LUKAS 7

Mbo Esaé Evete Ntete Bezimbi

(Mt 8:5-13; Mt 15:25-28)

1Eyoñ a maneya kobô, bôte bese be mbe be wôʼô nye minkobô mite mise, ane Yésus a nga nyiin e Kapernawum.

2Evete bezimbi ntete wua é nga bili mbo ésaé a konôk bebé ya wu ve a too nye étua édima. 3A nga wôʼô be kobôʼô ajô Yésus, nde a lôme bemvendé bʼéziñ ya Beyude asu ya sili nye na a zu nyii e mbo ésaé wé. 4Ane be nga kui be Yésus a yeʼelane nye be yemeteʼe nye na: Da yiane na ô bo nye jame te, 5amu a nyeʼe ayoñe dangan, e nye fe a nga lôñe aba Zambe dangan. 6Yésus a kelek baa be be, teke ôyab a nda évete bezimbi, e nde évete bezimbi ntete wua ja lôme bemvôé bʼéziñ be kate Yésus na: A Nti, te wo nyoñ abime njuʼu te, amu me nji bo e nyô a yiane na ô nyiin andile dame si. 7Amu ajô te fe me nga bo teke buni na me ne nyô a yiane zu be wo. Ve jôʼôk ajô, a mbo ésaé wom a ye bo mvoʼé . 8Amu e ma me ne éjôé bemasa bam, me bili bezimbi éjôé jame si; a ma jô wua na: Kelek! Nye ve ke; nyô mboʼo na: Zaʼak! Nye ve zu; a e mbo ésaé wome na: Boʼo e jame dili! Nye ve bo de. 9Eyoñe Yésus a nga wôʼô mejô mete, a nga kam évete bezimbi ntete wua, ve kôñelan e mfaʼa ékôane bôt é mbe é tôñe nye a jô na: Ma jô mia de na: Toʼo Israél été, me nji koon avale ngule mbunan di. 10Eyoñ ba bulan e nda , bekee nlôman be nga koon e môt a mbe nkôkon a ntoo mvoʼé .

E mone nkuse minga ya Nayin a wômô

(Lk 8:49-56; Bm 11; 1 Bb 17:17-24)

11E môs ô nga tôñe valé a nga ke e tisone ba loone Nayin; beyéʼé bé a nsamba ézuʼu bôt be mbe ba be nye nsamba. 12Eyoñ a nga kui bebé a mbé ya tison a nga yene be kele jame môt a too atyiʼi mon, nyia wé a mbe nkus: Ane nsamba bôt ya tison ô nga fulane nsamba wua a nye. 13E Nti a nga yene nye, a ko nye éngôngo a jô nye na: Te yôn! 14E nde a subu bebé a nnambe éwolo mbim. Ba be nga beʼe je be nga tebe. Yésus na: A Ndômane môt, ma jô wo de na: Kôlôʼô si! 15Ane mbim ô nga tabe tôtoo a taté na wo kobô. Yésus a nga kee nye nyia wé. 16Woñ ô nga bi bese; be nga kañe Zambe be jôʼô na: Beta nkulu mejô a tebeya ézezañe jangan, a Zambe a zuya jom ayoñe bôte dé. 17Nkobô te ô nga mialan ajô dé e Yudé ase a mefôla mese ma bôéban.

Nsili Yôanes Babtist a sili Yésus

18Beyéʼé be Yôanes be nga kate nye mam mete mese. 19Yôanes a nga loone bebaé ya beyéʼé bé a lôme be e be Nti be jô nye na: Ye wo ô ne nyô a yiane zu, ye bi yange môte mfe? 20Eyoñe be kuiya be nye, bôte bete be nga jô na: Yôanes Babtist a te lôme bia be wo bi jô na: Ye wo ô ne nyô a yiane zu, ye bi yange mfe? 21Awolo te ebien, Yésus a nga yete akon e be abui bôt, miñyeyem a mimbia minsisim a nga saé abui mindindim. 22E nde a nga yalane be na: Kela katane Yôanes mam mia te yen a wôk: mindindim mia yen, miñyeyem mia wulu, minzezam mia fuban, mindôndok mia wôk, miñwuan mia wômô, mbamba foé a kateban e be minzôzoé. 23Ebotan e be nyô ma ye bo te bo ékolé ôbak!

