Ad’u Tinda 4
4
Kain mi tchi Abel
1 Adam mi bur kamamba Ef, ti ve wirâ, ti vut gorâ, ti yum ala Kain#4.1 Kain: Ki vun Hebre-na nala, Fed’a., ti dala: Ma didina mi ndjunun an vut wa gor mandjufâ. 2Bugola, ti vut wiyema, ti yum ala Abel#4.2 Abel: Ki vun Hebre-na nala, Fod’a.. Abel lî ma pol tumiyôna, Kain ni sama zuma mi.
3Kur bur tu, Kain mi hahle suma mam zumuzina he d’a hawad’a mi Ma didina. 4Abel mi mba ki gro tumiyô mam suma d’or suma vut avo’â, mi ngad’aziya, mi he hliu ma djivi ma kalâ he d’a hawad’a mi Ma didina. Ma didina hurum ve Abel ki he d’a hawa mamba, 5wani hurum ve nga Kain ki he d’a hawa mamba d’i. Ata yi máma Kain hurum zal ngola, nga mi d’us iram dudurup.
6Ma didina mi de mi Kain ala: Ni kayam me ba, ang hurung zal na ge? Ni kayam me ba, ang d’us irang na ge? 7Ang le le djivid’a ni, ang mba te kad’u; le ang le djivid’a d’uo ni, tchod’a ti nga grifa kä avun agrek mangâ; ti min á te kangû, wani mbeî ang te kad’u.
8Kain mi de mi Abel ala: Ei i abageya. Kid’a azi mbaza abageid’a, Kain mi nde yam wiyema Abel, mi tchumu.
9Ma didina mi djop Kain ala: Wiyengâ Abel mi nga ni lara ge?
Kain mi hulong dum ala: An wum nga d’i; an ni ma ngomoma zu?
10Alona mi hulong dum ala: Ni kayam me ba, ang le hina ge? An hum buzu wiyengâ nga mi tchi d’igi del sana na, ei kä andaga dei, ti fan sä, kayam an sam atchugulumu. 11Ki tchetchemba, an nga ni gang vuna yam andaga d’a ngo vunat ti tche buzu wiyeng ma ang tchuma abonga. 12Fata ang zum andagad’id’a, ndat mba d’i wulung ahlena d’i. Ang mba talal yam andagad’a, ang mba tcha ta’ abo hî, tcha ta’ abo hî!
13Kain mi de mi Ma didina ala: Ndak manda taneka heî; an ndak á zit ti. 14Le ang digin ndei ini yam andaga d’a wanda ni, an mba ni ngei tan ndei dei avorongû, an mba ni talala, mba ni tcha ta’ abo hî, tcha ta’ abo hî; sama lara ma fana mba mi tchanu.
15Ma didina mi hulong dum ala: Hawa! Le sa mi tchangû ni, an mba ni sang atchugulung yan kid’iziya. Kayam ndata, Ma didina mi tin vama taka avor Kain ala le sa fum pî, mi tchum mbi.
16Kain mi wal lei dei ki Ma didina, mi i kak sä yam andaga d’a Not-ta#4.16 Not: Nala, Tcha ta’ abo hî, tcha ta’ abo hî., abo ma yorogona hi Eden-na.
Andjafâ hi Kain-na
17Kain mi bur kamamba, ti ve wirâ, ti vut gorâ, ti yum ala Enok. Kain mi min azina, azì máma mi yum ki simiyê goroma Enok. 18Enok mi vut Irat, Irat mi vut Mehujayel, Mehujayel mi vut Metusayel, Metusayel mi vut Lemek.
19Lemek mi vik aropma mbà, d’a avoka a yat ala Ada, d’a mbàd’a a yat ala Sila. 20Ada ti vut Jabal; Jabal ni suma a nga kaka kur zlub’ud’a, a nga ngom d’uwarîna abuzi ngolo. 21Wiyema a yum ala Jubal ni suma bu adingâ ki taulâd’ina pet abuzi ngolo. 22Sila ti vut Tubal-Kain ni ma tchaf ma zle kawei ma hleuna ki ma wuranina. Tubal-Kain wiyemba ni Näma.
23Lemek mi de mamiyôma ala: Ada agi ki Sila, agi humugiya; amiyôna, agi humugi zla manda. An tchi sana kayam mi kan mbilâ; an tchi gor azongâ kayam mi han durud’a. 24Le a tchi suma yam Kain kid’iziya ni, a mba tchi suma kan an Lemek dok kid’iziya yam kid’iziya mi.
Zla d’a yam Set azi ki Enos-sa
25 Adam mi bur kamamba kua, ti vut gor mandjufâ, ti yum ala Set, ti dala: Alona mi han gorâ balum Abel ma Kain mi tchuma. 26Set mi vut gorâ, mi yum ala Enos. Ata yi máma suma a tin ad’ud’a á tchen ki simiyê Ma didina.
Zur Zeit ausgewählt:
Ad’u Tinda 4: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.