Mako 13

Yesu endeka a kunyonga kwa Njuvo ya Shukulu Kalunga

(Mateo 24:1-2; Luka 21:5-6)

1Co omo Yesu watuukile mu Njuvo ya Shukulu Kalunga, umo wa vandongisi vendi wamulekele ngwendi, “Kenga, Mulongisi, vuvwa vwa mamanya na vuvwa vwa vinjuvo!”

2Co Yesu wakumbulwile ngwendi, “Munamono vinjuvo vyoshe evi ndi? Kukukakala limanya limo likasala mu mutambela walyo, oshe akasiwuka.”

Tuyando na mapakeso

(Mateo 24:3-14; Luka 21:7-19)

3Co Yesu watumbamene a Munkinda wa Oliveta, kushungama na Njuvo ya Shukulu Kalunga, omo Petulu, na Yakomba, na Yowano, na Anduleo vezile kuli ikeye kwavo lika vamwihwile ngwavo, 4“Tuleke mwaka uka evi vyoshe vikasholoka, na cizivukiso mukajo tukazivuka naco ngwetu simbu inete ngeci vilingiwe?”

5Co Yesu wendekele kuli vakevo ngwendi, “Nyanyameni, ngeci kesi mutave umo amitangule. 6Vavangi vakaija mu lizina lyange vakendeka ngwavo, ‘Yange vene ikeye!’ Vakatangula vavangi. 7Co omo mukaziva muyoyo wa vinzita na muzimbu wa vinzita, oloni kesi mukajujuke. Evi vinapande kusholoka, oloni kuvilumbununa ngeci kukotoka kunete. 8Omwo lifuti limo likalwa nzita na lifuti likwavo, co vumwene vukalwisa vumwene vukwavo. Kukakala mandunduma ku mitambela yakuliseza-seza na njala ya lyangengela. Evi vinapu ngwe kushangumuka kwa mushongo wakukita mwana.

9“Oloni munapande kunyanyama. Omo vakamikwata nakumitwala ku vimbanja nakumisompa. Co vakamipupa mu masinangonge avo, co vakamimika ku mesho a vaka-kushwana na kuli vimyene omwo lizina lyange, mukavaleke Vin̄anda Vyavivwa. 10Oloni omo simbu kanda yete, Vin̄anda Vyavivwa vakavyambulula kuli vanu voshe. 11Co omo vakamikwata nakumitwala ku vimbanja, kesi mukalinyenge nakuyongola ngweni vika tukendeka, oloni omo simbu inete, mukendeka vyoshe vivakamyana. Omwo majwi amukendeka kesi ngwe eni embwe, oloni akatunda kuli Munzinzime Wakujela. 12Co musamba akatwala musamba wendi ku kutsa, co vaishavo lalo vakalinga cuma cimo kuli vana vavo. Co vana vakatengulukila visemi vavo nakuvatwala ku kutsa. 13Co voshe vakamizinda omwo lizina lyange. Oloni woshe uje akakateya na ku shongo akovoka.

Cimweso ca Vunyengwe

(Mateo 24:15-28; Luka 21:20-24)

14“Oloni mukamona cimweso ca Vunyengwe cinemana kuje kucapandele kukala.” (Yove ulinakulava zivisisa muvinalumbunukila!) “Asinoni vaje vali mu Yundeya vakatewele ku malundu. 15Munalume uje ali akamwa ya njuvo yendi#13:15 AKAMWA YA NJUVO YENDI: Kenga Mateo 24:17. kesi akashulukeo nakwambata vije vili mu njuvo yendi. 16Co munalume uje ali mu lihya lyendi kesi akeluke ku njuvo yendi nakwambata cikoveyo cendi. 17Co luvinda kuli vanakazi vaje vakakala na tufumba, na vanakazi vaje vakajamwesa a simbu ije! 18Lombeleni kuli Njambi ngeci vyuma evi kesi vikalingiwe a simbu ya cisika! 19Omwo a matangwa aje kukakala n̄avava ije kanda vaimoneo laja ano a kaye tunde akushangumuka omo Njambi watangele kaye kweta nalelo lino. Nambe kulutwe kuyikakalako lalo. 20Co nga Shukulu Kalunga kakeesele matangwa aje, nga munu naumo wai akovoka. Oloni naakeesa omwo vanu vendi vaje vaangwile.

21“Asinoni, nga munu umo akamileka ngwendi, ‘Kengeni, ali kuno Kilistu!’ Nambe ‘Kengeni, uje ali kuje!’ Kesi mukamukulaela. 22Omwo kukasholoka vaKuvwavesa va makuli na vaka-kwimanena va makuli vakamwesa vizivukiso na vikomokeso vyakama, vakatangule nga citava nameme vaje vavaangwile kuli Njambi. 23Oloni nyanyameni! Njinamilekela cimweja vyuma vyoshe omo simbu kanda yete.

Kwija kwa Muna Munu

(Mateo 24:29-31; Luka 21:25-28)

24“Oloni a simbu ije vene omo tuyando tuneti, litangwa likazivala vwii, co ngonde kuyikatu lyezi, 25co vingongonosi vikawila asi, co vinzili vya mwilu vikaninganga. 26Asinoni Muna Munu akasholoka, akaija a mashelwa na nzili yakama na vumpau. 27Co akatuma tungelo ku vimbango viwana vya ano asi, co vakakungulula vanu va Njambi vaje vaangwile kutunda ku shongo imo ya kaye nakweta ku shongo ikwavo ya kaye.

Cilongesa ca muti wa mukuyu

(Mateo 24:32-35; Luka 21:29-33)

28“Lilongeseni mana ku cisimo ca muti wa mukuyu. Omo minango yawo ijovelela, mwazivuka ngweni nyangao ili muyehi. 29Ngecivene, mu cifwa eci vene, omo mukamona vyuma evi vilingiwa, mwazivuka ngweni ikeye ali muyehi, ku cikolo vene. 30Mwa vushunga njimileka ngwange vyuma vyoshe evi vikalingiwa simbu kanda vanu ava valinakuyoya ololo voshe vatse. 31Lilu na asi vikaita, oloni majwi ange kuwakaiti embwe.

Naumo wai azivuka litangwa nambe simbu

(Mateo 24:36-44)

32“Oloni litangwa lije, nambe simbu ije naumo wai avizivuka, nambe tungelo va mwilu, nameme Mwana, kuvanga Ishe lika ikeye azivuka. 33Nyanyameni, kengeleleni, omwo kumuzivuka simbu omo ikaija. 34Eci cikapwa ngwe munu atunda ku njuvo yendi aya vungenzi, omo aseza njuvo yendi, mu mavoko a vangamba vendi, munu na munu wakele na vipangi vyendi vyalingile, co muka-kunyunga ku cikolo wamushikile ngwendi akengelele. 35Toneni, omwo kumuzivuka simbu ije yakeluka vavenya njuvo, nambe ku cingwezi, nambe akati ka vutsiki, nambe a vindemba, nambe ku mutondo. 36Nga aija vwasi-vwasi, kesi amiwane anga munalala tulo. 37Co evi njendeka kuli yeni, asinoni njilinakuvyendeka kuli voshe ngwange, kengeleleni!”

Zur Zeit ausgewählt:

Mako 13: MBB

Markierung

Kopieren