat aneng pipe yongot.
Pol po Antiyokyok Kachiru
18La-aphel Pol po lalong aro angkhan adin dosi, kortehel para chipadilo, aro langpe long jahaj pen Siriya alongriyok damo; anang pen Priskila pe aro Akila po ta duno; anang Kinkriya long achu kachingtep; piyok pu tene anang Arnam ango penebak hopot kicho. 19La-aphel Ephisiya arongpe hlengo apot, anang analiyok lalong tikangsi, abithang kachirdom ahem lut dunsi Jihudi hel pen lamthe chirwalo; 20latlong aro bekso adin kidoyok arleng hel Pol poyok chingdukngo, manta anang kengke yongot; 21manta “Arnam ahisa tene, nali dungyok wang chirul phaknge.” pusi langpe aduwarsi jahaj pen Ephisiya para damo. 22La-aphel Sisiriya along sunsi, Jerusalem yok damsi kachikrukyok kardom pisi lalong para Antiyok yok wango. 23Lalong bekso adin dosi, lalong para damsi, Galatiya aro Phergiya alongri ahol isi para isi long ahuwit adun helyok kikrol pangtango.
Apolos po Ephisiya Pen Korinthyayok Kidam
24Labang apor Apolos amen ihut Jihudi arleng Ephisiya long wango; anang ajat ke Alekjendriya kido, Anang ihut lam kithanthek arleng, lo-kangthir agiyan kido arleng kido. 25Anang Hemphu Aduwar alam kachirli, aro jiuli akar kido alam nengrungo, aro Jisu alam pharlisi me-at kapachirli, layongta Johon po baptist alamthe detsi kithek. 26Lalong anang kachirdom ahem long chipangtang dutsi lamthe paharpono; lalong Priskila pe pen Akila po anang kapaklang alam arjusi, anangyok anali hem ponsi, Arnam Aduwar aro khanangpo pharlisi abhu pahlongo. 27La-aphel Apolos po Akhaya alongri ayok kidam anengo apot, korte hel nengrong piduno aro anangyok ki-enpon yok adun helyok lo wilo. La-amun anang labang athem hlengsi, kajinso hlongsi kikrol abangyok ki-un ateng rapduno. 28Piyok pu tene Jisu si Khristo, anang lo-kangthir para labang aporman paklangsi, nengrungsi rat hel ango Jihudi hel kachibat parem detno.
Επιλέχθηκαν προς το παρόν:
ADUNHEL 18: AMRI-BSI
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.