24Eyoñe minlôman mi Yôanes mi keya, Yésus a nga taté na a kobô minsamba mi bôt ajô Yôanes na: Jé mi nga ke nyeʼe mia yen e nkôte si? Ye nden évuñulu ja fôʼô? 25Ve jé mi nga ke yen? Ye môt a beʼe bibubute mengômesan? Yenan, e ba be beʼe abeñe mengômesan be nyiñe fe étôtoʼo été, be ne e menda bejô bôt été. 26Jé ñhe mi nga ke yen? Ye nkulu mejô? Yaa, ma jô mia na: A dañe nkulu mejô. 27E nye ajô dé e ne ntilane na:

ô lôô, ma lôme nkee minlômane ôsu viôé,

asu ya kômesane zene jôé ôsu viôé

28ma jô mia de na: e ba be nga bialé e be binga été, nyô a ne anen été a dañe Yôanes a nji bo. Ve da, éjôé Zambe, nyô a dañe tyôtyoé a dañe nye.

29E bôte bese be nga vôʼôlô nye a benyoñe toya be nga kale nye éyoñe be nga bo na be nyoñe nduane Yôanes; 30ve Befarizieñ a beyeʼele metiñ, mbenan be nga bene na a duu be, be nga wua ôsimesane Zambe e mfaʼa wobe bebien.

31Ma ye veʼane bôte ya miaé wu a za? A ba funane za? 32Ba funane bongô be too e vôme bôte bese ba tabe e mbe ba loone be be jôʼô na:

Bi maneya loñe mia mfañ, a mia mi nji jem;

bi maneya yia bia bi du, ve mi nji ke yôn.

33Amu Yôanes a nga zu, a nji di bidi, a nji nyu woon, mi na: A bili mbia nsisim . 34Mona môt a soya, a jaʼak, a nyaʼak, mi na: a ne e môt a di abui a e nyuu woon, mvôé benyoñe toya a bebo abé . 35Ve ba bese ba kañese feʼe Zambe ba yeme na é ne zôsôô .

Mbo abé a ne minga a jamban

36Wua ya Befarizieñ a nga yeʼelane Yésus na ba nye be di. Ane Yésus a nga nyiin e ndaa mone Farizieñ a tabe tawôlô. 37Nde mbo abé minga éziñ ke a mbe valé e tison, a nga yeme na Yésus a nga too tawôlô e ndaa Farizieñ; ane a nga soo ndeʼe Albata njalan ôlobinda. 38Ve tebe mvuse mebo mé. A mbe a yônôk a taté na a ve mebo me Yésus émumun a miliʼi mé, wôna a nga fimi me a ésile jé, a wubaʼane me a sôé fe me ôlobinda. 39A yene a nga yene nalé, e nde Farizieñ a nga bañete nye a nga jô émien été na: Nge môte nyô a mbe nkulu mejô, a nga ye yeme za e nye minga a nnambe nye a né, a na a ne mbo abé minga. 40Yésus a nga nyoñe nkobô a jô nye na: A Simon, me bili jam éziñ ya jô wo: Nye Yésus na: Kobôʼô a Nyeʼele: 41Nsé memvôla a nga bili bôte be bili nye memvôla bebaé: Wua bedenié mintete mitan, nyô mboʼo bedenié mewôm metan. 42Mbôlô be nji bi jôme ya yaʼan, a nga jamé mvôla e be be bebaane. E mbé a ye dañe nyeʼe nye? 43Simon a nga yalane na: Ma veʼe feʼe na e nyô a nga jamé beta tañ; Yésus a nga jô nye na: Ô yemeya tyik. 44Wôna a nga kôñelan e mfaʼa minga a mbe a jô Simon na: Ye ô lôô e minga nyô? Ma te nyiin e nda jôé, ô nji ve ma mendim asu mebo mam, ve nye a te ve mebo mam émumun a miliʼi mé, a fimi me a ésile jé. 45O nji latane ma anyu, ve nye, nté ma te nyiin, a nji jôʼé latane mebo mam a anyu dé. 46O nji sôôé me mbone nlô; ve nye a maneya sôôé ôlobinda e mebo mam. 47Ajô te ma jô wo de na: ézuʼu mam abé jéé é ntoo njaman , amu e nye a dañeya nyeʼe. Ve nyô ba jamé tyôtyoé a nyeʼe fe tyôtyoé. 48Nye minga na: Mam abé môé, me ntoo njaman . 49E ba baa be be be nga too tawôlô be nga taté na ba jô e be bebien été na: Nyôna a ne za a jamé toʼo mam abé . 50Ve a nga jô minga na: e mbunane wôé ô nyiiya wo, kele mvoʼé .

Zur Zeit ausgewählt:

LUKAS 7: BULU09

Markierung

Kopieren