Zlr 18
18
Dzaʼa mutsay Sara ta zwaŋ, ka Lazglafta
1Ka zlagaptá Yawe da Abraham ndusa nda sana fuha dagala dagala ma Mamre, ta nzaku Abraham ta wa tgha lami da həga tumpula ni ma tsaka fitik. 2Kəʼa Abraham klaŋtá ghəŋ ná, ka nghaŋtá tsi ta mnduha hkən ta sladu manda a ndusa nda tsi. Nghaŋta ni ta həŋ, ka sliʼaftá tsi nda hwaya daga tawa tsa həga tumpul ya, da guya həŋ, ka tsəlɓatá tsi ka dzatá ghəŋ ta haɗik. 3Kaʼa mantsa: « Rvera ɗa! Ka si zɗəɗiŋ zɗa ka ta huɗi katsi ná, kdəkkdək sladava slada ga kwalva gha. 4Ka təgaghunapta lu ta imi rauʼ, ŋa mbaziŋtá səlaha ghuni, mbiʼapha kuni ta vgha mista fu. 5Ka la yu da zbəgaghunaptá ɗuvul ŋa ŋaghunatá ŋuɗuf. Tahula tsa ŋa kəɗay ghuni ta ksa tva ghuni. Waká kuni dzaʼa lab nda ta wa tgha ga kwalva ghuni mantsa na, » kaʼa. Ka həŋ mantsa: « Aray! Maga maga manda ya mna ka, » ka həŋ.
6Ka gi ndadamtá Abraham da həga tumpul da mnanatá Sara, kaʼa nda tsi mantsa: « Tsəɗa a tsəɗa misimmisim ta darama hpu hkən səskata ni, ka hwaɗamta ka, ka data ka ta gatu, » kaʼa. 7Ka hwayaghatá Abraham ta bra ksaktá mamakwa sla zəɗ ka zay, ka vlaŋtá kwalva ni, ka payaftá tsi misimmisim. 8Manda datá tsa sluʼi ya, ka klaftá Abraham kawadaga nda tawatá uʼa, nda uʼa nda vu nda vu ka fanamtá həŋ ma səla. Ka zə həŋ. Ka laghu Abraham sladakta mista fu ndusa nda həŋ. 9« Ga markwa ghuni Sara na? » ka həŋ ɗawaŋta da tsi. « Waʼa ma tumpul, » kaʼa. 10Ka sani turtuk mataba taŋ mantsa: « Dzaʼa vrak vra yu da ghuni kɗaghalam manda na luwa. Ta vraktá yu, yagha ya Sara markwa ghuni ta zwaŋa zgun, » kaʼa.
Ta snay Sara ta nzaku ta wa tgha tumpul nda hula Abraham. 11Nda hala i Abraham nda Sara. Lula ima taŋ. Tsaghu tsa sagha zuʼi ta Sara. 12Ka ghuɓasu Sara ta ghuɓasu ma huɗi ma huɗi, kaʼa ma ghəŋa ni mantsa: « Nda hala yu, nda hala zəʼala ini guli. Ma na halata iʼi na dza mutsafta yu ta zɗaku#18:12 Laviŋ lava lu ta mnay guli: Ma na halata iʼi na dzaʼa mutsafta yu ta zwaŋ ra? kəʼa. ra? » kaʼa.
13Ka Yawe nda Abraham mantsa: « Kabgawu kəl Sara ka ghuɓasu nda mnay kazlay na: “Kahwathwata ná, dzaʼa yay yu ta zwaŋ nda na halata iʼi na ra,” kəʼa na? 14Mamu skwi ta malaghutá mbrakwa Yawe ra? Manda va na luwa kɗaghalam, ta vraktá yu da ghuni, mutsaf mutsa Sara ta zwaŋa zgun, » kaʼa. 15Ksuta ni ta Sara ka zləŋ, kaʼa mantsa: « Si ga! ghuɓasaŋ a yu ta ghuɓasu wu, » kaʼa. « Mantsa, si ta ghuɓasu kay ɓa! » ka Yawe nda tsi.
Duʼa Abraham ta ghəŋa Sədum nda Ghamura
16Ka sliʼaftá tsa mnduha ya hada, ka ksa tvi ka ngha vli nda təv Sədum. Ka sliʼaftá Abraham ka pghadaptá həŋ. 17Ka Yawe mantsa: « Dzaʼa ɗifana ɗifa yu ta Abraham ta skwi dzaʼa yu magay ra? 18Ya wana dzaʼa nzakway Abraham ka dzidza mndəra mndu dagala, nda mbra, nda ma tsatsi dzaʼa mutsafta ndəghata inda mndəra mnduha ta haɗik ta tfa wi. 19Zbap zba yu ŋa mnanaftá zwana ni, nda gwal ma həga ga taŋ ta hula tsatsi, ŋa ŋanata taŋ ta tva skwi ta mnə Yawe, ŋa magay taŋ ta skwi tɗukwa nda ya ka kahwathwata. Mantsa ya tama, dzaʼa magana maga Yawe ta skwi ya tanaf tsi ta imi ta sləməŋ ta Abraham, » kaʼa.
