Ad’u Tinda 17
17
Alona mi mbut simiyê Abram ala Abraham
1Kid’a Abram bizam ndak dok zlengâ yam zlengîd’a, Ma didina mi nde tam mbei iramu, mi dum ala: An nAlo ma ad’engên kal petna; ang tit avoron d’ingêr ndak memet. 2An mba ni djin vunan ki sed’engû, an mba ni zulung andjavang ngola.
3Abram mi ge tam kä ki iram andaga avoromu. Alona mi hulong dum ala: 4Wana ni vun ma djin ma an djinim ki sed’engâ: Ang mba mbut nandjaf suma ablauna abuziya. 5Suma a dok yang ala Abram mbuo d’a, wani a mba yang ala Abraham#17.5 Abraham: Ki vun Hebre-na nala, Abu suma ablauna., kayam an mba ni mbud’ung andjaf suma ablauna abuziya. 6An mba ni arang ang mba vut grona ablaud’a, azi mba vut andjaf suma teteng; amuleina a mba buzugï nad’u andjavangû. 7An mba ni djin vunan ki sed’eng kandjavangû, kandjavang ma mba mi mba bugol kur atchogoi d’a lara ge petna mi; ni vun man ma djin ma didina. An mba ni arî Alo mangâ, Alona handjavang ma blogongîna mi. 8Andaga d’a ang kak mbeid’a kata, nala, andaga d’a Kanan-nda pet, ni mi ang kandjavangû, mba d’i mbut ni magid’a ki iragi fafat; an mba ni arî Alo mazina mi.
Bayâ d’a ngata
9Alona mi de mi Abraham kua ala: Ang ngom vun ma djin ma an djinim ki sed’engâ djiviya, ang kandjavang ma blogongâ, kur atchogoi mazid’a pet. 10Vun ma djin ma an djinim ki sed’egina, agi ngomogiziya, ang kandjavang ma mba mi mba blogongâ; grogi suma andjofâ pet agi ngad’azi bayâd’a. 11Agi ngad’agi bayâd’a; bayâ ndata mba d’i mbut ni vama simata yam vun ma djin ma an djinim ki sed’egina. 12Gro andjuvei suma agi mba vud’uzina pet, magumei suma a mba vut avo hatagina d’oze suma agi mba guzuzi ki beged’a abo suma dingîna, ma lara ma nandjavagi d’uo na, agi ngad’azi bayâd’a kur bur ma klavandina kur atchogoi d’a lara ge pet. 13Magom ma a mba vud’um avo hatagina d’oze ma agi mba guzum ki bege magid’ina, mbeî agi ngad’am bayâd’a. Hina mba d’i arî vama simata atagi yam vun man ma djin ma didina. 14Wani sama a ngad’am nga bayâd’a d’uo na, an mba ni pad’am mbei aduk sum mana, kayam mam b’la’î vun ma djin mana.
15Alona mi de mi Abraham kua ala: Ang dok yi amanga ala Sarai d’uo d’a, wani ang yat ala Sara#17.15 Sara: Ki vun Hebre-na nala, Amulâ goromba.. 16An mba ni b’e vunan kad’u, an mba ni hang gorâ ki sed’ed’u; an mba ni b’e vunan kad’u, mba d’i vut andjaf suma ablauna; andjaf amuleina ablaud’a a mba buzugï ni kurud’u.
17Abraham mi ge tam kä ki iram andaga avok Alona, mi djib’er kurum krovo, mi nde sanda ala: Sama bizam kisâ, mi ndak á vut gorâ zu? D’oze Sara bizat dok zlengâ wana, ti ndak á vut tei zu? 18Abraham mi de mAlona ala: Ang ar Ismael va mi lum avorong ngi!
19Alona mi de mi Abraham ala: Nga na d’i! Amanga Sara mba d’i vut gor mandjufâ, ang mba yum ala Isak#17.19 Isak: Ki vun Hebre-na nala, Mi sana; ni kayam me Abraham mi sana.. An mba ni djin vunan ki sed’em kandjavam ma blogoma; ni vun man ma djin ma didina. 20Yam Ismael, an humungû. Gola! An nga ni b’e vunan kamu, an nga ni zulum andjavam avogovogo; mam mba mi vut amuleina dogo yam mbà, an mba ni zulum andjavam ngola. 21Wani an mba ni djin vunan ki Isak ma Sara mba d’i vud’ungzi dama hina dedegena.
22Kid’a Alona mi de zlad’a mi Abraham dad’a, mi iya, mi aramu. 23Abraham mi ve goroma Ismael, mi yo magumeina pet suma a vut avo hatama ki suma mi guzuzi ki beged’ina, nala, gro andjofâ pet suma avo hatama, mi ngad’azi bayâd’a kur bur máma d’igi Alona mi dum na. 24Kur bur ma Abraham mi ngat bayâd’ina, bizamî dok zlengâ yam zlengâ. 25Kur bur ma ngat Ismael bayâd’ina, bizamî dogo yam hindi mi. 26Ni kur bur ma tu máma ba, Abraham azi ki goroma Ismael a ngat bayâd’a. 27Suma avo hatama, nala, magumei suma a vut avo hatama ki suma mi guzuzi ki beged’a abo suma dingîna, Abraham mi ngad’azi bayâd’a zlapa ki mamu.
Zur Zeit ausgewählt:
Ad’u Tinda 17: BA
Markierung
Teilen
Kopieren
Möchtest du deine gespeicherten Markierungen auf allen deinen Geräten sehen? Erstelle ein kostenloses Konto oder melde dich an.
Azumeina Bible © Alliance Biblique du Tchad, 1999.
