Zlr 17
17
Dzrəglafta Lazglafta ta wi nda Abram
1Təmbay mbsak təmbay mida ima Abram, ta maravatá Yawe da tsi. Kaʼa nda tsi mantsa: « Iʼi Lazglafta ta Mbruta. Nza nza ta nzaku ɗina ta kəma ɗa, ka maga ka ta skwi ta zɗəgihata. 2Mantsa ya ná, dzaʼa dzraf dzra yu ta wi nda kagha, dzaʼa yanaf ya yu tusak ta zivira gha, » kaʼa. 3Ka zləmbatá Abram zlumbruh ta haɗik. Ka Lazglafta nda tsi guli mantsa: 4« Wya dzratá wa ɗa nda kagha: Dzaʼa nzakway ka, ka da ni ma mndəra mnduha tusak. 5Hgəgəlta a lu ta kagha ka Abram wu, ama Abraham dzaʼa hga lu ta kagha, kabga dzaʼa naghaf na yu ka da ni ma ndəghata mndəra mnduha tusak. 6Dzaʼa yaghaf ya yu ŋa nzakwa mndəra ghuni tusak. Dzaʼa nzakway ka ka dzidza mndəra mnduha. Dzaʼa sab sa mghamha ma kagha guli. 7Dzaʼa dzraf dzra yu ta wi nda kagha, nda ya nda zwana gha, nda ya nda zivira taŋ tani, ha ŋa kɗekedzeŋ. Mantsa ya tama, ŋa nzakwa ɗa ka Lazglafta gha, ka Lazglafta zivirha gha ta hula gha guli. 8Dzaʼa vlagha vla yu ŋa gha nda zivira gha ta hula gha ta na haɗik ta nzaku ka mida ka mayəm na. Dzaʼa nzakway inda haɗika Kanʼana ka ŋa ghuni ŋa ɗekɗek. Dzaʼa nzakway yu ka Lazglafta tsa zivira gha ya, » kaʼa.
Zlrafta tsatá fafaɗ ta nzakway ka ŋizla dzratá wi
9Ka Lazglafta nda Abraham guli mantsa: « Kagha nda zwana gha tani, nda zivirha gha tani, ha ŋa kɗekedzeŋ, ka ŋanata kuni ta dzratá wa ɗa nda kaghuni. 10Wya tsa dzratá wa ɗa ta kum yu ta ŋanata ghuni, kagha nda zwana gha nda zivirha gha tani ya: Dzaʼa tsay inda zgun mataba ghuni ta fafaɗ. 11Tsa ɗatsatá fafaɗ ta vgha ghuni ya dzaʼa maraŋtá ŋizla dzratá wi mataba ɗa nda kaghuni. 12Ha zivir zivira ghuni, dzaʼa ɗatsay lu ta fafaɗa inda zwaŋa zgun yaga lu ka nda maga fitika ni tghas. Mantsa ya ŋa vuʼaha yayaga lu ga ghuni, ka ŋa vuʼaha dzawak ka, kul haɗ ka mndəra ghuni a tsi. 13Mantsa ya tama, dzaʼa ɗatsana ɗatsa lu ta fafaɗa vuʼaha yayaga lu ga ghuni, nda vuʼaha ya dzawak ka nda tseda gha tani, kada nzakwa ŋizla dzratá wa ɗa ta sluʼuvgha ghuni ya, ka dzratá wi ŋa kɗekedzeŋ. 14Zgun ya kul tsaku fafaɗa ta vgha ni, dzaʼa dgana dga lu nda mndəra taŋ, kabga kwalaghu kwala ta snatá dzratá wa ɗa ŋa ɗekɗek ya, » kaʼa.
Tatá imi ta sləməŋ ta ghəŋa Izak
15Ka Lazglafta nda Abraham mantsa: « Yaha ka da hgəgəltá markwa ghuni Saray, ka Saray. Daga ndanana, Sara hga ni. 16Dzaʼa tfanagha tfa yu ta wi, dzaʼa vlagha vla yu ta zwaŋa zgun nda ma tsatsi. Dzaʼa tfanagha tfa yu ta wi ta tsa marakw ya, ŋa nuta ni ka midza mndəra mnduha kavghakavgha. Dzaʼa sap sa mghamha ma mndəra mnduha nda ma tsatsi, » kaʼa.
17Ka zləmbatá Abraham zlumbruh ta haɗik. Ka ghuɓasu tsi ta ghuɓasu. Kaʼa ma ghəŋa ni mantsa: « Waká yu dzaʼa yəglatá zwaŋ, ta iʼi dərmək ima ɗa na? Təmbay mbsak ima Sara, waká a dzaʼa yəglatá zwaŋ guli na? » kaʼa. 18Ka Abraham nda Lazglafta mantsa: « Ka nza Yismaghel ləŋləŋ ta kəma gha, » kaʼa.
19Ka Lazglafta nda Abraham mantsa: « Mantsa a wu! Markwa ghuni Sara dzaʼa yaghatá zwaŋa zgun. Izak dzaʼa hga ka. Dzaʼa dzraf dzra yu ta wi nda tsi, mantsa ya nda zivirha ni ta hula ni. Dzaʼa nzakway tsa dzratá wi ya ŋa kɗekedzeŋ. 20Ta ghəŋa skwi ya ta nghanaghatá Yismaghel ná, nda sna yu ta tawa gha. Dzaʼa tfanagha tfa yu ta wi. Dzaʼa vlaŋ vla yu ta zwani nda ndəgha. Dzaʼa yanaf ya yu tusak ta mndəra taŋ guli. Dzaʼa sab sa mghamha ghwaŋpəɗ his mida, dzaʼa nanaf na yu ka dzidza mndəra mnduha nda ndəgha. 21Ama dzratá wa ɗa ná, nda Izak dzaʼa fata yu, tsa zwaŋ dzaʼa yaghata Sara manda na luwa kɗaghalam ya, » kaʼa.
22Kɗakwa Lazglafta ta tsa gwaɗa ya nda Abraham, ka ŋlaghatá tsi ka zlanata.
Ɗatsanata Abraham ta fafaɗa gwal ga taŋ
23Ka hlaftá Abraham ta zwaŋa ni Yismaghel nda inda vuʼaha yayaga lu ma həga ga taŋ, nda gwal dzawak tsi nda tseda ni tani. Tsaha ya inda zgwana ma həga ga taŋ, ka ɗatsanatá fafaɗa taŋ baɗu va tsaya, manda va ya mnana Lazglafta.
24Təmbay mbsak təmbay mida ima Abraham ta tsanatá lu ta fafaɗ ta vgha ni. 25Yismaghel ya ná, ghwaŋpəɗ hkən ima ni ta tsanatá lu ta ŋa ni fafaɗ guli. 26Baɗu va tsa fitik turtuk ya ɗatsata lu ta fafaɗa i Abraham nda zwaŋa ni Yismaghel. 27Mantsa ya ŋa inda zgwana ma həga ga Abraham, nda vuʼaha yayaga lu ga taŋ, nda vuʼaha dzawak tsi nda tseda ni ka mayəm tani, ka ɗatsatá lu ta fafaɗa taŋ demdem nda Abraham tani.
Επιλέχθηκαν προς το παρόν:
Zlr 17: xed
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Wycliffe Bible Translators, Inc. All rights reserved.