LUKAS 6

Sabat: bezôzô be fôn; E môt a mbe wo nkôt

(Mt 12:1-14; Mk 2:23 a kui 3:6; Lk 14:1-6; 13:10-17)

1E nga kui môse Sabat éziñe na Yésus a lôt e mefup. Beyéʼé béé be nga buʼu fôn a di je éyoñe be maneya sile je mo été. 2Befarizieñ bʼéziñ be nga jô be na: Amu jé mia bo e jam e nji bo nkañesane ya boban e môse sabat ? 3Yésus a nga yalane be na: Ye mi nji lañe jame David a nga bo, éyoñ a nga wôʼô zaé, émien a e bôte béé; 4aval avé a nga nyiin e nda Zambe a nyoñe fembé é ne étyi, ve di je a ve je bôte bé, akôsa bo na betuni étam be mbe be bili nkañesane ya di je? 5A nga jô be na: Mona môt a ne masa sabat .

6E nga beta bobane môse sabat ôfe na: Yésus ve nyiin aba Zambe, a nga yeʼele. Môt éziñ a mbe valé, wo ya mbo nnôm ô too nye nkôt. 7Beyeme bekalate a Befarizieñ be mbe valé be fombôʼô Yésus, be yangeʼe yen nge a saé môt e môse sabat : e mbe amu be mbe be jeñek ajô ya ve nye mekua. 8Ve a mbe a yemek asimesane dap, e nde a nga jô môt a mbe wo nkôte na: Kôlôʼô si a tebeʼe valé ézezañ. Ane a nga kôlô si a tebe tetele. 9A Yésus a nga jô be na: Ma sili mia de: Ye e ne nkañesan e môse sabat na bi bo mvaé, nge na bi bo abé , na bi nyii môt, nge na bi dimili nye. 10Eyoñ a maneya wua mis e be be bese, a nga jô môt ate na: Same wo wôé. A nga bo nalé a wo wé ô nga bo mvoʼé .

11Njalan a ayaa, be nga sañetan e zañe jap ajô jam be ne bo Yésus.

Ntobane beyéʼé awôm a bebaé

(Mt 10:1-4; Mk 3:13-19; Mm 1:13)

12Eyoñe te, Yésus a nga ke e nkôle yôbe na a yeʼelan; a nga lôt ngum alu na a yeʼelane Zambe. 13Eyoñe tyé é nga lendé, a nga loone beyéʼé béé a top awôm a bebaé yʼété, e mbe a nga yôlé na minlôman:

14Simon, a nga loone na Pierre, André monyañe wé, Yakob, Yôanes, Filip, Bartélémi, 15Metias, Tômas, Yakob e mone Alfé, Simon nyô be mbe be loʼone Zélôte, 16Yude e mone Yakob a Yudas Iskariôt, nyô a nga suʼulane bo nkoñe bôt.

Sermoñ ya nkôle yôp: Bibotan

(Mt 5:1-12)

17Baa be be be nga siliki a a nga tebe njeʼese, e vôme beta nsamba ya beyéʼé bé a nga too, nalé fe bizuʼu bi bôt ya Yudé, Yérusalém a nsaʼa mañ ya Tir, a Sidoñ. Be nga zu vôʼôlô nye a asu ya saéban akone dap. 18E ba mimvimvine minsisim mi nga ndeñele be nga saéban. 19A nsamba ôse ô nga jeñe na ô nnambe nye, amu ngul éziñ é mbe é soʼo be nye a saé bese.

20Ane a nga fombô beyéʼé bé a jô na:

Ebotan a mia minzôzoé, amu éjôé ya yôp é ne énjenan!

21Ebotan a mia mia wôʼô zaé éyoñe ji,

amu mia ye jaé!

Ebotan a mia mia yôn éyoñe ji, amu mia ye vak!

22Mia ye bo ébotan, éyoñe bôt ba ye siñe mia, éyoñe ba ye titane mia, ba ye taa mia a wua jôé denan ane di ôsame, amu mona môt. 23Vaʼane môs ôte a fônan a mevak, amu maʼane menan ma ye bo anen e yôp; amu nalé ate beésa bap be nga bo bekulu mejô. 24Ve bidim a mia minkukum, amu mi mbili mvolane nleme wônan.

25Bidim a mia mebum me ne minlem éyoñe ji, amu mia ye wôʼô zaé!

Bidim a mia mia woé éyoñe ji, amu mia ye ku ôlun a

e milik été!

26Bidim a mia, éyoñe bôte bese ba ye kobô mbamba nkobô ajô denan, amu nalé ate beésa bap be nga bo bivôle vôla bekulu mejô.

