Jâŋ 10

Sà̧à̧ jírɨ́b ɓe nò gə́tɨ ŋgábè

1Mɨ tanaɓa nyí àmɨɨr wááŋ á: «Nò lə́ kpák jírɨ́bí no, ŋgə́ ɨ́ dù nɨ́ ɓavɨ̀rì lə́wa ŋgə́ ɨ́ nyàìwúndôŋ kpɨ́ còóm, nò kɨ́ du nɨ ŋgàyɨ́r tamŋgwéé á. 2Ɨ́dù nò lə́ɓa nɨ́ ɓavɨ̀rìì, nò kɨ́ ɨ́ du nò gə́tɨ jírɨ́bí ru. 3Nò gə́tɨ kpɨ́ɨ́ á ŋgə́ kùùmnànɨ ɓavɨ̀r, jírɨ́b a ô kúu nóò. Ŋgə́ a ɓê ŋgáb nɨ̀mwi̧ ɓe ɨ́r noò gèhó̧nɨ ŋgáb lúu. 4Ɓwâ ŋgə́ gehó̧ ŋgáb lúu, ŋgə́ a yà gɨ̀sénɨ tíí, jírɨ́b a tusoce ŋgə́ cùrì, ɓetí ŋgáb ɗəəŋtɨ́ bɨ́ kúu nóò. 5Nò ŋgáb du ɗə̀ə̀ŋwáá, ŋgáb tɨ̀ bɨ nò kɨ́ tùr, ŋgáb ɓa bɨ lùɓànɨ cóo á ɓetí ŋgáb bɨ kúu nóò ɗə̀ə̀ŋwá.»

6Yésù yi átɨ sà̧à̧ rè gà̧à̧nànɨ Fàrísààb gɨ̀gàìn no á, ɨ́dù ŋgáb ya bɨ́ ókwa njàb kɨ́.

Yésù du hȩ nò gə́tɨ jírɨ́bí nyɔ̧ɔ̧́ á

7Yésù ɨ́ tàkwà: «Mɨ tanaɓa nyí àmɨɨr wááŋ á: mɨ du hȩ ɓavɨ̀r kpák jírɨ́bí á. 8Nùb ya goyaye tíí du bɨ ŋgàyíìb tamŋgwéé á. Jírɨ́b ya bɨ́ ŋgáb jə̀ŋwá. 9Mɨ du hȩ ɓavɨ̀r á, nò lə́ndóŋ mɨ noò ɓa dùnɨ gə́tîn mîn á. Ŋgə́ ɓa lénɨ ŋgə́ a fó̧cù hȩ ŋgə́ ɗúré á. Ŋgə́ ɓa kwànɨ cɔŋ noò á. 10Ŋgàyɨ́r goɗóo nɨ gwɨ̀ì yúú, gwɨ̀ì kwíhe nɨ̀rì ɓe gwɨ̀ì ɓáàŋ á. Kɨ́ moò mɨ go mɨ nànɨ nɨ̀vɨ́tɨ̀b mè á, mè kɨ́ a dùnàɓà ŋgáb nyɔ̧ɔ̧́. 11Mɨ du hȩ nò gə́tɨ jírɨ́bí nyɔ̧ɔ̧́ á. Nò gə́tɨ jírɨ́bí á ə́ə̀mnɨ cwé ɓe ɨ́r jírɨ́b noò. 12Nò du nɨ́ nò gə́tɨ jírɨ́bí sé, jírɨ́b cè bɨ́ kɨ́ noò sé rɨ, ŋgə́ éíhó̧ɗóo nɨ ə́r mònéè á; ɓwâ ŋgə́ pə́ màŋgù gòniì, ŋgə́ á lùmbɨ́kkɨ́sònɨ jírɨ́b, màŋgù a gò ŋgáb bììnɨ, nùb meceré a njà. 13Ŋgə́ á nɨ lùnɨ ɓetí ŋgə́ éíhó̧ nɨ́ mwèìn noò á, àm noò nɨ ɓe jírɨ́b ɗàà. 14-15Mɨ du hȩ nò gə́tɨ jírɨ́bí nyɔ̧ɔ̧́ á. Hȩ Tá ɗəŋhȩ mɨ, mɨ ɨ́ ɗə̀ə̀ŋcè ŋgéé, u̧ á ɓwê mɨ ɗəŋhȩ jírɨ́b moò, ŋgáb ɗəəŋceé mɨ. Mɨ á cè ə́ə̀mnɨ cwé ɓe ɨ́r jírɨ́b moò. 16Mɨ á kwà ɓe jírɨ́b kù du kpák lè no lə́yèwáá. Á ɗúnɨ mɨ gə́tɨ̀ɓwê ŋgáb, ŋgáb ɓa óknɨ kúu móò á. Ŋgáb ɓa dùnɨ kúùŋ mwi̧ á, ɓe nò gə́tɨ ŋgábè cè mwi̧. 17Tá á mɨ ɗúnɨ ɓetí mɨ kaikíí mè moò àm mɨ a kwàcù mè mo kíì. 18Sàmàìn nò kù ga mè moò ɗàà, mɨ nɨ̀mɨr ɨ́ du mɨ́ ə́ə̀mɓànɨ cwé ru. Mɨ á ɓe nyòm mɨ ə́mne cwéé, mɨ á ɓe nyòm mɨ səəmcuhó̧ cwéé. Nɨ́m Tá moò ta mɨ gò ndɨ̀ŋniì á kí.»

