LEIYENBÜ 16
16
Mana si Auet
1Hobaje haoen Elim ka meimeijung Israel shousi shuong pendou Ijep kaodak ka bangan lit nyiboubü, chalou anthük ngaoboubüa Elim si Sinai kanglanga kibü Sin yamlamang to loukei. 2#1 Kor 10.10 Yamlamanga Israel shousi shuong pendou Mosa si Aron khulimbo nyamnyambei. 3Israel shousi shuongei haosi to laukei, “Kün pheshik chak nyangko setan, wentekei senyühshembo shauko kijinei Ijep kaoa Bunyubou ikei kün haitikei tegüje maikhoulabü; aieilausi ho shuong khümbo yama mühei shemtila kasiei kün leian loukei.”
4 #
Jn 6.31 Kheijinei Bunyubouei Mosa to laukei, “Chühashi, ngei kan shanga müh ka wentek lang tegü jonan yantikulabü. Mütshuongei chalou angboua hauan khünyet southüng heshaijan. Khei kümbo, haoenei kü ngühkhüm phanga kiasaoje ngei haoen takteilabü.” 5Chalou lakbounyetje haoenei chemto sungbabü kho chalou angbou nyishou yoshaibü toje phejan nyiei juongbou yingjan, hoba kho lamlean phojan.
6Hibü Mosa si Aronei Israel shousi shuong to laukei, “Ijep kaodak ka kan leiyenbou kho Bunyubou dogo chasemlamto kanei ngelabü. 7Hobaje ngeyang kanei Bunyubou soneikangbü haplabü; aishanga Bunyubou khulimbo kan nyamnyambü haoei dida. Aieilausi kanei kün khulimbo nyamnyamlabü lele kün ao?” 8Hobaje Mosaei laukei, “Ladang Bunyubouei chasemlama kanla phe si wentek souko shaula kulaje, kheijinei hao khulimbo nyamnyambü haoei dida dogo kanei ngelabü. Kün ao? Kan kün khulimbo aying, lausikei Bunyubou khulimbo nyamnyamda.”
9Hobaje Mosaei Aron to laukei, “Israel shousi pendou to lenshi, ‘Bunyubou thedangto nyangko kaiya; aieilausi kan nyamnyambü haoei dida.’ ” 10Aronei Israelbü pendou to joyojinei haoenei yam aeto chühsi, Bunyubou soneikangbü sangmeia longkei. 11Bunyubouei Mosa to laukei, 12“Ngei Israel shousi shuong nyamnyambü dida. Haoen to lenshi, ‘Chasem kanei phe shaulabü, hoba ngeyang kanei wen shauan senyühshemlabü. Kheijinei kanei ngo kaneibü Mühghaü Bunyubou ki dogo ngelabü.’ ”
13Khünyet chasem auwet seengjung louan haoeneibü shaishang shenkei; hoba ngeyang shaishang kaijembo nin atan kikei. 14Ladang atan kibü nin kho ukei, kheijinei onan kibü nin onbü tegü hanpang on ona yama kao pendoua atan kikei. 15Ladang Israel shousi shuongei kho hapbei, haoen cheei che to laukei, “Ho ai?” Aieilausi kho ai yingkeije haoenei ange.
Mosaei haoen to laukei, “Ho Bunyubouei kan la shaula kubü shausiyung ki. 16Bunyubouei sakkubü kho ho ki. Kan mütpem wekoei luluei shauthüng heshaiashi; kan mütpem wekoei lulu neichema kibü lühbak thüng mütpem weko phau che che heshaiashi.”
17Israelbü shuongei kho tegü kümbei; atei aei atei shian heshaikei. 18#2 Kor 8.14-15 Hobaje ladang phaua takkei, aoei aei heshaikei haoeibü aei akitei hoba aoei shisho ong heshaikei haoeibükei asouko aying. Mütpem wekoei luluei shauthüng heshaikei. 19Hobaje Mosaei haoen to laukei, “Aoeikei ho ngeyang sühko joutian tepho.” 20Lausikei haoen ateije ngüha aleko ngeyang sühko phokei; hoba kho yang yangan nyaüan apbei; hoba Mosaei haoen to maangpokkei. 21Hobaje kho haoenei ngeyang weko mütpem wekoei luluei shauthüng heshaikei; hoba ladang chanyuei juokkei kho tühnyinkei. 22Hobaje lakbounyeta haoen mütpem wekoei shausiyung phejan nyi thüngei aei yoshaian phokei, kho mütpem weko phau nyibang. Noknyüh khuleibü dan pendou louan Mosa to kho shangabü lenkei. 23Hobaje haoei haoen to laukei, “Bunyubou sakkubü kho ho ki: ‘Ngiet kho saopotham haksolabü chalou, Bunyubou shanga saopobü nou. Kanei ai wentek kanglabü ki kangashi hoba ai ngulabü ki kho nguashi. Joubü pendou kho ngeyang sühko kan shanga phoashi.’ ” 24Mosaei sakkubü tegü haoenei kho ngeyang sühko phokei, hoba kho anyaüko kikei, tokei yangkei ayangko kikei. 25Mosaei laukei, “Kho tat shauashi, aieilausi tat Bunyubou shanga nou ki, tatje kho khonga kanei ühüplabü. 26Chalou lak kho kanei yoshailabü; lausikei nyetbounyet kho nou ki, khünyet ai akiteilabü.”
27Hobaje nyetbounyet müt at heshaila haukei, lausikei haoenei ai ühüp. 28Kheijinei Bunyubouei Mosa to laukei, “Kanei ngei sakkubü shuong hoba ngeibü ngühkhüm lalokche ajungeiko apla?
29“Chühashi, Bunyubouei kan la Nounyet kukei, hibü haoei kan la lakbounyeta nyinyet shanga shausiyung kua. Kan mütpem weko lulu kishanga kiashi; aoeikei nyetbounyet lulu kishang ka temeimei.” 30Hibü nyetbounyet mütshuong haksokei.
31Israelbüei ho to manad#MANA: tetlabü, Ho ai? dogo laukei, hoba kho koriandar buhek tegü thupaibü hoba kho shaula naodei jinan kümbü wentek peklebü tegü kikei. 32Mosaei laukei, “Ho Bunyubouei sakkubü kümsilei ki: ‘Ngei kan Ijep kaodak ka leiyenjinei aiei ngei kan yama pangteiko kikei, kho haoenei hapla shanga kaneibü shisi shuong shanga mana phau che shenko küpjeman phoashi.’” 33#Ibr 9.4 Hobaje Mosaei Aron to laukei, “Thamchak che sungan mana phau che shenko khünei jinashi, hoba meten pendou shanga Bunyubou thedanga küpjeman phoashi.” 34Bunyubouei Mosa la sakkubü tegü, Aronei Thesilan Busen junga küpjeman phola tentian phokukei. 35Hobaje müt kibü kaonyek che to aloushongko Israel shousi shuongei po saonyi sühko mana shaukei. Kanan kaonyek leilang asühshongko haoenei mana shauko kikei. 36(Tou omer che kho efa che anboubü kho ki.)
Zur Zeit ausgewählt:
LEIYENBÜ 16: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
