LEIYENBÜ 15
15
Mosaeibü Chia
1Kheijinei Mosa si Israel shousi shuongei Bunyubou la ho chia atkuko laukei:
“Ngei Bunyubou la chia atkulabü,
aieilausi haoei soneikangko thük hapa;
koli hoba khonei setbü haoei yungnyua shemtia;
2 Bunyubou kho ngeibü hau hoba ngeibü chia;
hoba hao ngo khümenbou yeia,
hao ngeibü Mühghaü ki hoba ngei hao sanglabü.
Hao ngeibü bousi shuongeibü Mühghaü,
ngei hao yaangentilabü.
3 #
Tk 19.11 Bunyubou kho lakjaibou ki;
haoeibü nyen Bunyubou ki.
4“Faraoeibü kailong hoba lakjaibü dan
haoei yungnyu to tekan jinkukei,
hoba pienbü lajamleibü shuong
Saklangbü Yungnyu maang to ada.
5Si haübüei haoen küplepa;
Laang che tegü haoen
yungnyu haüboua nyema.
6“O Bunyubou, kaibü mai ik seia hatlamoklabü che ki
O Bunyubou, kaibü mai ikei kaibü dangbou
netla yeiko jangnyinkua.
7No thükkaboua yaangenbüei,
kaibü dangbou shuong nyi pekan apda;
no khau lotbüa haoen youho tegü lonan aptida.
8Hobaje kaibü kungkhün hakei metbü ka
yungnyu kho chela onshaian apbei;
yungsen kho tangshaitham kümthang tegü lokei;
yungnyu deiyaaka si kho ontoula yeian apbei.
9Dangbou shuongei laukei,
‘Ngei shijung haulabü,
ngei laphetlabü;
ngei soletbü peisilei janan lelabü.
Haoen thüka ngeibümaangdak senyühshemlabü;
ngei ngeibü in setenlabü,
ngeibü ikei haoen shemtilabü.’
10Lausikei nyi hak metan jinkukei,
hoba yungnyuei haoen küplepbei.
Dei yaangbüa haoen shisanam tegü maangto atkei,
11“O Bunyubou,
saopobüa soneikangko,
nyensangbüa hatlamoklabü seikümseilei kümbo,
mühghaü shuong pendou yoa no phatko ao ki?
12Nyi kaibü mae ik shingkei
hoba kaoei haoen suikei.
13Kaibü üeisanouei nyi khümenbü eikshuong nyi leiyenkei;
kaibü haua nyi haoen kaibü saopobü kishang kaoen to leikei.
14Phangshuongei kho ditjinei haoen lühkei;
Filistiaa kibü shuong to khonkuei sühkei.
15Edoma leiyeibü shuong hatyomokyoko kikei;
Moab kaodak kabü bunyu shuong to hatbümokbüei sühkei;
Kanana kibü shuong tühnyinkei.
16Hatbülühbü jemtenbü haoen
thüka sühkei;
O BunyubouYUBOU, kaibü eikshuong adankhümshongko,
kaibü phem kaibü hauei haoen
laang che phatko atopeiko yeitia.
17O Bunyubou, nyi no kila
kümbü kishang;
O Bunyubou, kaibü ikei kümbü lemshang to,
nyi haoen leishaikei,
hoba nyi kaibü shongha phokukei.
18 Bunyubouei ponpen thon akiko chobalabü.”
Miriameibü Chia
19Ladang Faraoeibü koli shuong hoba kailong yoa haoeibü sepai shuong yungnyu jenyu to atkei, hoba nyibou yungnyu kho haoen thükto lottikei; Israel shousi shuongje yungnyu jenyua kao ulangbüa paitikei.
20Kheijinei Aroneibü nou thuseinyu; Miriamei jembü ik busena jungkei, hoba yaksa shuong pendouei sao phainei busen kaangko nyen sangko laukei;
21“Bunyubou to chia lauashi,
aishanga haoei soneikangbü thüksimin hapa;
haoei koli shuong hoba khonei setbü shuong
yungnyu maangto shemetlangtia.”
Khauekbü Dei
22Kheijinei Saklangbü Yungnyu ka Mosaei Israel shousi shuong leian thedang ae Shur phetsen kaodak to leian atkei. Yama chalou semnyet paian phaia haoenei dei ühüp. 23Ladang haoen Mara#MARA: tetlabü, Khauekbü to loukei, haoenei Mara dei kho ayungen; aishanga dei kho khauekbü kikei. (Khoei kaoeneibü nyen Mara nyenkei). 24Hibü mütshuongei Mosa khulimbo nyamnyamko laukei, “Senei ai yungla?” 25Hobaje Mosaei Bunyubou to welaukei; hoba Bunyubouei hao la bunetshou che lenkei, hoba haoei kho deia jinkusi dei kho teikei.
Khünei Bunyubouei haoen shanga sakkubü hoba Ngühkhüm che kümbei, hoba khonei haoei haoen takteikei. 26Haoei laukei, “Kanei kaneibü Mühghaü Bunyuboueibü ngüh noua nepbo ditko laualonga, hoba haoeibü Ngühkhüm pendou jungeiko dogo yingalonga, Ijepbü to sühtibü shatsinyat che ongkei ngei kan la asühtilabü; aishanga no maitibou Bunyubou kho ngo ki.”
27Kheijinei shumang anthüknyi hoba hekyang anjinlei kibü Elim sühko haoen loukei; hoba khünei dei nyangko haoen onshaikei.
Zur Zeit ausgewählt:
LEIYENBÜ 15: CHANGBSI
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.