19Nyindí Yésù yi nyin u̧ kɨ́ ɨ́ gèrékwàhâ gɔ̀ mvókín Jwîf bɨ. 20Nùb ví̧i̧ mvókín ŋgábè no ɨ́ tà ɨnè: «Ŋgə́ á ɓe nɨ̀wàtɨ̀b só, ŋgə́ du nɨ yɨŋmîn á. Nyí kɨ́kce tó ɓe nɨ́m ŋgə́ du tàniì àm níì?» 21Nùb kù ɨ́ tà: «Nò nɨ̀wàtɨ̀b sóò a nyìn kúúŋ nyindí rèè à! Nɨ̀wàtɨ̀b nɨ sàmàìn kuumna ɓùɓú̧ íhé ɗàwá ye!»

Jwîf bɨ mvúú ə́ə̀mnɨ Yésù

22Yɨɨ́m ɓwâ màmkwèìn á, kùb yaá cè jɔ̀nɨ jùrúb Dèdìkáàs#10.22 Jùrúb dèdìkáàs du jùrúb mɨ̀tùú Jwîf bɨ ya jɔkom vùùŋcùnɨ nyàŋhȩ̀ȩ́ Màkàbê ya nyaaŋcu tə́bə̀rè múbí Dúú jíri Mèèín Yèrúsàlèm no rɨ á. Yèrúsàlèm. 23Dúú jíri Mèèín no, Yésù yaá yə̀ŋtèènɨ gwa Sàlòmóòŋ no. 24Jwîf bɨ kù ɨ́ ɓáàwò gín Yésùù, ŋgáb ɨ́ tànà ŋgə́ ɨnè: «Há̧á̧ ɗàrò, wu nɨ́m àm wo sóò tànànyàŋháyèwá, duú ɓè wu du Mèsî, tanaɓam nɨ́m wááŋ.» 25Á Yésù piina ŋgáb: «Mɨ tanacií nyí, ɨ́dù nyí mvúú ə́ə̀mnɨ. Nɨ́ɨ́b mɨ du ndɨ̀ŋnɨ ɓe nyòm Tá moò á túùmnɨ àmɨɨr moò. 26Ɨ́dù, nyí mvú ə́ə̀mnɨ àm nyí du nɨ́ kpáín jírɨ́b moò no ɗàwáá á. 27Jírɨ́b moò á óknɨ kúu móò, mɨ ɗəəŋtɨ́ ŋgáb, ŋgáb á cè mɨ tùnɨ. 28Mɨ á ŋgáb nànɨ mè mɨ̀cɨ̧̀, ŋgáb kwá bɨ kûr, nò kù cè sàmàìn ɓa ŋgáb gàhó̧nɨ mo ŋgáréè ɗàà. 29Nɨ́m Tá moò na mé á jíri ndóóŋ nɨ́ɨ́b lâs, nò kù cè sàmàìn gahó̧ Tá moò nɨ́m kù ŋgáréè ɗàà. 30Nɨ́me Tá moò, nɨ́m á mwi̧.»

