LEIYENBÜ 7
7
1Kheijinei Bunyubouei Mosa to laukei, “Chühashi, ngei no Farao junga Mühghaü che tegü yeitida; hoba kajai Aron ka shanga thuseibü yinglabü. 2Ngei ka la sakkubü pendou joyolabü hoba Faraoei Israel shousi shuong haoeibü kaodak ka sattila kajai Aronei hao to joyolabü. 3Lausikei ngei Farao maang kaangtilabü, hoba ngeibü tetsida hoba seikümseilei Ijep kaodaka haatilabü, 4lausikei Faraoei ka to ngüha alekulabü. Kheijinei ngei Ijep to ngeibü ik atlabü hoba matjem yaangei Ijep kaodak ka kü mütli Israel shousi shuong leiyenlabü. 5Hobaje ladang ngei Ijep thükto ngei ik shingan Israel shousi shuong haoen yoka leiyenlaje, kheijinei Ijepbüei ngo Bunyubou ki dogo ngelabü.” 6Hobaje Mosa si Aron hamei Bunyubouei haosi to lenbü kümbei. 7#Ykj 7.23,30 Hobaje haosiei Farao to joyojinei Mosa po saolei hoba Aron saoleito sem kiteikei.
Aroneibü Ju
8 Bunyubouei Mosa si Aron to laukei, 9“Ladang Faraoei ka to, ‘Nyi seikümseilei che lenashi’ dogo laulaje kheijinei nyi Aron to haoeibü ju sungan Farao thedangto tekan litikula lenshi, hoba khoei pinyu che la yeilabü.” 10Hibü Mosa si Aron Farao jungto haukei, hoba Bunyubouei sakkubü tegü kümbei. Aronei Farao si hao khangenbü thedanga haoeibü ju attikei; hoba kho pinyu che la yeikei. 11Kheijinei Faraoei songngedongebü hoba huonseibü shuong ngaishaikei, hoba Ijep kaodak kabü huonseibü shuongeikei thapboseiko kho tegü kümbei. 12Aishanga haoen mütpem wekoei lulueibü ju attikei, hoba khübü kho pinyu la yeikei. Lausikei Aroneibü Juei haoeneibü ju pendou suian apbei. 13Khei yingankei Farao maangpon kaangkhühtham yeikei, hoba Bunyubouei laubü tegü haoei haosi to ngüha ale.
Thushedei Ijep to Ngümbü
Sii Lim
14Kheijinei Bunyubouei Mosa to laukei, “Farao maangpon kaangan apa, hoba haoei eikshuong hautila maangüangda. 15Ngeyang Farao Nail yungko to haujinei no hao jungto hauashi. Hobaje nyi pinyu la yeitibü ju kho ka ika jungan yungkoa haiyeiko kishi. 16Hobaje nyi hao to lenshi, ‘Ibri Mühghaü Bunyubouei ka to ho lenla ngo hautikei: Yama haoenei kü to lemtila shanga kü mütshuong hautiashi. Lausikei nyi tou sühko ngüha ale. 17#Tk 16.4 Bunyubouei ho hai lauda: Hoei nyi ngo Bunyubou kia dogo ngelabü: Chühashi, kü ik kabü ju hoei ngei dei to ngümlabü, hoba kho sii la yeilabü. 18Hobaje Nail shumanga kibü ngau hailabü, hoba shumang khüka nyaülüm hilabü; hoba Ijepbüei khüka dei yungla asomlabü.’ ”
19Hobaje Bunyubouei Mosa to lenkei, “Aron to lenashi, ‘Kaibü ju jungashi, hoba sii yeitila shanga kaibü ik Ijep dei shuong khei, shumang shuong, deilam shuong, hoba sametbü deidang shuong thüka kaibü ik shingan ngümashi. Hobaje Ijep kaodak pendoua buphau si laangphau pendoua sii kilabü.’ ”
20Kheijinei Mosa si Aronei Bunyubouei sakkubü tegü kümbei. Hobaje Aronei Farao si hao khangenbü thedanga haoeibü ju tuokkei hoba Nail shumang kabü dei to ngümbei, hoba shumanga kibü dei pendou sii la yeikei. 21Shumang kabü ngau pendou haikei, hoba shumang ka nyaülüm hibüei Ijepbüei shumang ka dei ayungen. Hobaje Ijep kaodak pendou aenei sii kikei. 22Lausikei Ijep kabü huonseibü shuongeikei thapboseiko kho tegü kümbei, khoei Farao maangpon kaangngaikei; hoba Bunyubouei joyobü tegü, haoei Mosa si Aron ngüha ale. 23Yongbou, Farao haoeibü chobachem to khüpeinyu ngaikei, hoba kho shangabü maangpona ongkei apho. 24Hobaje Ijepbü pendouei Nail yungkoa yunglabü dei lambo thukei, aishanga haoenei shumang dei kho ayungen.
25 Bunyubouei shumang to ngüman phaia chalou nyet onkei.
Zur Zeit ausgewählt:
LEIYENBÜ 7: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