20Ka Yawe mantsa: « Dagala wahu ta wahu lu ta ghəŋa ghwaɗaka skwi ta mag mnduha ma Sədum nda Ghamura, furtu furta dmakwaha taŋ guli. 21Ta kumay yu ta laha da nghanata ka mnda va tsa ta wahu həŋ ta snaɗighata ya tsi. Ka mantsa a tsi wu, ka ghəŋ yu ka snanata, » kaʼa.
Ndəɓa dzva Abraham ŋa Lazglafta
22Ka sliʼaftá tsa mnduha ya, ka dzaʼa nda ma Sədum, ta gɗavatá Abraham ta sladu ta kəma Yawe. 23Ka gavanavatá Abraham, kaʼa mantsa: « Dzaʼa va zaɗana zaɗa ka ta tɗukwa mnduha kawadaga nda ghwaɗaka mnduha ra? 24Kawayaka skwi mamu tɗukwa mnduha ta maga hutaf mbsak ma tsa luwa ya. Dzaʼa va zaɗana zaɗa ka ta tsa luwa ya ra? Plinista a ka ta dmakwa ni dabga gwaɗa ta tsa tɗukwa mnduha hutaf mbsak mida ya ra? 25Haɗ kagha dzaʼa maga skwi manda tsaya wu, ŋa zaɗanata gha ta tɗukwa mnduha kawadaga nda ghwaɗaka mnduha wa. Magta a kagha ta skwi mantsa ya ŋa tɗukwa mnduha kawadaga nda ghwaɗaka mnduha wa. Magta a kagha mantsa ya wa. Kagha ta tsanaghatá guma ta inda haɗik ná, tsata a ka ta guma nda tva ni wu ra? » kaʼa. 26Ka Yawe mantsa: « Ka slaf sla yu ta tɗukwa mnduha hutaf mbsak ma luwa Sədum katsi, dzaʼa plinis pla yu ta dmakwa inda tsa luwa ya, kabga gwaɗa ta tsa mnduha ya, » kaʼa.
27Ka Abraham guli mantsa: « Wya dzvu, iʼi ta nzakway ka gəninik, ka hutiɗifa skwi, kwara kwara ya ta mag yu ka gwaɗa nda kagha Rvera ɗa. 28Kawayaka skwi dzaʼa pɗa pɗa lu ta mnduha hutaf mataba tsa tɗukwa mnduha hutaf mbsak ya, dzaʼa zaɗana zaɗa ka ta tsa luwa ya ta gwaɗa ta tsa mnduha hutaf ya ra? » kaʼa. Kaʼa mantsa: « Ka mamu tɗukwa mnduha fwaɗ mbsak hutaf mida ná, haɗ yu dzaʼa zaɗanata wu, » kaʼa.
29Ka Abraham nda tsi kay guli mantsa: « Kawayaka skwi a ka fwaɗ mbsak yeya ka lu slanaghata? » kaʼa. Kaʼa mantsa: « Haɗ yu dzaʼa zaɗanata ka slanagha sla yu fwaɗ mbsak wu, » kaʼa.
30Ka Abraham guli mantsa: « Kdəkkdək, yaha Rvera ɗa da ɓasa ŋuɗuf ka tata kɗaŋtá gwaɗa yu. Kawayaka skwi a ka hkən mbsak yeya kəʼa slanaghata? » kaʼa. Kaʼa mantsa: « Haɗ yu dzaʼa zaɗanata ka slanagha sla yu ta tɗukwa mnduha hkən mbsak hada wu, » kaʼa.
31Ka Abraham guli mantsa: « Wana yu ta kwara kwara kay guli ka gwaɗa nda Rvera ɗa. Kawayaka skwi a ka hisambsak kəʼa slanaghata? » kaʼa. Kaʼa mantsa: « Haɗ yu dzaʼa zaɗanata dabga tsaha hisambsak ya wu, » kaʼa.
32Ka Abraham mantsa: « Wya dzvu Rvera ɗa, yaha ka ɓasa ŋuɗuf, ta turtuk ta ɗawaŋta yu ŋa kwanaha ni. Kawayaka skwi ghwaŋ yeya a ka kəʼa dzaʼa slanaghata? » kaʼa. Kaʼa mantsa: « Haɗ yu dzaʼa zaɗanata dabga tsaha ghwaŋ ta wu, » kaʼa. 33Manda kɗiŋta Yawe ta gwaɗa nda Abraham, ka sliʼaftá tsi ka laghu, ta vraghutá Abraham dzagha ni.
Επιλέχθηκαν προς το παρόν:
Zlr 18: xed
Επισημάνσεις
Κοινοποίηση
Αντιγραφή
Θέλετε να αποθηκεύονται οι επισημάνσεις σας σε όλες τις συσκευές σας; Εγγραφείτε ή συνδεθείτε
© Wycliffe Bible Translators, Inc. All rights reserved.