Jâŋ 11

Cwá Làjáàr yi kúré

1Nɨ̀ŋgwá kù yaá ku, ɨ́r noò yaá Làjáàr. Ŋgə́ ya dukom Bètànî, kwɨ́í Màríyà ɓe mɨkɨ̀r noò Máártà ya dukom nóò no. Làjáàr kɨ́ ɨ́ gù yə́b. 2Màríyà rè, nɨ̀gwi ya swiwúna Yésù làmɨ́ndà gure, ŋgə́ ɨ́ pə̀kcù ɓe mvɨ̀tí no ŋgwéné rè á. Làjáàr yi du yábnɨ rè cè wɨ́í nóò á. 3Nɨ̀gub bɨrɨ́b lè ɨ́ tôm nò kù tànànɨ Yésù ɨnè: «Kéké, ɓwàjìrí woò Làjáàr á yábnɨ.» 4Ɓwâ Yésù yi ók péìn kíì, ŋgə́ ɨ́ tà: «Yáb kɨ́ tɨ̀ nɨ Làjáàr kwíhɨ̀r. Yáb kɨ́ du nɨ àm túmnɨ nyòm Mèèín á, kùb a mgbíìcè Mwin Mèèín.»

5Yésù yaá ɗúɓànɨ Máártà ɓe wɨ́í nóò Màríyà, ɓe Làjáàr ɓwê. 6Ɓwâ ŋgə́ yi ók ɨnayâna Làjáàr á yábniì, ŋgə́ ɨ́ gwíncùyè nɨ́ yɨ́ ŋgə́ yi dukom ndè jíì bɨrɨ́b. 7Ŋgə́ ɨ́ tànà nɨ̀fuùb noò ɨnè: «Nɨ́m gɨ̀cùná Jùdê.» 8Á nɨ̀fuùb tana ŋgə́ ɨnè: «Tá tɔ̀hí, jíìb víyèwá, kùb tɨ ɗúú wu lóòŋkwíìkɨ́nɨ Jùdê ku ɓe sɨɨ, wu tà ní gɨcuhá ku na á à?» 9Á Yésù tana ŋgáb ɨnè: «Yàrénɨ yekɨ́rɨ̀b há̧á̧ lɨ́tɔ̧ɔ̧́, duha mvihin á ye? Nɨ̀vɨ́tè ɨ́ dù gìnɨ gùr mvihin, sàmàìn ŋgə́ jób nɨ́m kù ɗàà, ɓetí ŋgə́ á pə́ɓànɨ mwa fèín. 10Ɨ́dù nò kù ɨ́ dù gìnɨ gùr cɨ́ɨ́m, ŋgə́ ɓa nɨ jóbnɨ nɨ́m kù á, ɓetí ŋgə́ á nɨ nàkɨ̀ɨ̀m, mwa ɗàà.» 11Yésù nyinna ŋgáb u̧, á ŋgə́ takwa: «Ɓwàjìrí nɨ́mè Làjáàr á nɨ́ wumí, mɨ gɨ̀yè ŋgə́ sə̀ə̀mnɨ mbáb.» 12Á nɨ̀fuùb tana ŋgə́: «Tá tɔ̀hí, duú ɓe ŋgə́ du wumí, ŋgə́ ɓa wáàŋnɨ á.» 13Yésù yi tana nɨ̀fuùb noò ɨnayâna Làjáàr kúú nɨ́ na á, nɨ̀fuùb ɨ́ lə́ə̀mgì bɨ́ ŋgə́ ta nɨ wum nɨ̀mɨ́r á. 14Á Yésù wáanagi ŋgáb ɨnè: «Làjáàr kúú nɨ́. 15Mɨ óktɨ́ mɨ̀tù hȩ mɨ tɨ du mɨ́ ɗàá ɗàwáá! Nɨ́m kɨ́ ndɨŋ u̧ ɓe ɨ́r nyínè á, àm nyí a ə́mnè mé. Nɨ́m gɨ̀ná ku.» 16Á Tòmâ (kùb yi ɓékom nyɔ̧ɔ̧) tana kùb noò nɨ̀fuùb ɨnè: «Nɨ́m gɨ̀náɓwêtɨ, nɨ́me ŋgáb kúɓáà cúk!»

