Zlr 22
22
Dzəghaŋta Lazglafta ta Abraham
1Tahula luta tsa skwiha ya, ka dzəghaŋtá Lazglafta ta Abraham. Kaʼa nda tsi mantsa: « Abraham! » kaʼa. Ka Abraham mantsa: « Wana yu! » kaʼa. 2Ka Lazglafta mantsa: « Klaf kla ta zwaŋa gha, kɗakwa ni turtuktuk, tsa ɗvu ka, Izak ya, ka dzaʼa ka ta ghwá ya dzaʼa mnaghata yu ta haɗika Muriya, ka vlihata ka, ka skwa pla ghəŋ ŋa dray tsuh tsuh hada, » kaʼa.
3Ka sliʼaftá Abraham wrək sərɗək, ka tataptá hasuʼu ŋa drafta skwa pla ghəŋ tsuh tsuh, payafha ta kəɗiha ni, hlaʼaha ta kwalvaha ni his, nda Izak zwaŋa ni, ka sliʼaftá tsi ka dzaʼa nda təv tsa vli mnana Lazglafta ya. 4Baɗ mahkəna fitik, kəʼa ka Abraham fatá iri ná, ka nghaŋtá tsi ta tsa vli ya diʼiŋ. 5Ka Abraham nda tsa kwalvaha ni ya mantsa: « Nzawa nza kaghuni hadna kawadaga nda kəɗih, ta ŋladaftá iʼi nda na zwaŋ na da hadaʼa da tsəlɓu ŋa Lazglafta, ŋa vragata ŋni, » kaʼa.
6Ka klaftá Abraham ta tsa hasuʼu ŋa dra skwa pla ghəŋ ya ka fanaghatá Izak zwaŋa ni, klafha ma dzva ni ta skwi ŋa tsa vu nda maŋa, ka laghu həŋ his his kawadaga. 7Ka gwaɗganatá Izak ta da ni Abraham, kaʼa mantsa: « Da! » kaʼa. Ka Abraham mantsa: « Wana yu sagəŋ, » kaʼa. Kaʼa mantsa: « Wana vu nda hasuʼu, ga zwaŋa tuwak ŋa dray ŋa pla ghəŋ tsuh tsuh katək na? » kaʼa. 8Ka Abraham mantsa: « Zwaŋa ɗa, dzaʼa payaf paya Lazglafta ka ghəŋa ni ta zwaŋa tuwak ŋa dray, » kaʼa. Ka kəɗ həŋ ta mbaɗa taŋ his his kawadaga.
9Ka ɓhadaghatá həŋ da tsa vli mnanaf Lazglafta ya. Ka dzihwaftá Abraham ta gwir, sərɓafha ta hasuʼu tida, ka habaftá tsi ta Izak zwaŋa ni, ka fafta ta tsa hasuʼu ta gwir ya. 10Ka fadaptá Abraham ta dzva ni ka klaftá maŋa ŋa ghwanaftá zwaŋa ni. 11Ama ka hgaŋtá duhwala Yawe daga ta luwa, kaʼa mantsa: « Abraham! Abraham! » kaʼa. Kaʼa mantsa: « Wana yu, » kaʼa. 12Kaʼa mantsa: « Ma faf ka ta dzva gha ta tsa zwaŋ ya, yaha ka maganatá sana skwi. Ndana tama, nda sna yu kazlay ta zləŋay ka ta Lazglafta kəʼa, kabga sɗiɗif a ka ta zwaŋa gha, kɗakwa ni turtuktuk wu, » kaʼa.
13Kəʼa ka Abraham klaŋtá ghəŋ ná, ka nghaŋtá tsi ta maŋazak ŋaghu skwi ta duli ma mubukwa fu. Ka sliʼaftá Abraham klaktá tsa maŋazak ya ka drafta tsuh tsuh ka skwa pla ghəŋ da manaka zwaŋa ni. 14Ka hgə Abraham ta tsa vli ya ka: « Dzaʼa payaf paya Yawe, » manda ya ta mnə lu gitana « Ta ghwá Yawe dzaʼa payafta lu, » kaʼa.
Waɗglata Yawe ŋa dzraftá wi nda Abraham
15Ka hgaŋtá tsa duhwala Yawe daga ta luwa ta Abraham ka mahis, 16kaʼa mantsa: « Waɗa waɗa vərɗa iʼi ka ghəŋa ɗa, ka Yawe mnata. Ta ghəŋa magata gha ta tsa skwi ya, kul sɗaɗifta nda zwaŋa gha kɗakwa ni turtuktuk ya, 17kahwathwata dzaʼa tfaghagha tfa yu ta wi, dzaʼa yaghaf ya yu ta zivira, dzaʼa nanaf na yu guli tusak manda tekwatsa ta luwa, manda wutak ta wa ghwa. Dzaʼa zaza zivira gha ta luwaha ghumaha ni. 18Nda ma hahəŋ, dzaʼa tfanagha tfa yu ta wi ta inda mndəra mnduha ta ghəŋa haɗik, kabga sna sna ka ta lwa ɗa, » kaʼa. 19Ka vraghutá Abraham slanaghatá tsa kwalvaha ni ya, ka sliʼaftá həŋ ka laghu kawadaga da Bəʼerseva, ka nzatá Abraham ma Bəʼerseva.
La ga Nahur zwaŋama ni ma Abraham
20Tahula luta tsa skwiha ya, ka sagha lu mnanatá Abraham guli kazlay: « Waʼa yayana yaya Milka guli ta zwani ta zwaŋama gha Nahur kəʼa. » 21Ghuts zumala ni, Buz zwaŋama ni, Kemuʼel ŋa mahkən, tsatsi da ni ma Aram. 22Mamu guli, Keset, nda Hazu, nda Pildas, nda Yidlaf, nda Betwel. 23Tsaw, Betwel ta yatá Rebeka. Tsaha ya zwani tghas yayana Milka ta Nahur zwaŋama ni ma Abraham. 24Mamu markwa sanagha guli ga Nahur Reʼuma hga ni, ka yayatá tsatsi guli ta i Tevah, nda Gaham, nda Tahas, nda Maghaha.
Επιλέχθηκαν προς το παρόν:
Zlr 22: xed
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Wycliffe Bible Translators, Inc. All rights reserved.