Nyeʼane ya nyeʼe besiñ

(Mt 5:38-48; Rm 12:17-21)

27Ve ma jô e mia mia vôʼôlô ma na: Nyekaʼane besiñe benan, boʼone ba ba vini mia mvaé, 28botaʼane ba ba yoʼé mia, yeʼelaʼan ajô ba ba kpweʼele mia. 29Nge môt éziñ a bibi wo amañe da, keʼe fe di avok. Nge môt a nyoñe wo alôʼô dôé, te kamane nye na a nyoñe fe wo kôt. 30Môt a sili wo jôm, vaʼa nye je a te sé môt a nyoñe wo biôme mvôla. 31E jam mia kômbô na bôt be bo asu denan, boʼone de avale da asu dap. 32Nge mia nyeʼe e bôt ba nyeʼe mia, za akéva ba ye ve mia? Bebo abé fe ba nyeʼe e bôt ba nyeʼe be. 33Nge mia bo mvaé e be bôt ba bo mia mvaé za akéva ba ye ve mia? Bebo abé fe ba bo avale te. 34Nge mia ve bikôla e be bôt mia buni na mia ye nyoñe be be, za akéva ba ye ve mia? Bebo abé fe ba ve bebo abé bikôla, nalé ba ye nyoñe mvol. 35Ve nyekaʼane besiñe benan, boʼone mvaé a vaʼane bikôla tee ndinlem ya bulane nyoñ. Maʼane menan ma ye bo anen a mia ye bo bone be Nyô A Dañ Oyabe yôp, amu a ne mbaa nlem e be ba be ne bikalak a ba be ne kpwala. 36Koone bôt éngôngo ane ésoo wônan a koo bôt éngôngo.

Ntyiʼane mejô

(Mt 7:1-5,15-20; 12:33-37; Yak 4:11-12)

37Te tyiʼane bôte mejô, nalé mia ye bo te tyiʼibane mejô, te veane bôte mekua a mia ye bo te vebane mekua, jamaʼan a mia ye jamban. 38Vaʼan a ba ye ve mia; ba ye sôé jôm é ne mbamba mveʼan abume denan été é too njinan, nseʼesan a kui na é fuluku; amu ba ye veʼe mia a ôvek mia veʼe wô.

39A nga ku fe be nkana na: Ye ndindim ô ne liti ndindime zen ? Ye bebaane ba ye bo te ku ébé?

40Nyéʼé a nji dañe nyeʼele; ve ñyeʼé ase a ne njalan ayéʼé dé été a ye bo ane nyeʼele wé.

41Amu jé wo yene évua é ne e dise monyoñ, ve teke yene mbôñ ô ne e dise dôé womien? 42Nge na ô ne nguleya jô monyoñ aya na: A mojañ, jôkéʼé me vaa wo évua é ne wo dis, e wo ô ne teke yen mbôñ ô ne wo dis? A môte bebaduʼu tatéʼé vaa e mbôñ ô ne dise dôé, mvus éte wo ye yen a vaa évua é ne e dise monyoñ.

43Teke mbamba élé a wume mbia ébuma, nge mbia élé ki a wume mbamba ébuma. 44Amu élé ése ba yeme je a ébuma é ne énjéé. Be nji kolé befig e biyo, a be nji koé bibuma bi ndiʼi woon e minsinik. 45Mbamba môt a nyoñe mvaé a soo je e mbamba akume ya e nleme wé, a mbia môt a nyoñ abé da so nye e mbia akume wé, amu anyu môt da kobô e jam e ne nye njalan e nlem .

Mboone mejô me Zambe

(Mt 7:21-27; Yak 1:22-25; 2 Pi 1:5-10)

46Amu jé mia loone me na: Nti, Nti! Ve teke bo jam ma jô? 47Môt ase a zu be ma, a wôʼô mejô mam a bo me, ma ye liti mia e môt a funane nye: 48a funane môt a nga lôñe nda . A nga faʼa si édok a bôôé mbôkaʼa akôme yôp. Ndôn é nga kui, ôsôé ô nga jimbi nda éte, ve teke kui na é kpwé nda éte si, amu é mbe mbamba nlôñan. 49Ve nyô a wôk teke bo a funane môt a nga lôñe nda e si teke mbôkaʼa. Ôsôé ô nga jimbi je; été été é nga ku, a nda éte é nga tyamé beta njamban.

Zur Zeit ausgewählt:

LUKAS 6: BULU09

Markierung

Kopieren