Ad’u Tinda 18
18
Alona mi hle vunam mi Abraham á hum gorâ
1Ma didina mi nde tam mbei ir Abraham go kagu ma nglona hi Mamre-na. Abraham mi nga kaka kä avun zlub’u mamba abo afata faleid’a. 2Ata yi máma na wat, mi we suma hindi a nga tchola go ki sed’emu, mi tcholï ringâ avun zlub’u mamba atogo zak, mi ngavaziya, mi grif kä andaga avoroziya, 3mi de mi ma dingâ tu adigazi ala: Salana, an nga ni tchenengû, le tang lang djivid’a kanu ni, ang kal yam aziyan ndi. 4Ar an hagi mbiyo ma mbus asegina dö, agi tugugi tagi ad’u agu ma wana. 5An i ni hagi tena nde, kayam agi fagi ad’enga tua ba, agi igi tua, kayam agi kalagi yam aziyan hawa na d’i.
Azi hulong dum ala: Djiviya! Ang i le d’igi ang de na.
6Ata yi máma Abraham mi hulong kur zlub’u mamba atogo zak, mi de mamamba Sara ala: Ndak nga afut ta adiged’id’a hur angota hindi, ndak yavuna atogo zak.
7Bugola, mi ring kur kangâ mama, mi man namuhl ma tum ma djivi ma d’orâ, mi de mazong mama ala: Ang i ngad’am atogo. 8Kid’a mi mba ki hliunid’a, mi tinizizi kä avorozi zlapa ki mbul ambira kambir ra arid’a; azi te. Wani Abraham mi nga tchola gevezi ad’u aguna.
9Azi djop Abraham ala: Amanga Sara ti nga ni lara ge?
Mi dazi ala: Ti nga kur zlub’ud’a.
10Ma dingâ tu adigazi mi dum ala: Gagazi, an mba ni hulongî dama hina dedege wani, amanga Sara mba d’i vut gorâ.
Wani Sara ti nga avun zlub’ud’a blogomu, ti huma, 11-12ti san kurut krovo, kayam Abraham ki ndat djak a mbut mamara, bizat ta vuta kal da’ mi. Sara ti de kurut ala: Ki tchetchemba, an mbut wa mamara, salana mi mbut ni mamara mi, zla mandjuf nga kan ndei zu?
13Ma didina mi de mi Abraham kua ala: Ni kayam me ba, Sara ti san nge? Ni kayam me ba, ti dala: An mbut mamara, an ndak á vut gor ruo ge? 14Na ni vama hle Ma didina abod’ina nga zu? An hulongî avo hatang dama hina dedege wani, Sara nga ki gorâ abod’u.
15Ata yi máma Sara ti le mandarâ, ti tin vunad’u, ti dala: An san nga d’i!
Mi hulong dat ala: Gagazi, ndak sana!
Abraham tchen Alona yam Sodom
16Bugol la sum ndazina a tchol á id’id’a, a mbut irazi yam azì ma Sodom-ma; Abraham mi i ki sed’ezi á tiniziya. 17Ma didina mi de kurum ala: An ndak á ngei Abraham vama an luma zu? 18Kayam Abraham mba mi mbut nandjaf ma ngol ma ad’engâ; andjaf suma yam andagad’ina pet, an mba ni b’e vunan kazi ni kamu. 19An manamu, kayam mam mba mi hat groma kandjavam á ngom vun ma he mana á tit yam d’ingêra ata lovod’od’u. Ni hina ba, an Ma didina mba ni ndak vun vun ma hle ma an hlumzina.
20Ma didina mi de mi Abraham ala: Käl la suma a kal yam suma Sodom-ma ki suma Gomor-rîd’a ti kal ngola heî; tcho mazid’a kal ngola heî mi. 21Kayam ndata, an nga ni tchuk asen kä á we käl la a kal kazi sä avoronda ni gagazi zu? Le nga hina d’uo ni, an ni we ki iran tua.
22Suma mbàna a tchuk tazi á i Sodom; Abraham mi nga tchola avok Ma didina tua. 23Abraham mi hut gevemu, mi dum ala: Na ni ang mba b’lak suma d’ingêrâ woi zlapa ki suma tchona zu? 24Le suma d’ingêrâ a nga kur azì ma Sodom-ma dok vazlû ni, ang mba b’lagam mbei zu? D’oze ang vat hurung ngei kam yam suma dok vahl suma kurâ zu? 25Ang nga ki djib’er ra hina d’a á tchi suma d’ingêrâ zlapa ki suma tchona d’i? D’oze suma d’ingêrâ a ndak á mbut suma tchona d’uo hina d’uo zu? Ang Ma ka sariyad’a yam suma petna, mbeî ang mba ka sariyad’a ndak á le vama d’ingêrâ d’uo zu?
26Ma didina mi hulong dum ala: Le an fe suma d’ingêrâ kur azì ma Sodom-ma dok vazlû ni, an mba ni vat hurun ndei yam azì máma yam sum ndazina.
27Abraham mi hulong dum ala: Gola! An ve tan ad’enga á de zlad’a ki ang Salana, an mala nandaga d’a gugud’upa ki butna na. 28Le ang fe suma d’ingêrâ dok fid’i yam vazlû ni, ang mba b’lak azì máma woi pet yam suma vahlâ zu?
Ma didina mi hulong dum ala: Le an fe suma d’ingêrâ dok fid’i yam vazlû ni, an mba ni b’lagam mbei d’i.
29Abraham mi dum kua ala: Le ang fe suma dok fid’i ni, ang le ni nana ge?
Ma didina mi hulong dum ala: An mba ni b’lagam mbuo yam suma dok fid’ina.
30Abraham mi hulong dum ala: Salana, le an dangû ni, ar hurung zal li; le ang fe suma d’ingêrâ dok hindi mi na?
Ma didina mi hulong dum ala: Le an fe suma d’ingêrâ dok hindi ni, an mba ni b’lagam mbi.
31Abraham mi hulong dum ala: Salana, an ve tan ad’enga á dang zlad’a; le ang fe suma d’ingêrâ dok mbà mi na?
Ma didina mi hulong dum ala: Yam suma dok mbàna, an mba ni b’lagam mbi.
32Abraham mi hulong dum kua ala: Salana, ar hurung zal li, an nga ni dang zlad’a kua; le ang fe suma d’ingêrâ dogo mi na?
Ma didina mi hulong dum ala: Yam suma dogona, an mba ni b’lagam mbi. 33Kid’a Ma didina mi de zlad’a mi Abraham dad’a, mi iya; Abraham mi hulong avo hatam mi.
Zur Zeit ausgewählt:
Ad’u Tinda 18: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
