LEIYENBÜ 2
2
Mosa Bukbü
1Tou Levi mütli kabü cheei hao phangsao che yakla ngakei, 2#Ibr 11.23 hoba kho sao mang akongko apbei hoba bousu shou che bukkei. Hobaje saoei hao bousushou maibü che dogo chühenan saoei hao lit sem huan phokei. 3Hobaje ladang saoei hao huan phola athükko apbei, kheijinei saoei dangkung sungan kam maibüshou che wouan sennaangei naanglepan nashou kho khünei jinan Nail Shumang yungkoa thakdu laak phanga phokukei. 4Hobaje hao aila yeilaje dogo haonou saabüa loan kiteikei.
5Kheijinei Faraoeibü shou nouyangshou Nail Shumang to mangyula yankei, hoba saoeibü samnyu yungkoa paiko kikei, kheijinei saoei kam kho thakdu long phanga hapbei; hoba saoeibü samnyu kho sungla hautikei. 6Saoei kho ipbei hoba nashou kho hapbei. Hao haapbo kikei, hoba saoei kho phokeikei, hoba laukei, “Ho Ibribü shousi yoa che ki.”
7Kheijinei hao nouei Faraoeibü nouyangnyu to laukei, “Ka shanga Ibri sao shuong yoa nanubü nyu che na kho chühla ngo hauan ngakukho no?”
8Saoei jongaikei, “Hoat, hauashi.” Hobaje medeinyu kho hauan naeibü nyu ngakukei. 9Hobaje Faraoeibü nouyangnyuei sao to laukei, “Nashou ho leian hauashi, hoba kü shanga hao pangteiashi, hoba ngei ka la kaibü mu kulabü. Kheijinei yaksanyu khoei nashou kho sungkei.” 10#Ykj 7.21 Hobaje nashou kho chingkei hoba saoei hao kho Faraoeibü nouyangnyu jungto leian loukei, hoba hao saoeibü shou la yeikei. Saoei haoeibü nyen Mosa#MOSA: ngühtet, Senan sungkei nyenkukei, hoba laukei, “Aieilausi ngei hao dei ka sungenkei.”
Mosa Midian Kaodak to Satbü
11 #
Ykj 7.23
Mosa chingan phaia, nyetche hao hao mütli peanchühla hauan, haoen khonkuko kümti leitibü chühkei. Ijepbü cheei hao mütli Ibribü che ngümeiko hapbei. 12Haoei sepeisai chühan müt ao ühüpsije haoei Ijep bou kho ngümettian phetsena jonlepnyu huan phokei. 13#Ykj 7.26 Nyibounyet hao haukei hoba haoei Ibribü müt nyi oyoko hapbei. Hobaje haoei shedbou to laukei, “Aila nyi kaibü jenabou Ibribü to ngümda?”
14 #
Ykj 7.27
Hobaje haoei laukei, “Aoei no kün thüka songdakbou hoba matjembou yeitikei? Ijepbü haitibü tegü nyi ngokei haitila damda sai?” Kheijinei Mosa hatkei hoba haoeibü maanga dambo laukei, “Maimai, ngei ai kümbei kho ngeena.” 15#Ykj 7.29 Tou ladang Faraoei kümsilei kho ditkei, haoei Mosa haitila lambei. Lausikei Mosa Farao jungka Midian kaodaka kila satkei, hoba hao deikhün che nyangko setkei. 16Tou Midianbü ungshedbouei yaksa shou müt nyet kiteikei, hoba haoen louan dei khukei, hoba boueibü sanshuong la dei kula meisok shentikei. 17Sanlombü at louan haoen nangan sattikei, lausikei Mosa meimeijung louan haoen püetkei hoba haoeneibü sanshuong la dei inkukei. 18Ladang yaksa shuong kho haoeneibü bou jungto longeikei, haoei laukei, “Kan tatje aila hainyu enyu longeida?”
19Haoenei laukei, “Sanlombü shuongeibü ik ka Ijepbü cheei kün püetkei. Tokei haoei kün la dei khukukei, hoba sanshuong thükto dei lakkukei.”
20Hobaje haoei haoeibü yaksa shousi shuong to laukei, “Hao lanei ki? Kanei aila müt kho apyokei? Hao oknyinlabü lele hao ngaashi.”
21Hobaje Mosaei hao yoa kila maang angkei, hoba Jethroeibü nouyangnyu Zippora yakla lekei. 22Zipporaei bousu shou che bukkukei, hoba haoeibü nyen Gershom nyenkei, aieilausi haoei laukei, “Ngo kükathanga yenla lea.”
23 #
Jkb 5.4
Po lounyu kian phaia, Ijep choba haikei. Lausikei Israel shousi shuong toukei khei ong wiyoko kikei, aieilausi haoen aaola lebü kho Mühghaü junga sühko angkei. 24Mühghaüei haoen wiyobü kho ditkei hoba haoei Abraham, Isak hoba Jakob to thebülanbü damenkei. 25Hibü Mühghaüei Israel shuong to chühkei, hoba haoen shanga dambukei.
Zur Zeit ausgewählt:
LEIYENBÜ 2: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