Yésù ɨ́ du sə̀ə̀mcùhó̧nɨ kùb cwéé, ŋgə́ a nà mè mɨ̀cɨ̧̀ ru

17Ɓwâ Yésù féínndé, ŋgə́ ɨ́ kwà Làjáàr á cɨ̀ sèrìn jíì nààsɨ̀b. 18Bètànî yaá gín Yèrúsàlèm sàmàìn kílòmétà taarɨ́b. 19Jwîf bɨ ví̧i̧ yi gáíwonaá Máártà ɓe Màríyà cwá wɨ́í ɓóò Làjáàr. 20Ɓwâ Máártà yi ók Yésù á gòniì, ŋgə́ ɨ́ gì ŋgə́ gàmnɨ jȩ̀ȩ̀, Màríyà ɨ́ mè yó. 21Máártà ɨ́ tànà Yésù ɨnè: «Kéké, wu tɨ dùyè hò̧, wɨ́í móò yè nɨ́ kúwa. 22Ɨ́dù mɨ ɗəəŋtɨ́, dùgɨ̀ ɗàrò, nɨ́m wu ɓa ɓwèìnɨ Mèín ndɨ, ŋgə́ ɓa wu nànɨ nyòm wu ndɨŋndé á.» 23Á Yésù tana ŋgə́: «Wɨ́í wóò ɓa sə̀ə̀mcùnɨ á.» 24Máártà ɨ́ tà: «Mɨ ɗəəŋtɨ́ ŋgə́ kwá səəmcu ye cáŋhɨ̀rí, ɓwâ nɨ̀kwííb kwá səəmcuhó̧ sèrɨ̀nnè.» 25Yésù ɨ́ tànà ŋgə́: «Mɨ du nò sə̀ə̀mcuhó̧ nɨ̀kwííb, mɨ a nà ŋgáb mèè á. Nò ə́mne mé, ŋgə́ kúgɨ̀ kú̧u̧, ŋgə́ ɓa kwànɨ mè á. 26Nò du ɓe mè, ɨ́ ə́mnè mé tɨ̀ nɨ kûr, wu ə́əmtɨ́ u̧ à?» 27Á Máártà ta: «I̧i̧, Kéké! Mɨ ə́əmtɨ́ wu ɨ́ du Mèsî, Mwin Mèín ya ɓwáí tómwònɨ ɗɔ̀bɨ́nné ru.»

Yésù á kɨ́ínɨ cwá Làjáàr

28Máártà nyincáŋhȩ u̧, ŋgə́ ɨ́ gì fɔ̀ɔ̀nànɨ wɨ́í nóò Màríyà ɨnè: «Tá féínwotɨ́, ŋgə́ ta wu gɨ̀sòo.» 29Jɔ̀ Màríyà óknɨ pénè kíì, ŋgə́ ɨ́ éíwúkɔ́hè, gànnɨ Yésù. 30Yésù ya nɨ́ kwé lə́yèwá, ŋgə́ yaá háyè nɨ yɨ́ Máártà yi gɨ ŋgə́ gàmnɨ jȩ̀ȩ̀ rè. 31Ɓwâ Jwîf bɨ yi gáíwo cwá kíì yi pə́ Màríyà fó̧kɔ́ɔ̀niì, ŋgáb ɨ́ tù ŋgə́. Ŋgáb yi lə́mne bɨ́ ŋgə́ gɨ nɨ sèrìn kɨ́kɨ́rí á.