31Jwîf bɨ árɨ̀cùhâ sɨɨ àm vúm lóoŋkwíikɨ́ Yésùù. 32Yésù ɨ́ tànàgì ŋgáb: «Nyínè tíí mɨ ndɨŋtɨ́ nɨ́ɨ́b nyɔ̧ɔ̧́ ví̧i̧ ɓe nyòm Tá moò. Ɓe vùùm nɨ́ɨ́b kíì, kɨ́ ŋge ɨ́ du kɨ́ nyí ɗú mɨ no lóòŋkwíìkɨ́niì?» 33Á ŋgáb piina ŋgə́: «Nɨ́m nɨ tàwá nɨ́m lóoŋkwíikɨ́ wu àm wu tɨ ndɨŋ nɨ́m du nyɔ̧né, du nɨ àm wu nyinɓáaŋ wú ɓe ɨ́r Mèèín ndè á: Nɨ̀vɨ́tè sam hȩ wu u̧, wu a tà ní Mèín á na á à!» 34Yésù ɨ́ tà ɨnè: «Káàtà ɓíhɨ̀bì nyínè no, á tɨín ɨnayâna Mèín taá: ‹Nyí du nɨ mèín bɨ á.› 35Nɨ́m ɗəəŋtɨ́ nɨ́m du tɨín káàtà Mèèín noò, sàmàìn kùb ákɨ́ré ɗàà. Nùb Mèín yi ta ŋgáb du bɨ mèín bɨ á na rè du bɨ nùb kìn noò yi gonaré á. 36Kɨ́ moò, Mèín yi caá mɨ, ŋgə́ ɨ́ tómwò mɨ ɗɔ̀bín. Ína á nyí fɨ́tɨce nɨ́ tànɨ mɨ nyinɓáaŋtɨ́ ɓe ɨ́r Mèèín àm mɨ tɨ ta ɨnayâna mɨ du mɨ Mwin Mèèín á na rè. 37Mɨ ɨ́ dù mɨ́ ndɨ̀ŋwá nɨ́ɨ́b Tá moò ta mɨ ndɨ̀ŋte, nyí nɨ mɨ ə́mnɨ̀r. 38Mɨ ɨ́ ndɨ̀ŋcè nɨ́ɨ́b kɨ́, nyí dùgɨ̀ nɨ mɨ ə́ə̀mwá, ə́ə̀mhó̧náhá nɨ́ɨ́b mɨ du ndɨ̀ŋnɨ kɨ́ àm nyí a ɗə̀ə̀ŋɓà kɨ́ gwìí mwi̧í̧ ɨnayâna Tá á ɓaín ɓe mɨ, mɨ á cè ɓaín ɓe Tá.» 39Ŋgáb ɨ́ ɗúkwàhâ ŋgə́ bìnɨ, ŋgə́ a ti nɨ́ yààr, lɔ̧́ɔ̧. 40Yésù ɨ́ pècù Jùrdə̧̂ cəə́r, yɨ́ Jâŋ yi kɔɔkom kùb kɔ ə́mní rè. Ŋgə́ ɨ́ dù nɨ́ ku. 41Nɨ̀vɨ́tɨ̀b ví̧i̧ ɨ́ gàìnwò Yésù, ŋgáb ɨ́ tà: «Jâŋ ya nɨ́ lɨ̀m kù túùmwá, ɨ́dù nɨ́m ŋgə́ ya ta ɓe ɨ́r nɨ̀ŋgwá rèè nɨ àmɨɨr á.» 42Ɓè á nɨ̀vɨ́tɨ̀b ví̧i̧ yi ə́mne Yésù.

Zur Zeit ausgewählt:

Jâŋ 10: NTV

Markierung

Kopieren