Sawal la giled’a 85
85
Tchen nda yam b’leng nga halasid’a
1Ni sawal la gile d’a Kore groma a hlat a hat mi ma ngolâ hi suma hle sawalina.
2Ma didina, ang we hohowa ambas manga,
ang hulongî andjafâ hi Jakob suma a yozi magombina.
3Ang hle tchod’a hi sum mangîd’a woyo,
ang vat hurung ngei yam tcho mazid’a pet mi.
Tchol ndjö
4Kur hur mang ma zala pî, ang hurung b’lengâ;
kur ayî mang ma bibiliuna pî, ang hurung vat tei mi.
5Alo ma sud’umina, ar ang hulongômi blangâmina,
ang ar hur mang ma zal ma kamina woyo.
6Ang nga zalî hurung kami hina gagak su?
Hur ma zal mangâ i navok hina
gak kur atchogoid’a katchogoid’a zu?
7Ni ang ba, mba hulongî á sud’umi
tala ami sum mangâ kagami ki furîd’a kangû d’a d’uo zu?
8Ma didina, ang tagami o mang nga didinda,
ang sud’umiya.
9An min hum zla d’a Ma didina Alo mana mi data.
Nga mi de zla d’a halasa
mi mam suma d’engzeng suma iratna,
kayam azi hulong kur lili mazid’a d’uo d’a.
10Gagazi, sut mamba ti nga go ki suma a nga lum mandarama
tala subur mamba mba d’i kak yam ambas meid’a d’a.
11O mam mba didinda ki gagazid’a a nga ngaf taziya,
d’ingêra ki b’leng nga halasa a nga bet tazi kokok mi.
12Gagazid’a mba d’i tcholï ka andaga;
d’ingêra hAlonid’a mba d’i tcholï nakulo mi.
13Ma didina mba mi lei djivid’a,
andaga meid’a mba d’i wul ahlena mi.
14D’ingêra mba d’i tit avoromu,
mba d’i ge lovota avorom mi.
Zur Zeit ausgewählt:
Sawal la giled’a 85: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.