32Ɓwâ Màríyà yi féín yɨ́ Yésù duré, ŋgə́ ɨ́ pê ŋgéé, á ŋgə́ gucáamsé Yésùù ɓusiín, ŋgə́ ɨ́ tà: «Kéké, wu tɨ dùyè hò̧, wɨ́í móò yè nɨ́ kúwa.» 33Ɓwâ Yésù yi pə́ Màríyà ɓe Jwîf bɨ yi go ɓe ŋgə́ rè kɨ́íniì, yəré ɨ́ bì ŋgə́ sum, 34Á ŋgə́ fɔ́ ŋgáb: «Nyí kɨ́ɨ́ ŋgə́ ŋga?» Ŋgáb ɨ́ tà: «Kéké, gom wu a pê.» 35Yésù ɨ́ yàrê kɨ́ínɨ. 36Á Jwîf bɨ ta: «Ŋgə́ yaáɓà nɨ ɗúnɨ Làjáàr yáà!» 37Ɨ́dù, mvókín Jwîf bɨ no, nùb kù ɨ́ tà: «Ŋgə́ nò yi kuumna ɓùɓú̧ íí rè, sàmàìn ŋgə́ tɨ ndɨŋɓwée Làjáàr a dù nɨ́ kúre ɗàwá à?»

Yésù səəmtɨ́ Làjáàr

38Yésù ɨ́ yéín kwà, ŋgə́ ɨ́ gì sèrìn. Sèè kɨ́ yɨɨ́m mgbààŋ á, yaá ɗeín ɓe sɨɨ. 39Ŋgə́ ɨ́ tà: «Pɨ́ɨŋkɨ́náam sɨɨ rè.» Máártà, mɨkɨ̀r nɨ̀kúr Làjáàr ɨ́ tà: «Kéké, ŋgə́ ɓacɨ nɨ dùnɨ mínɨ á, ɓetí ŋgə́ á cɨ̀ nɨ sèrìn ku jíì nààsɨ̀b.» 40Á Yésù fɔ́ Máártà: «Mɨ tɨ mɨ wu tànàwá ɨnayâna, óo wu ə́əmtɨ́, wu ɓa pénɨ mgbíí Mèèín á na à?» 41Kùb ɨ́ pɨ́ɨ̀ŋkî sɨɨ rè. Á Yésù ŋgerɨwú íí ɓɨllin, ŋgə́ ɨ́ tà: «Bɨ̀bá, mɨ sáktií wu hȩ wu ə́əmna mɨ nɨ́m mɨ ɓa wu ɓwèìniì rè. 42Mɨ ɗəəŋtɨ́ wu á mɨ ə́ə̀mnàlɨ́ŋnɨ ɓwâ lâs. Ɨ́dù kɨ́ rè mɨ ta ɓe ɨ́r nùb dukɨ́ rè á, àm ŋgáb a ə́mnè ɨnayâna wu ɨ́ tómwo mɨ ru na á.» 43Nyìncáŋhȩ̀ȩ́ u̧nèé, ŋgə́ ɨ́ tàɓà kúu còóm ɨnè: «Làjáàr, fó̧wom!» 44Làjáàr ɨ́ fô̧, gurùb ɓe ŋgárɨ̀b lâs ɓoóm ɓe júk kùb ya vɨ́rɨ ŋgə́ ɓe kíí, tí ɓwê ɓoóm ɓe pɨ́cî júú. Á Yésù tana nùb yi du ɓèé ɨnè: «Palɨkɨ́náam ŋgə́, nyí a mbɨ̂ ŋgə́ gìnɨ.»

Kúúr bɨbiì kùb yí lə́ré Yésù yaà

(Góòmɓwê Mt 26.1-5; Mk 14.1-2; Lk 22.1-2)

