LEIYENBÜ 1
1
Israelbü shuong Ijep Kaodaka Amaiko Jungeibü
1Tou Israel shousi shuong mütpem weko lulu chempen yoa Ijep to Jakob yoa loubü shuong nyen habü ho ki. 2Reuben, Simeon, Levi hoba Jihuda, 3Issakar, Zebulun, hoba Benjamin, 4Dan hoba Naftali, Gad hoba Asher. 5Jakob ka pakbü müt pendouei anjinlei kikei, lausikei Josefje Ijepa hauan kiteikei. 6Touje Josef si haoeibü jaisinasi shuong pendou hoba kho meten pendou haikhümbei, 7lausikei Israel shousi shuongje aei thusinaang maiko bukko haako haukei.
8 #
Ykj 7.18-19 Kheijinei Ijep kaodaka Josef angebü choba haanbü che longkei. 9Haoei hao mütshuong to laukei, “Chühashi, Israelbü shuong mütshang aei juongbou hoba hau kibou yeida. 10Kaiya, haoen haako hauan wapyo longalonga haoen seneibü dangbou shuong yoa yoan sen khulimbo wapyoan kaonyek ka satsi amaibüla hoba haoen aei haakoyaangko ohautila senei haoen amaiko jungeikho.” 11Hibü Ijepbüei haoen thükto onat jinkuko haoen shieinangeila shanga haoen thüka lombü shuong phokei, hoba haoenei Farao shanga shaubu thanshang sangnyu shuong Pithom si Rameses kümbei. 12Lausikei haoenei latetche shieinangeida, khütetche haoen aei aei haakei; hibü Ijepbü shuongei haoen khei jungeila hatkei. 13Hobaje Ijepbüei Israel shousi shuong aeibou shieikoeko khangentikei. 14Shungkung tham thamjuok hoba sekmou chemmou kümsilei pendouei haoeneibü langkei khauektham yeitikei hoba haoeneibü kümsilei pendoua haoen la tukosekko kümtikei.
15Kheijinei Ibribü sao na hapjinei thuibü müt nyi Shifra si Pua nyenbü to Ijep chobaei laukei, 16“Ladang kanei Ibribü nyuei na hapbüa thuilaje bousu yinga longa haitiashi hoba yaksa yinga longa lang phoshi.” 17Lausikei na hapbü thuinyu shuongei Mühghaü to hatkei, hoba Ijep chobaei haoen la ngühkhüm kubü tegü aküm, lausikei bousu nashou shuong lang phokei. 18Hibü nahap thuinyu shuong kho Ijep chobaei ngakei hoba haoen to laukei, “Kanei aila ho hai kümbei? Aila bousu nashou shuong lang phokukei?”
19Nahap thuinyu shuongei choba to laukei, “Aieilausi Ibri saoje Ijep sao tegü aying; aishanga haoen aeibou sokeisepbei, hoba nahap thuinyu shuong asühtoua na hapan kiteida.” 20Kho tegü Mühghaüei nahap thuinyu to yoko jungeikei, hoba haoen mütshang aei haakoyaangko hoba hau kiko yeikei. 21Nahap thuinyu shuongei Mühghaü to hatsije haoei haoeneibü chemdang maibü longtikei. 22#Ykj 7.19 Kheijinei Faraoei hao mütshuong la ngühkhüm kuko laukei, “Ibri saoei bukbü bousu shou pendou Nail shumang to tekan jinkushi, lausikei kanei yaksaje lang phokushi.”
Zur Zeit ausgewählt:
LEIYENBÜ 1: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