45Jwîf bɨ ví̧i̧ yi gáíwona Màríyà cwé rè yi péé nɨ́m Yésù yi ndɨŋndé, ŋgáb ɨ́ ə́mnè ŋgə́. 46Ɨ́dù nùb kù mvókín ŋgábè noò ɨ́ gàìngè Fàrísààb, átɨ̀nànɨ ŋgáb nɨ́m Yésù tɨ ndɨŋndé. 47Fàrísààb ɓe mvènnɨ́b nùb na satɨgàà ɨ́ gì ɓáhɨ́r ŋgwìn jírií, ŋgáb ɨ́ tà: «Nɨ́m tɨ̀ ndɨŋɓaye i̧ ɓe nɨ̀ŋgwá rè, ɓetí ŋgə́ á nɨ túùmnɨ lìím cei. 48Nɨ́m ɨ́ mbɨ̂ ŋgə́ gìnɨ tíí ɓe nɨ́ɨ́b ŋgə́ du ndɨ̀ŋnɨ kɨ́, nùb lâs ɓa bɨ ŋgə́ ə́ə̀mnɨ á, ɗà nùb Róòm a gò bɨ́ ɓə̀tɨ̀kɨ́nɨ Dúú jíri Mèèín nɨ́mè ɓe ti nɨ́mè!» 49Nɨ̀mwi̧ mvókín ŋgábè noò, ɨ́r yi du Kàyîf, yi duce Nɨ̀gáŋ satɨgàà dáín kɨ́ noò ɨ́ tànà kùb noò ɨnè: «Nyí nɨ ɗə̀ə̀ŋwá nɨ́m du ndóŋniì. 50Nyí pə́wa á mîn nɨ̀vɨ́tè mwi̧ kúbɨ̂ŋ ɓe ɨ́r gbàŋ nɨ́mè, ɨ́ ndôŋ kɨ́ gbɨ̧̀ lâs nduklé à?» 51Nɨ́m nɨ̀ŋgwá kɨ́ yi nyin kɨ́, yi nɨ́ ɓe kɨ̀cáàb ŋgə́ nɨ̀mɨrí sé. Hȩ ŋgə́ yi du nɨ̀gáŋ satɨgàà dáín kɨ́ rèé, á ŋgə́ yi kwa kɨ̀cáàb ŋgə́ takɨ́yaye àm cwá Yésù yi du kúnɨ ɓe ɨ́r gbàŋ Jwîf ru. 52Cwá kɨ́ yi nɨ́ ɓe ɨ́r gbàŋ Jwîf sé ɗóò, yi duɓwée nɨ àm ɓáàcùú munɨ́b Mèèín yi njatee ɗɔ̀ɔ́b lè bɨ̂ŋ ndè yá mwi̧, ŋgáb a dùcù ɓanné á.

53Yàrê ye kíì á kɨ̀jííb Jwîf bɨ ta á ɗúnɨ vúm kwíhɨ̀ Yésù yáá. 54Àm kɨ́ á Yésù yi ducɨ nɨ́ yə̀ŋtèènɨ laŋtɨ̧ɨ̧́ mvókín Jwîf bɨ ɗàà ru. Ŋgə́ ɓe nɨ̀fuùb noò ɨ́ gì bɨ́ Èfɨ̀ràyîm; kwɨ́í ti kɨ́ yaá ɗɔ̀ɔ́b yi du gín ti súmnií no.

55 Páskà, jùrúb Jwîf ɓoò yi ŋgóobtɨ́, á nùb ví̧i̧ ti kɨ́ noò yi ɓáasokɨ́yaye Yèrúsàlèm, àm ə́rɨ́b sàtèé síhé.#11.55 Sàtèé síhé hò̧ du túùmnànɨ Mèín ɨnayâna ní nɨ cum só ɗàà yáá na á. 56Ŋgáb yaá Dúú jíri Mèèín no, ŋgáb ɨ́ yà mátèènɨ Yésù ŋgáb a tace mvókín ŋgábè no ɨnè: «Nyí pə́ce i̧? Ŋgə́ tɨ̀ nɨ gùr jùrúb lèè gò kèè?» 57mvènnɨ́b nùb na satɨgàà ɓe Fàrísààb yi sóoŋteekíí nɨ̀vɨ́tɨ̀b ŋgáb ɨ́ tà nò ɗəŋhȩ yɨ́ Yésù duré gò vúm tànànɨ, vúm yè bií ŋgə́.

Zur Zeit ausgewählt:

Jâŋ 11: NTV

Markierung

Kopieren